ഇറ്റലിക്കാരൻ വന്നത്‌ ഡൽഹി വഴി; റിസോര്‍ട്ട് പൂട്ടി; പോയ വഴി അറിയാനാകാതെ അധികൃതര്‍

ഇറ്റാലിയൻ സ്വദേശി പോയ സ്ഥലങ്ങളും ഇടപഴകിയ ആളുകളെയും കണ്ടെത്താനുള്ള തീവ്രശ്രമത്തിലാണ് അധികൃതർ. ആരോഗ്യവകുപ്പും സ്പെഷൽ ബ്രാഞ്ചും സംയുക്തമായാണ് വിവരങ്ങൾ ശേഖരിക്കുന്നത്. വർക്കലയിലും പരിസര പ്രദേശങ്ങളിലുമായി വിവിധയിടങ്ങളിൽ ഇയാൾ സഞ്ചരിച്ചതായാണ് പ്രാഥമിക നിഗമനം. റൂട്ട് മാപ്പ് ഉടൻ പുറത്തിറക്കുമെന്നാണ് വിവരം. വർക്കല മുനിസിപ്പാലിറ്റിയുടെ നേതൃത്വത്തിലുള്ള സ്ക്വാഡ് റിസോർട്ടുകളിൽ പരിശോധന നടത്തി വിദേശികൾക്ക് നിർദേശങ്ങൾ നൽകുന്നുണ്ട്. എഡിഎമ്മിന്റെയും ആരോഗ്യവകുപ്പിന്റെയും സ്ക്വാഡുകളും റിസോർട്ടുകളിലും ഹോട്ടലുകളിലും ഹോം സ്റ്റേകളിലും പരിശോധന നടത്തും. 

ഇറ്റാലിയൻ സ്വദേശിക്ക് രോഗം സ്ഥിരീകരിച്ചതോടെ വർക്കല ബീച്ചിൽ സഞ്ചാരികളുടെ തിരക്ക് കുറഞ്ഞു. വിദേശത്തുനിന്നെത്തിയ സഞ്ചാരികളിൽ അധികംപേരും മുറികളിൽ കഴിയുകയാണ്. കോവളം ബീച്ചിലും പരിസര പ്രദേശങ്ങളിലും അധികൃതർ പരിശോധന നടത്തി വിനോദ സഞ്ചാരികൾക്ക് നിർദേശങ്ങൾ നൽകുന്നുണ്ട്. സംസ്ഥാനത്തെ വിനോദ സഞ്ചാര കേന്ദ്രങ്ങളിലെല്ലാം പരിശോധന നടത്താൻ സർക്കാർ നിർദേശിച്ചിട്ടുണ്ട്. 

English Summary : Difficult to trace covid affected Italian's contact list