മുന്നണികളുടെ വിലയിരുത്തൽ ഇങ്ങനെ; പോളിങ് 75% കടന്നേക്കും

തിരുവനന്തപുരം ∙ രാജ്യത്തിന്റെ മറ്റിടങ്ങളിൽ ഒന്നാം ഘട്ട വോട്ടെടുപ്പിൽ പോളിങ് താഴ്ന്നതോടെ കേരളത്തിലെ മുന്നണികളും ഉദ്വേഗത്തിൽ. പരമാവധി വോട്ടർമാരെ ഇന്ന് ബൂത്തിലെത്തിക്കാൻ ജാഗ്രത കാണിക്കണമെന്ന് 3 മുന്നണികളും പ്രവർത്തകർക്ക് നിർദേശം നൽകി. 

ഒന്നാംഘട്ട വോട്ടെടുപ്പിൽ 5.86% വോട്ടാണ് കുറഞ്ഞത്; പോളിങ്– 63.89%. വോട്ടെടുപ്പ് നടന്ന 102 സീറ്റുകളിൽ 93 ഇടത്തും വോട്ടു കുറഞ്ഞു. തമിഴ്നാട്ടിൽ 3 ശതമാനത്തോളം താഴ്ന്നു. തിരുവനന്തപുരത്തിന്റെ അയൽ മണ്ഡലമായ കന്യാകുമാരിയിൽ 5.38 ലക്ഷം പേർ വോട്ടു ചെയ്യാനെത്തിയില്ല. 

ഈ കണക്കാണ് പാർട്ടികളിൽ ആധിയുണ്ടാക്കിയത്. എന്നാൽ കേരളത്തിൽ അങ്ങനെയുണ്ടാവില്ലെന്നാണ് 3 മുന്നണികളും കരുതുന്നത്. കഴിഞ്ഞ ലോക്സഭാ തിരഞ്ഞെടുപ്പി‍ൽ കേരളം വർധിതാവേശത്തോടെയാണ് ബൂത്തിലെത്തിയത്– 77.84%. നിയമസഭാ തിരഞ്ഞെടുപ്പിൽ 74.06% ആയി. ഇത്തവണ പോളിങ് ഉറപ്പായും 75% കടക്കുമെന്ന വിലയിരുത്തലിലാണ് മുന്നണികൾ.

തിരഞ്ഞെടുപ്പ് കമ്മിഷൻ 18–30 വയസ്സ് പ്രായമുള്ളവരുടെ വോട്ട് ഉറപ്പിക്കാനുള്ള ബോധവൽക്കരണ പരിപാടികൾ നടത്തിയിരുന്നു. കേരളത്തിലും അത്തരം പരിപാടികൾ ഇന്നലെ വരെ തുടർന്നു. രാജ്യത്തിനു പുറത്തുനിന്ന് ഉറപ്പുള്ള വോട്ടർമാരെ എത്തിക്കാനുളള ശ്രമങ്ങൾ വരെ പാർട്ടികളും നടത്തിയിട്ടുണ്ട്.