ശബരിപാത: കാൽനൂറ്റാണ്ട് പിന്നിട്ട കാത്തിരിപ്പ് ; വികസനം കൂകിപ്പായാൻ വഴി കാണണം

തീർഥാടകർക്ക്  മാത്രമല്ല ഗുണം

ശബരിമല തീർഥാടകർക്കുവേണ്ടി മാത്രമാണു ശബരിപാതയെന്ന ചിന്ത ശരിയല്ല. മധ്യകേരളത്തിൽനിന്നു തുടങ്ങി ഏറെ ജനസംഖ്യയുള്ള ഇടനാട്ടിലൂടെയാണു പാത കടന്നുപോകുന്നത്. ഓരോ 15–20 കിലോമീറ്ററിനിടയിലും പട്ടണങ്ങളുണ്ട്. കാലടി, പെരുമ്പാവൂർ, കോതമംഗലം, മൂവാറ്റുപുഴ, വാഴക്കുളം, തൊടുപുഴ, പാലാ, കാഞ്ഞിരപ്പള്ളി മേഖലകളിലെ ജനങ്ങൾക്കു ട്രെയിൻ യാത്രാസൗകര്യവും വ്യവസായങ്ങൾക്കു കുറഞ്ഞചെലവിൽ രാജ്യത്തിന്റെ ഏതുകോണിലേക്കും ചരക്കുനീക്കവും സാധ്യമാകും. മൂന്നാർ, അടിമാലി, കട്ടപ്പന, കുമളി, തേക്കടി, വാഗമൺ, കുട്ടിക്കാനം, ഏലപ്പാറ, പീരുമേട്, നെടുങ്കണ്ടം, രാമക്കൽമേട് തുടങ്ങിയ മേഖലകൾക്കും ഏറെ പ്രയോജനം ചെയ്യും. എരുമേലിയിൽനിന്നു പാത റാന്നി, പത്തനംതിട്ട, കോന്നി, പത്തനാപുരം, പുനലൂർ, അഞ്ചൽ, കടയ്ക്കൽ, നെടുമങ്ങാട്, കഴക്കൂട്ടം വഴി തിരുവനന്തപുരത്തേക്കു നീട്ടുമ്പോൾ പുനലൂരിൽ, കൊല്ലം–ചെങ്കോട്ട–ചെന്നൈ പാതയുമായാണു ചേരുക. ഇതോടെ മധ്യകേരളത്തിൽനിന്നു തെങ്കാശി, മധുര, സേലം, ഹൊസൂർ വഴി ബെംഗളൂരു, ഹൈദരാബാദ് സർവീസുകൾ ഓടിക്കാൻ കഴിയും. പെരുമ്പാവൂരിൽ ലക്ഷക്കണക്കിന് ഇതരസംസ്ഥാന തൊഴിലാളികൾ ഉള്ളതിനാൽ ഹൗറയിൽ നിന്നും ഗുവാഹത്തിയിൽ നിന്നും പെരുമ്പാവൂരിലേക്കും മൂവാറ്റുപുഴയിലേക്കും ട്രെയിനുകൾ എത്തും. ഇതു പാതയിൽ ശബരിമല സീസണിൽ അല്ലാതെ മറ്റു സമയങ്ങളിലും വരുമാനം ഉറപ്പാക്കും. 

ശബരിപാതയ്ക്കൊപ്പം എരുമേലി– പുനലൂർ– തിരുവനന്തപുരം പാതയ്ക്കായി റെയിൽവേ ഒന്നിലേറെ സർവേ നടത്തിയിരുന്നു. പല സർവേകളും പേരിനു മാത്രമായിരുന്നതിനാൽ കൃത്യമായ വിവരശേഖരണം നടന്നിട്ടില്ല. 10 വർഷം മുൻപുണ്ടായിരുന്ന സാഹചര്യമല്ല ഇപ്പോൾ. നിർദിഷ്ട എരുമേലി വിമാനത്താവളം, 50,000ൽ കൂടുതൽ ജനസംഖ്യയുള്ളതിനാൽ റെയിൽ കണക്ടിവിറ്റി നൽകേണ്ട പട്ടണങ്ങളുടെ പട്ടികയിൽ ഇടംനേടിയ നെടുമങ്ങാട് എന്നിവ ശബരിപാതയ്ക്കു മുൻപില്ലാത്ത സാധ്യതകളാണു തുറക്കുന്നത്. 

പല പട്ടണങ്ങളിൽ ഉയരും ചൂളംവിളി 

എരുമേലി– തിരുവനന്തപുരം പാതയുടെ പുതിയ സർവേക്കായി കേരളം സമ്മർദം ശക്തമാക്കണം. ശബരിപാതയുമായി താരതമ്യം ചെയ്താൽ പാലങ്ങൾ കുറവായതിനാൽ പുനലൂർ– തിരുവനന്തപുരം പാതയ്ക്കു നിർമാണച്ചെലവു കുറവായിരിക്കും. റെയിൽവേ പദ്ധതികളിൽ പാലങ്ങളുടെ നിർമാണത്തിനാണ് ചെലവു കൂടുതൽ. എരുമേലിയിൽ എത്തുന്ന ശബരി പാത കഴക്കൂട്ടത്തേക്കു (തിരുവനന്തപുരം) നീട്ടിയാൽ റെയിൽവേ കടന്നുചെന്നിട്ടില്ലാത്ത ഒട്ടേറെ പട്ടണങ്ങൾ രാജ്യത്തിന്റെ റെയിൽവേ ഭൂപടത്തിൽ ഇടംപിടിക്കും. പത്തനംതിട്ട, കൊല്ലം, തിരുവനന്തപുരം ജില്ലകളിലെ മലയോര മേഖലകളുടെ വികസനത്തിനും പാത മുതൽക്കൂട്ടാകും. കഴക്കൂട്ടം റെയിൽവേ സ്റ്റേഷൻ, ജംക്‌ഷൻ സ്റ്റേഷനായി വികസിക്കുകയും കൂടുതൽ ട്രെയിനുകൾ അവിടെ നിർത്തുകയും ചെയ്യുന്നതു ടെക്നോപാർക്ക് ഉൾപ്പെടെ ഐടി മേഖലയിൽ ജോലി ചെയ്യുന്നവരുടെ യാത്രാസൗകര്യം മെച്ചപ്പെടുത്തും.

(ദക്ഷിണ റെയിൽവേ, നിർമാണ വിഭാഗം മുൻ ചീഫ് അഡ്മിനിസ്ട്രേറ്റീവ് ഓഫിസറും കൊച്ചി മെട്രോ മുൻ പ്രോജക്ട് ഡയറക്ടറുമാണ് ലേഖകൻ)

English Summary : Writeup about Sabari Rail