കുതിച്ചുയർന്ന് പണപ്പെരുപ്പം; തളർന്ന് അദാനി; ഇന്ത്യൻ ജാതകം മാറ്റിയെഴുതും ലിഥിയം നിക്ഷേപം?

ബജറ്റ് കഴിഞ്ഞു, ആർബിഐയും യുഎസ് ഫെഡും വീണ്ടും പലിശ ഉയർത്തി, അദാനി ഗ്രൂപ്പിനെക്കുറിച്ച് ഒട്ടേറെ വാർത്തകൾ വന്നും പോയുമിരുന്നു, ബഹുഭൂരിപക്ഷം കമ്പനികളുടെയും മൂന്നാംപാദ പ്രവർത്തനഫലങ്ങളും വന്നുകഴിഞ്ഞു – എല്ലാം ചേർന്ന് ബഹളമയമായ രണ്ടാഴ്ചയ്ക്കു ശേഷം ഓളമടങ്ങിയ ഇന്ത്യൻ ഓഹരിവിപണി പുതിയ തിര തേടി നിൽക്കുമ്പോഴാണ് ഇന്ത്യയിലെ പണപ്പെരുപ്പം എല്ലാ കണക്കുകൂട്ടലും തെറ്റിച്ച് പിടിവിട്ടു പറന്നത്(6.52%). 2 മാസത്തെ ഇടവേളയ്ക്കു ശേഷമാണ് പണപ്പെരുപ്പം വീണ്ടും ആർബിഐയുടെ സഹനപരിധിക്കു(6%) മുകളിലേക്കുയരുന്നത്. ഇതു വിപണിയെ എങ്ങനെ സ്വാധീനിക്കും, ഈയാഴ്ചയെ ഇനിയെന്തൊക്കെ കാത്തിരിക്കുന്നു? വിശദമായി പരിശോധിക്കാം.

∙ ആർബിഐ പറഞ്ഞതും പറയാത്തതും

കഴിഞ്ഞയാഴ്ചയിലെ ആർബിഐ യോഗം പലിശനിരക്കിൽ വരുത്തിയ കാൽ ശതമാനം വർധനയിൽ അതിശയമൊന്നുമുണ്ടായിരുന്നില്ല. എന്നാൽ വിപണി കാത്തിരുന്നത്, തൽക്കാലത്തേക്കെങ്കിലും പലിശ കൂട്ടൽ നിർത്തിവയ്ക്കുന്നുവെന്ന പ്രഖ്യാപനത്തിനായിരുന്നു, ഈ പ്രതീക്ഷ വെറുതെയായതോടെ മുന്നോട്ടുള്ള കുതിപ്പ് വിപണി കൈവിട്ടു. 

2018 ഡിസംബറിൽ ശക്തികാന്ത ദാസ് ആർബിഐ ഗവർണറായി ചുമതലയേൽക്കുമ്പോൾ 6.5% ആയിരുന്നു റീപ്പോ നിരക്ക്. 2019 ഫെബ്രുവരിയിൽ അത് 6.25ലേക്കു കുറച്ചു. പിന്നീട് കോവിഡ് പ്രതിസന്ധികാലത്ത് തുടർച്ചയായി കുറച്ചുകൊണ്ടുവന്ന പലിശനിരക്ക് 2020 ഒക്ടോബറിൽ 4 ശതമാനത്തിലെത്തിയ ശേഷം ഒന്നര വർഷക്കാലം അതേ നിലവാരത്തിൽ തുടരുകയായിരുന്നു. പണപ്പെരുപ്പം പിടിവിട്ടുയരാൻ തുടങ്ങിയപ്പോൾ 2022 മേയിലാണ് ആർബിഐ പലിശനിരക്കുയർത്തലിനു തുടക്കമിട്ടത്. തുടർച്ചയായി ആറു തവണയായി വരുത്തിയ വർധന വഴി എട്ടര മാസം കൊണ്ട് 2.5% ഉയർന്ന പലിശനിരക്ക് വീണ്ടും 6.5 ശതമാനത്തിലെത്തി നിൽക്കുകയാണ്. 2019നു ശേഷമുള്ള ഏറ്റവും ഉയർന്ന പലിശനിരക്കാണിത്. ഇതിലും ഉയർന്ന പലിശനിരക്കുണ്ടായിരുന്നത് ഏഴര വർഷം മുൻപാണ്, 2015 സെപ്റ്റംബറിൽ (6.75%). 

ഉപഭോക്തൃ വിലസൂചിക (സിപിഐ) അടിസ്ഥാനമാക്കിയുള്ള പണപ്പെരുപ്പത്തിലും മൊത്തവില സൂചിക പ്രകാരമുള്ളതിലും (ഡബ്ല്യൂപിഐ) പ്രകടമായ കുറവു വന്നിരുന്നെങ്കിലും അടിസ്ഥാന പണപ്പെരുപ്പം(core inflation) ഉയർന്ന നിലയിൽ തുടരുന്നു എന്നതാണ് പലിശനിരക്കു വർധന നിർത്താറായെന്നു പറയുന്നതിൽനിന്ന് ആർബിഐയെ തടഞ്ഞുനിർത്തുന്നത്. വലിയ നിലയിൽ ചാഞ്ചാടിക്കൊണ്ടിരിക്കുന്ന ഭക്ഷ്യ, ഇന്ധന വിലകളെ മാറ്റിനിർത്തിയുള്ള അടിസ്ഥാന പണപ്പെരുപ്പമാണ് കുറച്ചുകൂടി സ്ഥിരതയാർന്ന കണക്ക്. ഉയർന്ന വിലയ്ക്ക് ഉൽപന്നങ്ങൾ വാങ്ങാൻ ആളുണ്ട് എന്നതാണ് അടിസ്ഥാന പണപ്പെരുപ്പം കുറയാത്തതിന്റെ കാരണം.

ജനത്തിന്റെ വാങ്ങൽശേഷി കുറയുമ്പോൾ മാത്രമേ ഡിമാൻഡ് കുറയുകയും വിലക്കയറ്റം താഴുകയുമുള്ളൂ. അതുകൊണ്ടാണ് അടിസ്ഥാന പണപ്പെരുപ്പം കുറയാതെ സിപിഐ ഒരു പരിധിക്കപ്പുറം കുറയില്ല എന്ന് ആർബിഐ പറഞ്ഞുകൊണ്ടിരിക്കുന്നത്. 

∙ കുറയുമോ പണപ്പെരുപ്പം? 

കഴിഞ്ഞ നവംബറിൽ 5.88 ശതമാനമായിരുന്ന പണപ്പെരുപ്പം ഡിസംബറിൽ പ്രതീക്ഷിച്ചതിലും കുറഞ്ഞ് 5.72 ശതമാനത്തിലെത്തിയിരുന്നു. ഡിസംബറിൽ ഇതു തിരികെ 5.9 നിലവാരത്തിലേക്കുയരുമെന്ന ഭൂരിഭാഗം സാമ്പത്തിക വിദഗ്ധരുടെയും കണക്കുകൂട്ടൽ തെറ്റിച്ചുകൊണ്ടാണ് പണപ്പെരുപ്പം 6.52 ശതമാനത്തിലേക്കു കുതിച്ചുകയറിയത്. കഴിഞ്ഞ വർഷം ഇതേ കാലത്തെ ലോവർ ബേസ് ഇഫക്ട് ഈ വർധനയുടെ കാരണങ്ങളിലൊന്നാണെങ്കിലും ഇത്രവലിയ കയറ്റം ആരും പ്രതീക്ഷിച്ചിരുന്നില്ല. ഏപ്രിലിൽ നടക്കുന്ന അടുത്ത പണനയ സമിതി യോഗത്തിനു മുൻപ് ഫെബ്രുവരിയിലെ പണപ്പെരുപ്പ നിരക്കു കൂടി വരും. അവിടെയും ആശ്വാസം കാണുന്നില്ലെങ്കിൽ‌ ആർബിഐ പലിശനിരക്കു വർധന തുടരുമെന്ന് ഉറപ്പിക്കാം.

പലിശ വർധന എപ്പോൾ അവസാനിക്കുമെന്ന് പറയാൻ ആർബിഐ തയാറായില്ലെങ്കിലും പറഞ്ഞ കാര്യങ്ങളിൽ ചില സൂചനകളുണ്ട്. അടുത്ത സാമ്പത്തിക വർഷം പണപ്പെരുപ്പം കുറയുമെങ്കിലും 4 ശതമാനമെന്ന ലക്ഷ്യത്തിനു മുകളിലായിരിക്കുമെന്നാണ് ആർബിഐ വിലയിരുത്തൽ. 2022–23ലെ നാലാം പാദത്തിൽ ഇത് 5.7% ആയിരിക്കുമെന്നായിരുന്നു ആർബിഐ ഗവർണർ പറഞ്ഞത്. എന്നാൽ, ജനുവരിയിൽ 6.52 ശതമാനത്തിലേക്ക് ഉയർന്ന സ്ഥിതിക്ക് ഈ ലക്ഷ്യം സാധ്യമാകണമെങ്കിൽ ഫെബ്രുവരി, മാർച്ച് മാസങ്ങളിൽ പണപ്പെരുപ്പം 5.3% നിലവാരത്തിലേക്ക് താഴേണ്ടിവരും. ഇത് അത്ര എളുപ്പമാകുമെന്നു തോന്നുന്നില്ല.

അടുത്ത സാമ്പത്തിക വർഷത്തെ നാലു പാദങ്ങളിലായി പണപ്പെരുപ്പം യഥാക്രമം 5, 5.4, 5.4, 5.6 എന്നിങ്ങനെയാകുമെന്ന് ആർബിഐ പ്രതീക്ഷിക്കുന്നു. എന്നാൽ, ഇതിന് കാലവർഷം സാധാരണ നിലയിൽ ലഭിക്കണമെന്നും പറയുന്നു. കാർഷികോൽപാദനം തകിടം മറിയാതിരിക്കാനാണിത്. ക്രൂഡ് ഓയിൽ വില ഈ വർഷം ശരാശരി 95 ഡോളറിൽ നിൽക്കുമെന്ന പ്രതീക്ഷയിലാണ് ആർബിഐ പണപ്പെരുപ്പ ലക്ഷ്യം കണക്കുകൂട്ടുന്നത്. നിലവിൽ 85 ഡോളർ നിലവാരത്തിലാണ് ക്രൂഡ് ഓയിൽ. എന്നാൽ റഷ്യൻ ഓയിലിന് ജി7, യൂറോപ്യൻ യൂണിയൻ ഉപരോധം നിലനിൽക്കുന്നതിനാൽ ഇതിലും എത്രയോ കുറഞ്ഞ വിലയ്ക്കാണ് ഇന്ത്യയ്ക്ക് റഷ്യയിൽനിന്ന് ഓയിൽ ലഭിക്കുന്നത്. ഈ സാഹചര്യം തുടരുകയാണൈങ്കിൽ ഏറെ വൈകാതെ പണപ്പെരുപ്പം കുറഞ്ഞേക്കും.

നോമിനൽ ജിഡിപിയിലും നികുതി വരുമാനത്തിലുമൊക്കെയുള്ള പ്രതീക്ഷകളിൽ കേന്ദ്ര ബജറ്റ് മിതത്വം പാലിക്കുന്നുണ്ടെങ്കിലും ആർബിഐ കുറച്ചുകൂടി ഉയർന്ന ലക്ഷ്യങ്ങളാണ് മുന്നിൽ കാണുന്നത്. ജിഡിപി 273.08 ലക്ഷം കോടി രൂപയിൽനിന്ന് 10.5 ശതമാനം വളർന്ന് 301.75 കോടി രൂപയാകുമെന്നാണ് ബജറ്റ് കണക്കുകൂട്ടുന്നത്. എന്നാൽ നോമിനൽ ജിഡിപിയിൽ 11.7% വളർച്ചയുണ്ടാകുമെന്ന് ആർബിഐ പ്രതീക്ഷിക്കുന്നു. നികുതി വരുമാനം 10.44% വളരുമെന്നാണ് ബജറ്റ് കണക്കുകൂട്ടുന്നതെങ്കിലും ആർബിഐ സൂചിപ്പിച്ച പോലെ ജിഡിപിയിൽ വളർച്ച ലഭിച്ചാൽ നികുതി വരുമാനം 11.7 ശതമാനമായി ഉയർന്നേക്കാം. ഇതനുസരിച്ച് ധനക്കമ്മി ലക്ഷ്യമായ 5.9 ശതമാനമെന്നത് 5.8ലേക്കു കുറയാനും കാരണമാകും.

ഇന്ത്യൻ ബാങ്കുകൾ ശക്തമാണെന്നും അദാനി ഗ്രൂപ്പ് പ്രതിസന്ധി ബാങ്കുകളെ ബാധിക്കില്ലെന്നും ആർബിഐ വ്യക്തമാക്കിയിട്ടുണ്ട്. പലിശനിരക്കു വർധന അവസാനിപ്പിക്കാറായി എന്നുമാത്രം പറഞ്ഞില്ലെങ്കിലും മറ്റു കാര്യങ്ങളിലെല്ലാം ആർബിഐ ശുഭപ്രതീക്ഷയാണ് മുന്നോട്ടുവയ്ക്കുന്നത്.

∙ വളർച്ചാ ലക്ഷ്യം വെട്ടിക്കുറച്ച് അദാനി

വൻ വികസന പദ്ധതികളും വലിയ തോതിൽ മൂലധന ചെലവഴിക്കലുമായി മുന്നോട്ടു പോയിക്കൊണ്ടിരുന്ന അദാനി ഗ്രൂപ്പ് ഹിൻഡൻബർഗ് വിവാദത്തെ തുടർന്ന് തങ്ങളുടെ അതിവേഗ വളർച്ചാ ലക്ഷ്യവും മൂലധനച്ചലവുകളും വെട്ടിക്കുറച്ച്, കടങ്ങൾ പരമാവധി കുറച്ചുകൊണ്ടുവന്ന് നിക്ഷേപകവിശ്വാസം വീണ്ടെടുക്കാനുള്ള ശ്രമത്തിലാണ്. വരുമാനത്തിൽ 40% വാർഷിക വർധന ലക്ഷ്യമിട്ടിരുന്ന അദാനി ഗ്രൂപ്പ് അത് അടുത്ത വർഷത്തേക്ക് 15–20% ആയി വെട്ടിക്കുറച്ചതായി ബ്ലൂംബർഗ് റിപ്പോർട്ട് ചെയ്യുന്നു. മൂഡീസ് റേറ്റിങ് ഏജൻസി അദാനി ഗ്രീൻ ഉൾപ്പെടെ ഗ്രൂപ്പിലെ നാലു കമ്പനികളുടെ റേറ്റിങ് വെട്ടിക്കുറയ്ക്കുകയും ചെയ്തു. ഇതോടെ തിങ്കളാഴ്ച അദാനി ഗ്രൂപ്പിലെ എല്ലാ കമ്പനികളുടെയും ഓഹരിവിലയിൽ കനത്ത ഇടിവു നേരിട്ടു. അദാനി എന്റർപ്രൈസസ് 7% ഇടിഞ്ഞപ്പോൾ അദാനി പോർട്സ്, അദാനി പവർ, അദാനി ഗ്രീൻ, അദാനി ട്രാൻസ്മിഷൻ. അദാനി ടോട്ടൽ ഗ്യാസ്, അദാനി വിൽമർ, അംബുജ സിമന്റ്, എൻഡി ടിവി എന്നിവ 5% വീതം ഇടിഞ്ഞു. പലതും ലോവർ സർക്യൂട്ട് പരിധിയിൽ ലോക്ക് ആയിരുന്നതിനാൽ കൂടുതൽ നഷ്ടം ഒഴിവവാകുകയായിരുന്നു. എസിസി സിമന്റിന്റെ നഷ്ടം 3 ശതമാനമാണ്.

അദാനി ഗ്രൂപ്പ് വിവാദങ്ങളുടെ പശ്ചാത്തലത്തിൽ ഓഹരി നിക്ഷേപകരുടെ പരിരക്ഷയ്ക്കായി വിദഗ്ധ സമിതി രൂപീകരിക്കണമെന്ന സുപ്രീം കോടതിയുടെ നിർദേശത്തോടു കേന്ദ്രം യോജിപ്പ് അറിയിച്ചു. എന്നാൽ, സെബി പോലുള്ള ഏജൻസികൾക്ക് സമിതിയുടെ മേൽനോട്ടം ആവശ്യമാണെന്നു വരുന്നത് വിപണിയെ ബാധിച്ചേക്കാമെന്ന ആശങ്കയും പങ്കുവച്ചു. 

സമിതിയുടെ പ്രവർത്തനമേഖല നിർദേശിക്കാൻ സർക്കാരിനെ അനുവദിക്കണമെന്നും അംഗങ്ങളുടെ പേര് മുദ്രവച്ച കവറിൽ നൽകാമെന്നുമാണ് സർക്കാർ കോടതിയെ അറിയിച്ചത്. ബജറ്റിനു ശേഷം സെബിയുമായി ധനമന്ത്രി നടത്തുന്ന പതിവു യോഗം ബുധനാഴ്ചയാണ്. ഈ യോഗത്തിൽ അദാനി വിഷയവും ചർച്ചയായേക്കും. 

അദാനി ഗ്രൂപ്പുമായി ബന്ധപ്പെട്ട് അനുകൂലവും പ്രതികൂലവുമായ വാർത്തകളുടെ പ്രളയമാണ് കുറച്ചു ദിവസങ്ങളിലായി കാണുന്നത്. അദാനി ഗ്രൂപ്പ് പണയം വച്ചിരുന്നതിൽ 114 കോടി ഡോളറിന്റെ ഓഹരികൾ തിരിച്ചുവാങ്ങിയതിനു പിന്നാലെ അദാനി പോർട്ടിന്റെ 5,000 കോടി രൂപയുടെ കടം കാലാവധിക്കു മുന്നേ തിരിച്ചടയ്ക്കാനും തീരുമാനിച്ചുവെന്നത് ഇതിലൊന്നാണ്.