ഗ്രേറ്റയുടെ സുഹൃത്ത്; സൈബർപ്പോര് വേണ്ട, തന്റേത് പരിസ്ഥിതി രാഷ്ട്രീയം: ആദർശ്

കർഷക പ്രക്ഷോഭത്തെക്കുറിച്ചുള്ള സ്വീഡിഷ് പരിസ്ഥിതി പ്രവർത്തക ഗ്രേറ്റ ട്യുൻബെർഗിന്റെ ട്വീറ്റ് ചർച്ചയായതിനൊപ്പം ഉയർന്നു കേട്ട പേരാണ് തിരുവനന്തപുരം സ്വദേശി ആദർശ് പ്രതാപിന്റേത്. സമൂഹമാധ്യമങ്ങളിൽ ഗ്രേറ്റയ്ക്കെതിരെ വാളോങ്ങിയവർ ആദർശിനെയും വെറുതെവിട്ടില്ല.

സ്വീഡനിലുള്ള ഗ്രേറ്റയും പാലോട് സ്വദേശി ആദർശും തമ്മിലെന്തു ബന്ധമെന്നു ചോദിക്കാൻ വരട്ടെ. 2017ൽ ജർമനിയിൽ നടന്ന യുഎൻ ആഗോള കാലാവസ്ഥാ വ്യതിയാന സമ്മേളനത്തിൽ മുണ്ടുടുത്തെത്തി എല്ലാവരെയും ഞെട്ടിച്ച ആദർശ് ഗ്രേറ്റയുടെ അടുത്ത സുഹൃത്തും വിശ്വസ്തനുമാണ്.

2018ലെ കാലാവസ്ഥാ വ്യതിയാന സമ്മേളനത്തിലാണ് ഇരുവരും പരിചയപ്പെടുന്നത്. പിന്നീട് ഓൺലൈനിലൂടെ ആ അടുപ്പം വർധിച്ചു. ഒടുവിൽ ഗ്രേറ്റയുടെ ഔദ്യോഗിക ഫെയ്സ്ബുക് പേജും ഇൻസ്റ്റഗ്രാം പേജും കൈകാര്യം ചെയ്യാനുള്ള ചുമതല ആദർശിനു നൽകി. ട്വിറ്ററിൽ ഗ്രേറ്റ പോസ്റ്റ് ചെയ്യുന്നത് ഫെയ്സ്ബുക്കിലും പങ്കുവയ്ക്കുകയാണ് ആദർശിന്റെ ചുമതല.

ഗ്രേറ്റയുടെ നിലപാടുകൾ വിവാദമായപ്പോഴെല്ലാം ആദർശും ആക്ഷേപങ്ങൾക്കു വിധേയമായി. കർഷക പ്രക്ഷോഭവുമായി ബന്ധപ്പെട്ടും ഇതാവർത്തിച്ചു.‘പ്രക്ഷോഭത്തെ പിന്തുണയ്ക്കാൻ സമൂഹ മാധ്യമങ്ങളിൽ ചെയ്യേണ്ട കാര്യങ്ങൾ’ എന്നു വിശദീകരിച്ച് ‘ടൂൾ കിറ്റ്’ എന്ന പേരിൽ ഗ്രേറ്റ കഴിഞ്ഞദിവസം ട്വിറ്ററിൽ കുറിപ്പിട്ടിരുന്നു. ഇന്ത്യയെ അവഹേളിക്കാനുള്ള ഗൂഢാലോചനയാണിതെന്ന് ആരോപണമുയർന്നതിനു പിന്നാലെ ഗ്രേറ്റ ട്വീറ്റ് പിൻവലിച്ച് ചില മാറ്റങ്ങൾ വരുത്തി വീണ്ടും പോസ്റ്റ് ചെയ്തു. ഗ്രേറ്റയുടെ പേജ് അഡ്മിനായ ആദർശ് ദുരുപയോഗം ചെയ്യുകയാണെന്ന തരത്തിലുള്ള ആക്ഷേപങ്ങൾ വരെയുയർന്നു. ഇതേക്കുറിച്ച് ആദർശ് 'മനോരമ'യോട് മനസ്സുതുറക്കുന്നു.

∙ ഗ്രേറ്റയുടെ ഫെയ്സ്ബുക് പേജ് കൈകാര്യം ചെയ്യുന്നത് ആദർശ് ആണെന്ന് എങ്ങനെയാണ് പുറത്തുവന്നത്?

യുഎസ് പ്രസിഡന്റ് ഡോണൾഡ് ട്രംപുമായുള്ള ഗ്രേറ്റയുടെ അഭിപ്രായവ്യത്യാസത്തിനു പിന്നാലെയായിരുന്നു അത്. ഫെയ്സ്ബുക് പേജുകളിൽ ഏത് അക്കൗണ്ടിൽ‌ നിന്നാണ് പോസ്റ്റ് ചെയ്യുന്നതെന്ന് അറിയാൻ കഴിയുന്ന തരത്തിൽ ഒരു തകരാർ കഴിഞ്ഞ ജനുവരിയിൽ കുറച്ച് സമയത്തേക്കുണ്ടായിരുന്നു. അങ്ങനെയാണ് ഞാനും ഗ്രേറ്റയുടെ പിതാവ് സ്വാന്റെ ട്യുൻബെർഗും അക്കൗണ്ട് ഓപ്പറേറ്റ് ചെയ്തിരുന്നുവെന്ന് കണ്ടെത്തിയത്. ഇതേത്തുടർന്ന് ട്രംപ് അനുകൂലികൾ ഞങ്ങൾക്കെതിരെ വ്യാപകമായ അധിക്ഷേപവുമായി വന്നു. സ്ക്രീൻഷോട്ടുകൾ പ്രചരിപ്പിച്ചു. ആദർശ് പ്രതാപ് എന്ന് ട്വിറ്ററിൽ തിരഞ്ഞാൽ ഇപ്പോഴും ആ ഹാഷ്ടാഗുകൾ കാണാം. അച്ഛന്റെ ഫെയ്സ്ബുക് അക്കൗണ്ടാണ് പേജിൽ പോസ്റ്റ് ചെയ്യാനായി ഗ്രേറ്റ ഉപയോഗിച്ചിരുന്നത്. ഞാനുമായി വിഡിയോ കോൾ ചെയ്തിട്ടുള്ളതെല്ലാം അച്ഛന്റെ അക്കൗണ്ടിൽ നിന്നായിരുന്നു. 

അധിക്ഷേപം പരിധിവിട്ടതോടെ 2020 ജനുവരി 20ന് ഗ്രേറ്റ തന്നെ ഒരു ഫെയ്സ്ബുക് പോസ്റ്റുമായി രംഗത്തെത്തി. അതിങ്ങനെയായിരുന്നു.

"Some people have been asking who manages this page. First of all, since last spring I only use Facebook to repost what I write on my Twitter and Instagram accounts. Since I have chosen not to be on Facebook personally ( I tried early on but decided it wasn’t for me) I use my father Svantes account to repost content, because you need an account to moderate a Facebook page. The rest that is shared on Facebook is reposted from Twitter and Instagram by the guy who founded the Greta Thunberg Facebook page long before I knew it existed. His name is Adarsh Prathap and he lives in India. Since a lot of people thought it was my official page in the beginning I asked if I could co-manage it and he said yes. All texts posted on my Facebook page has of course been written by me, just like everything else."