6.9 കിലോമീറ്റർ തുരങ്കം നിർമിക്കുന്നു; താമരശ്ശേരി ചുരം കയറാതെ വയനാട്ടിലെത്താം

12 കിലോമീറ്റർ ചുരത്തിലെ 9 ഹെയർപിൻ വളവുകളിൽ വാഹനങ്ങൾ കുരുങ്ങുന്നതു മൂലം ഗതാഗതക്കുരുക്ക് പതിവാണ്. മഴക്കാലത്തെ മണ്ണിടിച്ചിലും പ്രതിസന്ധിയായിരുന്നു. ഇവ പരിഹരിക്കപ്പെടും. 30 വർഷങ്ങൾക്കപ്പുറത്ത് യാഥാർഥ്യമാവുമെന്നു പ്രതീക്ഷിക്കുന്ന നിർദിഷ്ട കൊച്ചി–ബെംഗളൂരു ചരക്കുപാതയുടെ ഭാഗമായി ഈ പാത മാറും.

തുരങ്കപാതയായതിനാൽ വനമേഖല നശിപ്പിക്കപ്പെടില്ല. 7.82 കിലോമീറ്റർ ദൂരം വരുന്ന ബദൽപാതയിൽ സ്വർഗംകുന്നു മുതൽ കള്ളാടി വരെ 6.9 കിലോമീറ്റർ തുരങ്കപാതയാകും.

വഴി ഇങ്ങനെ

∙ കോഴിക്കോട്ടുനിന്ന് കുന്നമംഗലം, എൻഐടി, അഗസ്ത്യൻമുഴി, തിരുവമ്പാടി, പുല്ലൂരാംപാറ വഴി ആനക്കാംപൊയിലിൽ എത്താം.

∙ നിലമ്പൂരിൽനിന്നുള്ള മലയോര ഹൈവേയിലൂടെ കക്കാടംപൊയിൽ, കൂടരഞ്ഞി, പുല്ലൂരാംപാറ വഴി ആനക്കാംപൊയിൽ എത്താം.

∙ കൊയിലാണ്ടി ഭാഗത്തുനിന്നുള്ളവർ‍ക്കു താമരശ്ശേരി ചുങ്കം, കോടഞ്ചേരി വഴി ആനക്കാംപൊയിൽ എത്താം.