മുതിർന്ന പൗരന്മാരുടെ നിക്ഷേപ പദ്ധതിയിൽ ഇനി 30 ലക്ഷം വരെ

ന്യൂഡൽഹി ∙ മുതിർന്ന പൗരന്മാർക്കുള്ള നിക്ഷേപ പദ്ധതിയിൽ (എസ്‍സിഎസ്എസ്) നിക്ഷേപിക്കാനുള്ള തുക ഇന്നുമുതൽ ഇരട്ടിയാകുന്നതോടെ 30 ലക്ഷം രൂപ 5 വർഷത്തേക്കു നിക്ഷേപിക്കുന്നയാൾക്കു 3 മാസം കൂടുമ്പോൾ 61,500 രൂപ പലിശ കിട്ടും; മാസം 20,500 രൂപ. 15 ലക്ഷമായിരുന്ന നിക്ഷേപപരിധി ബജറ്റിലാണു 30 ലക്ഷമാക്കിയത്.

പ്രതിമാസ വരുമാന പദ്ധതിയിൽ (എംഐഎസ്) വ്യക്തിഗത അക്കൗണ്ടിൽ നിക്ഷേപിക്കാവുന്ന തുക 4.5 ലക്ഷത്തിൽനിന്ന് 9 ലക്ഷമാക്കിയിട്ടുണ്ട്. ജോയിന്റ് അക്കൗണ്ടിൽ 9 ലക്ഷത്തിനു പകരം 15 ലക്ഷം നിക്ഷേപിക്കാം. ഇതനുസരിച്ച് 5 വർഷത്തേക്ക് 15 ലക്ഷം രൂപ നിക്ഷേപിച്ചാൽ മാസം 9250 രൂപ പലിശ കിട്ടും.

60 വയസ്സ് കഴിഞ്ഞവർക്കും 55 കഴിഞ്ഞ് ജോലിയിൽനിന്നു വിരമിച്ചവർക്കും മുതിർന്ന പൗരന്മാർക്കുള്ള സീനിയർ സിറ്റിസൻസ് സേവിങ് സ്കീമിന്റെ ഭാഗമാകാം. മച്യുരിറ്റി കാലയളവ് 5 വർഷം. ഇതു വേണമെങ്കിൽ 3 വർഷം നീട്ടാം. മിനിമം നിക്ഷേപത്തുക 1000 രൂപ.

മഹിള സമ്മാൻ സമ്പാദ്യ പദ്ധതി ഇന്നു മുതൽ

ന്യൂഡൽഹി ∙ സ്വാതന്ത്ര്യത്തിന്റെ 75–ാം വാർഷികത്തോടനുബന്ധിച്ച് മഹിള സമ്മാൻ സേവിങ്സ് സർട്ടിഫിക്കറ്റ് എന്ന സമ്പാദ്യപദ്ധതി ആരംഭിച്ചു. 2 ലക്ഷം രൂപ വരെ ഇതിൽ നിക്ഷേപിക്കാം. 2 വർഷം കാലാവധി. 7.5% പലിശനിരക്ക്. പദ്ധതിയുടെ ഭാഗമാകാൻ 2025 മാർച്ച് 31ന് മുൻപ് അപേക്ഷിക്കണം. അപേക്ഷ നൽകുന്നത് വനിതയായിരിക്കണം. പെൺകുട്ടിയാണെങ്കിൽ രക്ഷിതാവിന് അപേക്ഷിക്കാം. മിനിമം നിക്ഷേപം 1,000 രൂപയാണ്. 

അക്കൗണ്ട് തുടങ്ങി ഒരുവർഷം പൂർത്തിയായാൽ 45% വരെ തുക പിൻവലിക്കാം. ബാങ്ക് വഴിയോ പോസ്റ്റ് ഓഫിസ് വഴിയോ സ്കീമിന്റെ ഭാഗമാകാം. വിവരങ്ങൾക്ക്: bit.ly/mahilasam

English Summary : 30 lakhs maximum limit in Senior Citizen saving schemes