പ്ലാറ്റിനം ജൂബിലിപ്രഭയിൽ ലീഗ്; ഇന്ന് പ്രതിനിധി സമ്മേളനം

ചെന്നൈ ∙ഏഴരപ്പതിറ്റാണ്ടിന്റെ അനുഭവങ്ങളെ ഭാവിയിലേക്കു കുതിക്കാനുള്ള കരുത്താക്കി രാജ്യത്തിന്റെ വിവിധ ഭാഗങ്ങളിൽ നിന്നുള്ള മുസ്‌ലിം ലീഗ് നേതാക്കളും പ്രവർത്തകരും ഇന്നും നാളെയും ചെന്നൈയിൽ സംഗമിക്കുന്നു. പാർട്ടി രൂപീകരണത്തിന്റെ പ്ലാറ്റിനം ജൂബിലി ആഘോഷം ചരിത്രത്തിലെ നാഴികക്കല്ലാക്കി മാറ്റാൻ നഗരമൊരുങ്ങി.

കെഎംസിസി സംഘടിപ്പിച്ച സമൂഹ വിവാഹത്തോടെയാണ് ഇന്നലെ ആഘോഷങ്ങൾക്കു തുടക്കമായത്. കലൈവാനർ അരങ്ങത്തിൽ ഇന്ന് നടക്കുന്ന പ്രതിനിധി സമ്മേളനത്തിൽ രാജ്യത്തിന്റെ വിവിധ ഭാഗങ്ങളിൽ നിന്നായി 1600 പേർ പങ്കെടുക്കും. ഇതിൽ 600 പേർ കേരളത്തിൽ നിന്നാണ്. അഖിലേന്ത്യാ പ്രസിഡന്റ് കെ.എം.ഖാദർ മൊയ്തീൻ, ജനറൽ സെക്രട്ടറി പി.കെ.കുഞ്ഞാലിക്കുട്ടി, ഓർഗനൈസിങ് സെക്രട്ടറി ഇ.ടി.മുഹമ്മദ് ബഷീർ ഉൾപ്പെടെയുള്ള നേതാക്കൾ പ്രതിനിധി സമ്മേളനത്തെ അഭിസംബോധന ചെയ്യും. തുടർന്ന് പാർട്ടി പോഷക സംഘടനകളുടെ സമ്മേളനങ്ങൾ നടക്കും. സമ്മേളനത്തിനായി നേതാക്കളെല്ലാം ചെന്നൈയിലെത്തി. 

75 വർഷം മുൻപ് പാർട്ടി പിറന്ന രാജാജി ഹാളിൽ സ്മരണ പുതുക്കാൻ നാളെ ദേശീയ കൗൺസിൽ യോഗം ചേരും. തുടർന്ന് നഗരത്തെ ഹരിതവർണമണിയിച്ച് ലക്ഷം പേർ പങ്കെടുക്കുന്ന പൊതുസമ്മേളനം നടക്കും. ഇതിനായി കേരളത്തിൽ നിന്നുൾപ്പെടെ പ്രവർത്തകർ ഇന്നു മുതൽ ചെന്നൈയിലേക്കു തിരിക്കും.

മലബാർ മേഖലയിലെ പ്രവർത്തകർക്കായി ഏർപ്പെടുത്തിയ സ്പെഷൽ ട്രെയിൻ ഇന്നു കാസർകോട് നിന്നു യാത്ര തുടങ്ങും. കൊട്ടിവാക്കം വൈഎംസിഎ മൈതാനത്ത് തമിഴ്നാട് മുഖ്യമന്ത്രി എം.കെ.സ്റ്റാലിൻ ഉദ്ഘാടനം ചെയ്യുന്ന പൊതുസമ്മേളനത്തിൽ ഒരു ലക്ഷം പേർ പങ്കെടുക്കുമെന്നാണു പാർട്ടിയുടെ കണക്ക്. ഇതിൽ കാൽ ലക്ഷത്തോളം പേർ കേരളത്തിൽ നിന്നായിരിക്കും.

English Summary: Muslim league platinum jubilee