പ്രണബ്: നിലപാടുകളിൽ ഉറച്ച ജനാധിപത്യവാദി

ന്യൂഡൽഹി∙ ആർഎസ്എസിന്റെ ആസ്ഥാനത്തു ചെന്നു കോൺഗ്രസിന്റെ നിലപാടുകൾ വ്യക്തമായി പറഞ്ഞ കോൺഗ്രസുകാരനായിരുന്നു പ്രണബ് മുഖർജി. ആർഎസ്എസ് ചടങ്ങിൽ മുഖ്യാതിഥിയായി 2018ൽ പങ്കെടുത്തപ്പോഴായിരുന്നു ഇത്.

ആർഎസ്എസ് ചടങ്ങിൽ പ്രണബ് പങ്കെടുക്കുന്നതിനെതിരെ കോൺഗ്രസിൽ വലിയ എതിർപ്പുണ്ടായിരുന്നു. ജയ്റാം രമേഷ്, ജാഫർ ഷെരീഫ് തുടങ്ങിയ നേതാക്കൾ മുതൽ പ്രണബിന്റെ മകൾ ശർമിഷ്ഠ വരെ അതിനെതിരെ പരസ്യമായി രംഗത്തു വന്നു. എങ്കിലും പ്രണബ് തീരുമാനം മാറ്റിയില്ല.

പ്രണബ് ബിജെപിയിലേക്കു പോകുമെന്നു സമൂഹമാധ്യമങ്ങളിൽ അപ്പോഴേക്കും ചിലർ പ്രചാരണം തുടങ്ങിയിരുന്നു. മറ്റു ചില മാധ്യമങ്ങളിലും വാർത്തകൾ വന്നു. പക്ഷേ പ്രണബിന്റെ നിലപാടുകൾ കൃത്യമായിരുന്നു. ആർഎസ്എസിന്റെ പതാക ഗാനമുയർന്നപ്പോൾ വേദിയിലുള്ളവരടക്കം നെഞ്ചിൽ കൈവച്ച് അഭിവാദ്യമർപ്പിച്ചു നിന്നു. എഴുന്നേറ്റു നിന്ന പ്രണബ് കൈകൾ താഴ്ത്തിയിട്ടു നിസംഗനായി നിന്നു. പങ്കാളിയായല്ല, സ്വന്തം നിലപാടുകളുള്ള ജനാധിപത്യവാദിയായ അതിഥിയാണെന്ന പ്രഖ്യാപനം കൂടിയായിരുന്നു അത്.

അസഹിഷ്ണുത ഭാരതത്തിന്റെ ദേശീയ സ്വത്വത്തെ തകർക്കുമെന്ന് പ്രസംഗത്തിൽ പ്രണബ് അസന്ദിഗ്ധമായി പറഞ്ഞു. ‘സഹിഷ്ണുതയിൽ നിന്നാണ് നമ്മൾ കരുത്താർജിക്കുന്നത്. ബഹുസ്വരതയെ നാം അംഗീകരിക്കുന്നു. വൈവിധ്യം നാം ആഘോഷമാക്കുന്നു. ഇന്ത്യയുടെ ആത്മാവ് ഈ ബഹുസ്വരതയിലാണ്. മതമോ ദേശമോ വെറുപ്പോ അസഹിഷ്ണുതയോ അടിസ്ഥാനമാക്കി ദേശീയതയെ നിർവചിക്കുന്നത് നമ്മുടെ സ്വത്വത്തെ നശിപ്പിക്കും’ പ്രണബ് പറഞ്ഞു.

ഭരണഘടനയാണു രാഷ്ട്രത്തിന്റെ അടിത്തറ. ജനാധിപത്യമാണു ദാരിദ്ര്യത്തെ മറികടക്കാനുള്ള വഴികാട്ടി. ജനാധിപത്യം സമ്മാനമല്ല, വിശുദ്ധമായ വിശ്വാസമാണ്. ഭരണഘടനയിൽനിന്നാണു നമ്മുടെ ദേശീയത പ്രവഹിക്കുന്നതെന്നും ഇന്ത്യൻ ദേശീയത ഭരണഘടനാധിഷ്ഠിതമായ രാജ്യസ്നേഹമാണെന്നും അദ്ദേഹം പ്രഖ്യാപിച്ചു.