ചോദിക്കട്ടേ, പറയാമോ: മുഖ്യമന്ത്രിയുടെ ഓഫിസിനോട് 10 ചോദ്യങ്ങൾ

തിരുവനന്തപുരം∙ അഭിമുഖത്തിനു പബ്ലിക് റിലേഷൻ ഏജൻസിയെ ചുമതലപ്പെടുത്തുകയും അവർ മുഖ്യമന്ത്രിയുടെ പേരിൽ നൽകിയ വിവാദ പരാമർശം പ്രസിദ്ധീകരിച്ചു വിവാദമാവുകയും ചെയ്തിട്ടും ഇക്കാര്യത്തിൽ വ്യക്തമായ പ്രതികരണത്തിനു മുഖ്യമന്ത്രിയോ, അദ്ദേഹത്തിന്റെ ഓഫിസോ തയാറായിട്ടില്ല. ഔദ്യോഗിക പ്രതികരണം വൈകാതെ നൽകുമെന്ന മറുപടി പറഞ്ഞൊഴിയുകയാണു മുഖ്യമന്ത്രിയുടെ ഓഫിസ്. 

∙ഉത്തരം കിട്ടേണ്ട ചോദ്യങ്ങൾ ഇവയാണ്

1 ദേശീയ, രാജ്യാന്തര മാധ്യമങ്ങൾക്കു മുഖ്യമന്ത്രിയുടെ അഭിമുഖം നൽകുന്നതു പിആർ ഏജൻസി വഴിയാണോ?

2 മുഖ്യമന്ത്രിയുടെ ഓഫിസിൽ പ്രസ് സെക്രട്ടറിയും പിആർഡി സംഘവുമുള്ളപ്പോൾ ബാഹ്യ ഏജൻസിയെ സമീപിച്ചത് എന്തിന്?

3 ഇതുവരെ എത്ര ഏജൻസികളെ ഇത്തരത്തിൽ ചുമതലപ്പെടുത്തി?

4 ഓരോരുത്തർക്കും നൽകിയ ഫീസ് എത്ര? നൽകിയത് ഏതു ഫണ്ടിൽനിന്ന്?

5 കെയ്സൻ പിആർ സർവീസിനെ അഭിമുഖത്തിനായി ചുമതലപ്പെടുത്തിയത് ആര്?

6 കെയ്സനുമായി സർക്കാരിനു കരാറുണ്ടോ?

7 ഏജൻസിയുമായി സർക്കാരിലും പാർട്ടിയിലും ആർക്കെല്ലാം ബന്ധം?

8 ഏജൻസി പ്രതിനിധികൾക്കൊപ്പമിരുന്നാണോ മുഖ്യമന്ത്രി അഭിമുഖം നൽകിയത്?

9 മലപ്പുറം സംബന്ധിച്ച വിവാദ പരാമർശം അഭിമുഖത്തിൽ ഉൾപ്പെടുത്താൻ ഏജൻസിയോട് ആവശ്യപ്പെട്ടതാര്?

10 ഒരു പകൽ മുഴുവൻ കോളിളക്കമുണ്ടായിട്ടും വിവാദ പരാമർശം മുഖ്യമന്ത്രിയുടേതല്ലെന്നു ചൂണ്ടിക്കാട്ടാൻ വൈകിയതെന്ത്?