കേരളമാകെ ഒഴുകി കള്ളപ്പണം; ഒരു മാസം കൊണ്ട് വിതരണം ചെയ്തത് 41 കോടി; ഹവാലപ്പണം സഞ്ചരിച്ച വഴി ഇങ്ങനെ

തൃശൂർ ∙ 2021 ലെ നിയമസഭാ തിരഞ്ഞെടുപ്പിൽ ബിജെപി സ്ഥാനാർഥികൾക്കുവേണ്ടി കാസർകോട് മുതൽ തിരുവനന്തപുരം വരെ കള്ളപ്പണം എത്തിച്ചതായി കൊടകര കുഴൽപണക്കേസിലെ പരാതിക്കാരനും പണം കടത്താൻ നേതൃത്വം നൽകിയയാളുമായ കോഴിക്കോട് സ്വദേശി ധർമരാജൻ 2021 ൽ പ്രത്യേക അന്വേഷണ സംഘത്തിനു നൽകിയ മൊഴിയിൽ പറയുന്നു. കർണാടക, തമിഴ്നാട്, മഹാരാഷ്ട്ര എന്നിവിടങ്ങളിൽനിന്നായി എത്തിച്ചത് 41.4 കോടി രൂപയാണ്.

കൊടകര കേസിൽ പിടിച്ചെടുത്ത തുകയും കാറും വിട്ടുകിട്ടാൻ ധർമരാജൻ 2021 ജൂണിൽ ഇരിങ്ങാലക്കുട ഫസ്റ്റ് ക്ലാസ് മജിസ്ട്രേട്ട് കോടതിയിൽ ഹർജി സമർപ്പിച്ചിരുന്നു. ഈ ഹർജിക്കെതിരെ പൊലീസ് നൽകിയ റിപ്പോർട്ടിലും ഈ വിവരങ്ങളുമുണ്ട്.

ഹവാലപ്പണം സഞ്ചരിച്ച വഴികളെക്കുറിച്ചു പൊലീസ് കണ്ടെത്തിയത്

∙ 2021 മാർച്ച് 1-6: ധനരാജൻ, കെ.പി.വിജിത്ത്, സുധീർ സിങ് എന്നിവർ കടത്തിക്കൊണ്ടുവന്ന 4.40 കോടി രൂപ സേലത്തിനു സമീപം കൊള്ളയടിച്ചു. കൊള്ളസംഘത്തെ കണ്ടെത്താനോ പണം തിരിച്ചുപിടിക്കാനോ കഴിഞ്ഞിട്ടില്ല.

∙ മാർച്ച് 5: വടകര സ്വദേശിയുടെ വാടകക്കാറിൽ ഷാംജീറും റഷീദും 2 കോടി രൂപ കടത്തി. ബിജെപി തിരുവനന്തപുരം ഓഫിസിലെ അറ്റൻഡർ ബിനീത് തുളസീധരനാണു തിരുവനന്തപുരത്തു പണം കൈമാറിയത്.

∙ മാർച്ച് 8: വടകര സ്വദേശിയുടെ വാടകക്കാറിൽ ഷാംജീറും റഷീദും 3.50 കോടി രൂപ ബിനീത് തുളസീധരനു കൈമാറി.

∙ മാർച്ച് 12: ഇതേ കാറിൽ ഷാംജീറും റഷീദും തൃശൂർ അമല നഗറിൽ 2 കോടി രൂപ ബിജെപി തൃശൂർ ജില്ലാ ട്രഷറർ സുജയ് സേനനു കൈമാറി.

∙ മാർച്ച് 13: ഇതേ കാറിൽ ഷാംജീറും റഷീദും 1.50 കോടി രൂപ സുജയ് സേനനു വീണ്ടും അമലനഗറിൽ കൈമാറി.

∙ മാർച്ച് 14: ഇവർക്കിടയിൽ‌ അന്ന് 1.50 കോടി രൂപയുടെ കൈമാറ്റം നടന്നതു തൃശൂർ വിയ്യൂരിലാണ്.

∙ മാർച്ച് 16: ധർമരാജന്റെ അനുജൻ ധനരാജൻ കെഎസ്ആർടിസി ബസിൽ 50 ലക്ഷം രൂപയുമായി ആലുവയിലെത്തി സോമശേഖരൻ എന്നു സംശയിക്കുന്ന ഒരാൾക്കു പണം കൈമാറി.

∙ മാർച്ച് 18: ലോറിയിൽ കൊണ്ടുവന്ന 1.10 കോടി രൂപ ഡ്രൈവർ ഷിജിൻ അരൂരിനു സമീപം കാത്തുനിന്ന ബിജെപി ആലപ്പുഴ മേഖലാ സെക്രട്ടറി പത്മകുമാറിനു കൈമാറി.

∙ മാർച്ച് 20: ധർമരാജൻ, ഷിജിൻ, ധനരാജൻ, ഷൈജുവെന്നു വിളിക്കുന്ന ഷാജി എന്നിവർ 7 കോടി രൂപ കൊണ്ടുവന്നു.

∙ മാർച്ച് 21: ഷാംജീറും ധനരാജനും കാറിൽ 1.40 കോടി രൂപ കൊണ്ടുവന്നു കണ്ണൂർ ബിജെപി ഓഫിസിലെ ശരത്തിനു കണ്ണൂരിൽ കൈമാറി. അതേ ദിവസം തന്ന ഷാംജീറും ധനരാജനും 1.50 കോടി രൂപയുമായി കാസർകോട്ട് എത്തി. കോഴിക്കോട് മേഖലാ സെക്രട്ടറി കെ.പി.സുരേഷിനു കൈമാറി.

∙ മാർച്ച് 22: ധനരാജൻ ഒരു കോടി രൂപയുമായി കോഴിക്കോട് എത്തി ബിജെപി ജില്ലാ സെക്രട്ടറിയുടെ ചുമതല വഹിച്ചിരുന്ന വൈസ് പ്രസിഡന്റ് ഉണ്ണിക്കൃഷ്ണനു കൈമാറി.

∙ മാർച്ച് 23: ഷാംജീറും റഷീദും 1.50 കോടി രൂപ ആലപ്പുഴ കുത്തിയതോട്ടിൽ മേഖലാ സെക്രട്ടറി പത്മകുമാറിനു കൈമാറി.

∙ മാർച്ച് 25: റഷീദ് ഒരു കോടി രൂപ ആലപ്പുഴ വച്ചു പത്മകുമാറിനു വീണ്ടും കൈമാറി.

∙ മാർച്ച് 25: ഷിജിൻ ലോറിയിൽ കൊണ്ടുവന്ന 1.10 കോടി രൂപ തിരുവനന്തപുരം തമ്പാനൂരിൽ ധർമരാജനു കൈമാറി.

∙ മാർച്ച് 26, 27: ഷിജിൻ പാഴ്സൽ ലോറിയിൽ 6.50 കോടി രൂപ കർണാടകയിൽനിന്നു കേരളത്തിലേക്കു കടത്തി.

∙ മാർച്ച് 27: കാറിൽ കൊണ്ടുവന്ന 1.50 കോടി രൂപ ധർമരാജൻ കോഴിക്കോട്ട് ഉണ്ണിക്കൃഷ്ണനു കൈമാറി. അന്നുതന്നെ കാറിൽ കൊണ്ടുവന്ന ഒരു കോടി രൂപ റഷീദ് തൃശൂരിൽ സുജയ് സേനനു കൈമാറി.

∙ മാർച്ച് 29: ഷിജിൻ കെഎസ്ആർടിസി ബസിൽ കൊണ്ടുവന്ന 1.10 കോടി രൂപ തമ്പാനൂരിൽ ധർമരാജനു കൈമാറി.

∙ മാർച്ച് 31: ഷിജിൻ കെഎസ്ആർടിസി ബസിൽ കൊണ്ടുവന്ന 1.10 കോടി രൂപ തമ്പാനൂരിൽ ധർമരാജനു കൈമാറി.

∙ ഏപ്രിൽ 3: ഷിജിൻ ലോറിയിൽ കൊണ്ടുവന്ന 6.30 കോടി രൂപ തൃശൂരിൽ ധർമരാജനും സുജയ് സേനനും കൈമാറി. അന്നുതന്നെ ഷാംജീറും റഷീദും കാറിൽ കൊണ്ടുവന്ന 3.50 കോടി രൂപ ബിജെപി ആലപ്പുഴ ജില്ലാ ട്രഷറർ ഗോപാലകൃഷ്ണൻ കർത്തായ്ക്കു കൈമാറാൻ കൊണ്ടുവരും വഴി കൊടകരയിൽ കൊള്ളയടിക്കപ്പെട്ടു.

∙ ഏപ്രിൽ 4: ഷിജിൻ ലോറിയിൽ കൊണ്ടുവന്ന 1.40 കോടി രൂപ പത്തനംതിട്ടയിൽ ഓർഗനൈസിങ് സെക്രട്ടറി എം.എസ്.അനിൽകുമാറിനു കൈമാറി.

∙ ഏപ്രിൽ 5: കെഎസ്ആർടിസി ബസിൽ പ്രശാന്ത് കൊണ്ടുവന്ന 1.50 കോടി രൂപ കോഴിക്കോട് അളകാപുരിയിൽ സുജയ് സേനന്റെ സുഹൃത്ത് പ്രശാന്ത് കുമാറിനു കൈമാറി.