ആറ്റിങ്ങലങ്കത്തിൽ കരുത്തർ നേർക്കുനേർ; ആരു നേടും?

1984ലും ’89ലും മണ്ഡലം കോൺഗ്രസിലെ തലേക്കുന്നിൽ ബഷീറിനൊപ്പം നിന്നു; 1989ൽ തോൽപിച്ചത് സിപിഎമ്മിന്റെ പ്രബല നേതാവ് സുശീല ഗോപാലനെ. 1991ൽ തലേക്കുന്നിലിനെ തോൽപിച്ച് സുശീല ഗോപാലൻ മണ്ഡലം തിരികെപ്പിടിച്ച ശേഷം കോൺഗ്രസ് ഇവിടെ ജയിച്ചിട്ടേയില്ല. മൂന്നു തവണ വീതം വർക്കല രാധാകൃഷ്ണനും എ.സമ്പത്തും വിജയക്കൊടി പാറിച്ചു. കോൺഗ്രസിന്റെ സംഘടനാശക്തി ദുർബലമായതും എൽഡിഎഫ് വിജയങ്ങൾക്കു പിന്നിലെ ഘടകങ്ങളിലൊന്നാണ്. എന്നാൽ, ഇക്കുറി മണ്ഡലം മാറിച്ചിന്തിക്കുമെന്ന വലിയ പ്രതീക്ഷ യുഡിഎഫിനുണ്ട്. 

ബലാബലത്തിൽ ആര് ?

കഴിഞ്ഞ 7 തിരഞ്ഞെടുപ്പുകളിലെ തുടർച്ചയായ വിജയവും നിയമസഭാ മണ്ഡലങ്ങളിലെ മേൽക്കോയ്മയും കൊണ്ടുതന്നെ, എൽഡിഎഫ് തങ്ങളുടെ അടിയുറച്ച മണ്ഡലമാക്കി ആറ്റിങ്ങലിനെ മാറ്റിയെടുത്തു എന്നതാണ് സമ്പത്തിന്റെ ആത്മവിശ്വാസം കൂട്ടുന്നത്. കെ.അനിരുദ്ധന്റെ മകനെന്ന വാൽസല്യവും ജനങ്ങൾക്കുണ്ട്. വിളിപ്പുറത്തുള്ള എംപിയെന്ന ജനകീയത കൂടി വോട്ടായി മാറുമെന്നാണ് എൽഡിഎഫ് പ്രതീക്ഷ. 

എന്നാൽ, മൂന്നുവട്ടം മണ്ഡലത്തെ പ്രതിനിധീകരിച്ചിട്ടും കാര്യമായ നേട്ടങ്ങളൊന്നും എടുത്തുപറയാനില്ലാതെയാണ് സമ്പത്ത് എത്തുന്നതെന്ന വിമർശനം എതിർപക്ഷം ശക്തമായി ഉയർത്തുന്നു. ദേശീയപാതയിൽ ആറ്റിങ്ങലിലെയും എംസി റോഡിൽ‌ വെഞ്ഞാറമൂട്ടിലെയും ഗതാഗതക്കുരുക്കിനു പരിഹാരമാകാത്തത് എംപിക്കും സംസ്ഥാന സർക്കാരിനുമെതിരെ യുഡിഎഫ് ആയുധമാക്കുന്നു. 

ഏതു പ്രതിസന്ധിയും തരണം ചെയ്ത് വോട്ടു നേടാനുള്ള അടൂർ പ്രകാശിന്റെ നൈപുണ്യമാണ് യുഡിഎഫിനു വലിയ പ്രതീക്ഷ പകരുന്നത്. ഒരു പരിധിവരെ എതിരാളിയുടെ കുത്തകയായിരുന്ന സാമുദായിക വോട്ടുകളിൽ‌ അടൂർ പ്രകാശ് വലിയ വിള്ളൽ‌ വീഴ്ത്തിയേക്കാം. പ്രകാശിന്റെ വരവോടെ മണ്ഡലത്തിൽ യുഡിഎഫിനു കെട്ടുറപ്പുമേറി.