പഠിച്ച് കേറിവാ; ഈ സ്കൂളിൽ ഒന്നാം ക്ലാസിൽ ചേർന്നവരെല്ലാം ബംഗാളിക്കുട്ടികൾ

തൃക്കരിപ്പൂർ (കാസർകോട്) ∙ അതിരുകടന്ന്, കായൽ കടന്ന് കുഞ്ഞിക്കുടകളും വിടർന്ന പുഞ്ചിരിയുമായി 6 അതിഥികൾ എത്തിയപ്പോൾ, സ്കൂൾ ഒരുപാട് ‘ഹാപ്പി’യായിട്ടുണ്ടാകും. വലിയപറമ്പ് തയ്യിൽ സൗത്ത് കടപ്പുറം ജിഎൽപി സ്കൂളിൽ ഒന്നാം ക്ലാസിലേക്ക് ഇക്കുറി പ്രവേശനം നേടിയത് 6 പേരാണ്; എല്ലാവരും ബംഗാൾ സ്വദേശികൾ. സ്കൂളിന്റെ നിലനിൽപിനു തന്നെ സഹായകമായി ആ വരവ്. 

വലിയപറമ്പ് പഞ്ചായത്തിലെ ഒറ്റപ്പെട്ട കടലോര ഗ്രാമമാണ് തയ്യിൽ സൗത്ത്. പ്രദേശത്തിന്റെ മറുകര ഏഴിമല നാവിക അക്കാദമിയാണ്. ഇവിടത്തെ ഉദ്യോഗസ്ഥരുടെ സഹായികളായ 5 ബംഗാൾ കുടുംബങ്ങളിൽനിന്നുള്ള കുട്ടികളാണ് സ്കൂളിനെ കാത്തത്. മനോജ് തുഡു, സാഗർ തുഡു, ബികാശ് മർദി, സഞ്ജന മുർമു, ഇരട്ടകളായ ബെനശ്രീ ബസ്റ, മധുശ്രീ ബസ്റ എന്നിവരാണു പ്രവേശനം നേടിയത്. ഇവർക്കാർക്കും മലയാളം വഴങ്ങില്ല.

ജലഗതാഗത വകുപ്പിന്റെ ബോട്ടിലാണ് കായൽ‌കടന്ന് കുട്ടികളെത്തിയത്. പ്രധാനാധ്യാപകൻ സി.കുമാരന്റെ നേതൃത്വത്തിൽ അധ്യാപകർ കുട്ടികളെ വരവേറ്റു. അധ്യാപിക സ്മിത അഭിലാഷ് ഇടപെട്ടാണ് കുട്ടികളെ സ്കൂളിലെത്തിച്ചത്. സ്മിതയുടെ വാഹനത്തിലാണ് ഇവരെ ഇന്നലെ സ്കൂളിൽനിന്നു തീരത്തെത്തിച്ചു ബോട്ടിൽ കയറ്റിവിട്ടത്. ഇവർക്കു സ്കൂളിലെത്താൻ സ്ഥിരം സംവിധാനം വേണം. നാലാം ക്ലാസിൽ ഒരാൾ, രണ്ടിൽ 3 പേർ, മൂന്നിൽ 2 പേർ, ഒന്നിൽ 6 പേർ എന്നിങ്ങനെ സ്കൂളിലിപ്പോൾ ആകെ 12 കുട്ടികളായി.