ഡോക്ടർമാർ ക്രിക്കറ്റ് കളിച്ചു; ചികിത്സ കിട്ടാതെ ബാലിക മരിച്ചു

ബുദൗൻ (യുപി) ∙ കടുത്ത പനിയുമായി ഗവൺമെന്റ് മെഡിക്കൽ കോളജ് ആശുപത്രിയിൽ പ്രവേശിപ്പിച്ച 5 വയസ്സുകാരി മരിച്ചത് വിവാദമായി. ഡോക്ടറും ആശുപത്രി ജീവനക്കാരും ക്രിക്കറ്റ് കളിക്കുകയായിരുന്നതിനാൽ കുട്ടിക്ക് ചികിത്സ ലഭിച്ചില്ലെന്നു വീട്ടുകാർ ആരോപിച്ചതിനെ തുടർന്ന് അന്വേഷിക്കാൻ മൂന്നംഗസമിതിയെ നിയോഗിച്ചു.

ബുധനാഴ്ച ഉച്ചതിരിഞ്ഞാണു സോഫിയ എന്ന ബാലികയെ പിതാവ് നസീം ആശുപത്രിയിലെത്തിച്ചത്. എന്നാൽ, ആ സമയത്ത് അവിടെ കുട്ടികളുടെ ഡോക്ടർ ഉണ്ടായിരുന്നില്ല. പല മുറികളിലേക്കു പറഞ്ഞുവിട്ടെങ്കിലും ഒരിടത്തും ഡോക്ടറോ ജീവനക്കാരോ ഉണ്ടായിരുന്നില്ലെന്ന് നസീം പറഞ്ഞു. കുട്ടിയുമായി മടങ്ങുമ്പോൾ ഡോക്ടർമാരും ആശുപത്രി ജീവനക്കാരും ക്രിക്കറ്റ് കളിക്കുന്നതു കണ്ടെന്നും നസീം ആരോപിച്ചു.