ഒരു രാജ്യം, ഒറ്റത്തിരഞ്ഞെടുപ്പ്: ഒന്നിച്ചാക്കുമ്പോൾ കൈ പൊള്ളും

ന്യൂഡൽഹി ∙ എല്ലാവരും വോട്ടു രേഖപ്പെടുത്തുന്ന ഇലക്ട്രോണിക് വോട്ടിങ് യന്ത്രത്തിന് (ഇവിഎം) വിവിപാറ്റ് അടക്കം ഒന്നിന് എത്ര രൂപയാകും? ഇപ്പോഴത്തെ നിരക്കിൽ 33,935 രൂപയെന്നാണു തിരഞ്ഞെടുപ്പു കമ്മിഷൻ അറിയിച്ചത്. ഇതും മറ്റു ചില ഘടകങ്ങളും കണക്കിലെടുക്കുമ്പോൾ 2029 ൽ രാജ്യത്തു തിരഞ്ഞെടുപ്പുകൾ ഒന്നിച്ചാക്കാൻ ഇവിഎമ്മിനു മാത്രം 7,951 കോടി രൂപ അധികച്ചെലവു വരും.

തിരഞ്ഞെടുപ്പുകൾ ഒന്നിച്ചാക്കുന്നതുമായി ബന്ധപ്പെട്ട സമിതിക്ക് കമ്മിഷൻ നൽകിയ മറുപടിയിലാണ് ഇക്കാര്യങ്ങളുള്ളത്. ബാലറ്റ് യൂണിറ്റ്, കൺട്രോൾ യൂണിറ്റ്, വിവിപാറ്റ് എന്നിങ്ങനെ 3 ഘടകങ്ങളാണ് ഇവിഎമ്മിലുള്ളത്. 2029 ൽ രാജ്യത്താകെ 13.57 ലക്ഷം പോളിങ് ബൂത്തുകൾ ഉണ്ടാകാമെന്ന അനുമാനത്തിൽ, ഒന്നിച്ച് വോട്ടെടുപ്പിന് 1.16 കോടി ഇവിഎം ആവശ്യമാണ്. ഓരോ 15 വർഷം കൂടുമ്പോഴും ഇവ മാറ്റേണ്ടതുണ്ട്. ഇത്തരത്തിൽ കാലഹരണപ്പെട്ടതു മാറ്റുമ്പോൾ, 2029 ൽ 62.13 ലക്ഷം ഇവിഎമ്മുകൾ കൂടി ലഭ്യമാകണം. ഇതിനു ജിഎസ്ടി അടക്കം 7,951 കോടി രൂപ വേണം.

വേറെയും കടമ്പകൾ

∙ പോളിങ് സ്റ്റേഷനുകളുടെ എണ്ണം 15% വർധിക്കാം.

∙ ചിപ്പുകളുടെ ദൗർലഭ്യം കൂടി കണക്കിലെടുത്തുള്ള തയാറെടുപ്പു വേണ്ടിവരും.

∙ യന്ത്രത്തിന്റെ ഉൽപാദകരായ ഇലക്ട്രോണിക്സ് കോർപറേഷൻ ഓഫ് ഇന്ത്യ ലിമിറ്റഡിന്റെയും ഭാരത് ഇലക്ട്രോണിക്സിന്റെയും ശേഷി വർധിപ്പിക്കണം.