വാക്സിനേഷനിൽ രഹസ്യ ‘ഇന്റലിജന്‍സ്’; 305 കുട്ടികളിൽ വൈറസ് വേരിയന്റും

താലിബാൻ നേതാക്കൾ അഫ്ഗാനിസ്ഥാൻ ഭരിക്കുന്നത് ബൈഡൻ അംഗീകരിക്കുമോ എന്ന ചോദ്യത്തിന് വൈറ്റ്‌ ഹൗസ് പ്രസ് സെക്രട്ടറി ജെൻ സാക്കി മറുപടി നൽകിയത് ‘നടക്കാത്ത കാര്യം’ എന്നാണ്. അഫ്ഗാനിൽ യുഎസിന്റെ അടുത്ത നടപടി എന്താണെന്നതു സംബന്ധിച്ച് ചർച്ച തുടരുകയാണെന്നും ജെൻ വ്യക്തമാക്കി. മേയ് ഒന്നോടെ സൈന്യത്തെ പൂർണമായി പിൻവലിക്കണോയെന്ന കാര്യത്തിൽ അഫ്ഗാനുമായി നിരന്തരം ചർച്ച തുടരുകയാണെന്നാണ് പെന്റഗൺ പ്രസ് സെക്രട്ടറി ജോൺ കിർബി പറഞ്ഞത്. നിലവിലെ സാഹചര്യം വിലയിരുത്തിയതിനു ശേഷമായിരിക്കും നടപടി. ചർച്ചകളിൽ വിശ്വാസമുണ്ടെന്ന് പാക്കിസ്ഥാൻ വിദേശകാര്യമന്ത്രി ഷാ മഹ്‌മൂദ് ഖുറേഷി പറയുന്നു. ഖത്തർ വിദേശകാര്യ മന്ത്രാലയത്തിന്റെ പിന്തുണയും അഫ്ഗാനുണ്ട്. ഇതെല്ലാം വിരൽ ചൂണ്ടുന്നത് അഫ്ഗാനിൽനിന്നു പിന്മാറുന്നതിനെക്കുറിച്ച് യുഎസ് പുനരാലോചിക്കുകയാണെന്നാണ്.

അതേസമയം, പ്രതിരോധ സെക്രട്ടറി ലോയ്‌ഡ് ഓസ്റ്റിൻ തന്റെ ആദ്യ വാർത്താസമ്മേളനത്തിൽ വ്യക്തമായി പറഞ്ഞു– ‘‘അഫ്ഗാനിൽ സമാധാനം എന്നതും യുഎസ് സൈന്യത്തിന്റെ ഇടപെടൽ അവസാനിപ്പിക്കുക എന്നതും ഇനിയുള്ള നാളുകളിൽ താലിബാൻ എത്രമാത്രം ആക്രമണങ്ങൾ കുറയ്ക്കും എന്നതിനെ ആശ്രയിച്ചിരിക്കും.’’ നാറ്റോയും സമാനമായ മറുപടിയാണു നൽകിയത്. താലിബാനും അഫ്ഗാന്‍ സർക്കാരും തമ്മിലുള്ള സമാധാന ചർച്ച അതിവേഗം പൂർത്തിയാക്കണമെന്നായിരുന്നു നാറ്റോ സെക്രട്ടറി ജനറൽ ജെൻസ് സ്റ്റോൾട്ടെൻബെർഗിന്റെ നിർദേശം. പതിനായിരത്തിൽ താഴെ ട്രൂപ്പ് സൈനികരാണ് നാറ്റോയ്ക്ക് അഫ്ഗാനിലുള്ളത്. പ്രധാനമായും അഫ്ഗാൻ സുരക്ഷാസേനയ്ക്കു പരിശീലനം നൽകുക എന്നതാണു ലക്ഷ്യം. എന്നാൽ യുഎസ് സേനാംഗങ്ങൾ പിന്മാറുന്നതോടെ യാത്രാ–ചരക്കുകൈമാറ്റ സംവിധാനങ്ങൾ ഉൾപ്പെടെ ലഭ്യമല്ലാതാകും. അതോടെ നാറ്റോ സൈന്യത്തിനും അഫ്ഗാനിൽ തുടരുക ബുദ്ധിമുട്ടാകും. ഇത്തരമൊരു സാഹചര്യത്തോടു ചേർത്തുവച്ചു വേണം അഫ്ഗാനിലെ കോവിഡ് വാക്സിനേഷനെക്കുറിച്ച് അറിയേണ്ടത്.

വാതിലിൽ മുട്ടി വാക്സിനേഷൻ വേണ്ട!

രണ്ടു ദശാബ്ദം മുൻപ് അഫ്ഗാനിൽ പോളിയോ വാക്സിനേഷന്‍ നടത്താൻ ശ്രമങ്ങൾ നടത്തുമ്പോൾ ലോകാരോഗ്യ സംഘടനയ്ക്കും (ഡബ്ല്യുഎച്ച്ഒ) യുഎൻ ചിൽഡ്രൻസ് ഫണ്ടിനും (യുനിസെഫ്) നേരിടേണ്ടി വന്ന പ്രധാന ഭീഷണി താലിബാന്റെ ഭാഗത്തുനിന്നായിരുന്നു. യുദ്ധം കൊടുമ്പിരിക്കൊണ്ട നാളുകളായിരുന്നു അത്. എന്നാൽ യുനിസെഫിനു മുന്നിൽ മറ്റൊരു കണക്കായിരുന്നു ഭീഷണിയായുണ്ടായിരുന്നത്– 2000ത്തിൽ മാത്രം അഫ്ഗാനിൽ പോളിയോ ബാധിച്ചത് 115 കുട്ടികൾക്കായിരുന്നു. മാത്രമല്ല, മിക്ക രാജ്യങ്ങളിൽനിന്നും പോളിയോ തുടച്ചുനീക്കിയിട്ടും അഫ്ഗാനിലും പാക്കിസ്ഥാനിലും വൈറസ് ബാധ തുടരുകയാണ്. ഈ സാഹചര്യത്തിലാണ് ഡബ്ല്യുഎച്ച്ഒയും യുനിസെഫും മുൻകയ്യെടുത്ത് താലിബാനുമായി ചർച്ച നടത്തിയത്. അങ്ങനെ 2001ൽ മൂന്നു ദിവസത്തേക്ക് വെടിനിർത്തലിന് താലിബാൻ സമ്മതം മൂളി. 

57 ലക്ഷം കുരുന്നുകൾക്ക് വാക്സീൻ നൽകാൻ ആകെ ലഭിച്ചത് മൂന്നു ദിവസം. ആരോഗ്യപ്രവർത്തകർക്ക് അതുതന്നെ ധാരാളമായിരുന്നു. ഇത്തരത്തിൽ പല ഘട്ടങ്ങളിലും താലിബാന്റെ ‘അനുവാദ’ത്തോടെ മാത്രമായിരുന്നു രാജ്യത്തെ വാക്സിനേഷൻ. ഇത്രയും വർഷം വെടിനിർത്തലുകളുടെയും ചർച്ചകളുടെയും ബലത്തിൽ വാക്സിനേഷൻ നടന്നുപോന്നു. എന്നാൽ കോവിഡ് സാഹചര്യത്തിൽ 2020ൽ പോളിയോ വാക്സിനേഷൻ നടന്നില്ല. അഞ്ചു വയസ്സിൽ താഴെയുള്ള 34 ലക്ഷത്തോളം കുട്ടികൾക്കാണ് കഴിഞ്ഞ വർഷം വാക്സീൻ നിഷേധിക്കപ്പെട്ടത്. ഫലമോ, 56 കുട്ടികളിൽ പോളിയോ സ്ഥിരീകരിച്ചു. 2019ൽ അത് 29 ആയിരുന്നു. 

വാക്സീനെ പ്രതിരോധിക്കുന്ന, ജനിതക പരിവർത്തനം സംഭവിച്ച പോളിയോ വൈറസ് വേരിയന്റിന്റെ സാന്നിധ്യം 305 കുട്ടികളിൽ‌ കണ്ടെത്തിയതും 2020ലാണ്! ഇവയ്ക്കെതിരായ പുതിയ വാക്സീന്റെ അടിയന്തര ഉപയോഗത്തിനുള്ള അനുമതി 2021 അവസാനത്തോടെ ഡബ്ല്യുഎച്ച്ഒയിൽനിന്നു ലഭിക്കുമെന്നാണു കരുതുന്നത്. ഇക്കഴിഞ്ഞ ജനുവരിയിൽ വീണ്ടും പോളിയോ വാക്സീൻ വിതരണം ആരംഭിച്ചു. 65,000 ആരോഗ്യ പ്രവർത്തകരുമായി ഏകദേശം ഒരു കോടി കുട്ടികൾക്കായിരുന്നു വാക്സീൻ നൽകാനുണ്ടായിരുന്നത്. എന്നാൽ അധീനതയിലുള്ള ഒരിടത്തും ഇത്തവണ പോളിയോ വാക്സീൻ വീടുകൾ തോറും കയറി നൽകാൻ അനുവദിക്കില്ലെന്ന് താലിബാൻ ഉറപ്പിച്ചു പറഞ്ഞു. 

മുൻകാലങ്ങളിൽ പല പ്രവിശ്യകളിലും രഹസ്യമായി ഇന്റലിജൻസ് വിവരങ്ങൾ ശേഖരിക്കാൻ വേണ്ടി വാക്സിനേഷൻ പ്രക്രിയയെ ഉപയോഗപ്പെടുത്തിയെന്നാണ് ഭീകരരുടെ വാദം. ഡബ്ല്യുഎച്ച്ഒയുമായി ചർച്ച നടത്തിയെങ്കിലും അനുകൂല മറുപടി താലിബാന്റെ ഭാഗത്തുനിന്നുണ്ടായില്ലെന്നാണ് റിപ്പോർട്ട്. അതോടെ 30 ലക്ഷം കുട്ടികൾക്കെങ്കിലും വാക്സീന്‍ ലഭിക്കാതെ പോകുമെന്നും ആരോഗ്യ വിദഗ്ധർ പറയുന്നു. 2021 ജനുവരിയിലെ പോളിയോ വാക്സിനേഷനു പിന്നാലെ ഫെബ്രുവരിയിൽ കോവിഡ് വാക്സിനേഷനും രാജ്യത്ത് ആരംഭിക്കുമ്പോൾ താലിബാന്റെ ഈ ഭീഷണി അഫ്ഗാൻ ജനതയുടെ തലയ്ക്കു മുകളിൽത്തന്നെയുണ്ട്.

ഇറാനിൽ നിന്നെത്തിയ കോവിഡ്

2020 ഫെബ്രുവരിയിലാണ് അഫ്ഗാനിലെ ആദ്യ കോവിഡ് കേസ് റിപ്പോർട്ട് ചെയ്യുന്നത്. ചെരുപ്പ് കടയുടമയായ മുപ്പത്തിയഞ്ചുകാരൻ ഫെബ്രുവരി ഒൻപതിന് ഇറാനിലേക്കു പോയതിൽനിന്നായിരുന്നു തുടക്കം. ഒരാഴ്ചയോളം അദ്ദേഹം അവിടെ തുടർന്നു. കടയിലേക്ക് ഷൂ നൽകുന്ന കമ്പനിയിലെ ജീവനക്കാരുമായി ദിവസങ്ങളോളം ഇടപഴകിയതിനു ശേഷം കാറിൽ ഹിരാത്തിലെ വീട്ടിലേക്ക് ഫെബ്രുവരി 15ന് മടക്കം. പിന്നീടും യാതൊരു മുൻകരുതലുമില്ലാതെ വീട്ടുകാർക്കും സുഹൃത്തുക്കൾക്കുമൊപ്പം ഇടപഴകി. ഫെബ്രുവരി 16ന് കോവിഡ് ലക്ഷണങ്ങൾ കാണിച്ചു തുടങ്ങി. പിന്നെയും അഞ്ചു ദിവസം കഴിഞ്ഞാണ് ആശുപത്രിയിലേക്കു പോയതും ഇറാൻ യാത്രയെപ്പറ്റി അധികൃതരോടു പറഞ്ഞതും. സർക്കാർ ആശുപത്രിയിലേക്കു മാറ്റിയ അദ്ദേഹത്തിന് ഫെബ്രുവരി 24ന് രോഗം സ്ഥിരീകരിച്ചു. 

അക്കാലയളവിൽ മേഖലയിൽ ഏറ്റവും രൂക്ഷമായ കോവിഡ് ബാധ ഇറാനിലായിരുന്നു. ഇറാനിൽ നിന്നുള്ള പതിനായിരക്കണക്കിനു അഫ്ഗാൻ തൊഴിലാളികൾ രാജ്യത്തേക്കു കൂട്ടത്തോടെ മടങ്ങിയെത്തിയ സമയം കൂടിയായിരുന്നു അത്. വൈകാതെ രാജ്യത്ത് കോവി‍ഡ് പരന്നു. മാസങ്ങളോളം അതു തുടർന്നു. തലസ്ഥാനമായ കാബൂളിലായിരുന്നു ഏറ്റവും രൂക്ഷം. 3.8 കോടിയാണ് രാജ്യത്തെ ജനസംഖ്യ. ഔദ്യോഗിക കണക്കിൽ ഇതുവരെ 5.5 ലക്ഷം പേർക്കാണ് അഫ്ഗാനിൽ കോവിഡ് സ്ഥിരീകരിച്ചത്. 2400ലേറെ മരണവും. എന്നാൽ 2020 ഓഗസ്റ്റിലെ ആരോഗ്യ വകുപ്പ് സർവേ പ്രകാരം രാജ്യത്തെ ഒരു കോടി പേർക്കെങ്കിലും കോവിഡ് ബാധിച്ചതായാണ് കണ്ടെത്തിയത്. രോഗം തിരിച്ചറിയുന്നതിന് കോവിഡ് ടെസ്റ്റ് സൗകര്യങ്ങളുടെ അപര്യാപ്തതയും തിരിച്ചടിയായി. ഇക്കഴിഞ്ഞ മാസങ്ങളിൽ കോവി‍ഡ് രോഗികളുടെ എണ്ണം കുറഞ്ഞതോടെയാണ് വാക്സിനേഷനിലേക്കു കടക്കാൻ അഫ്ഗാൻ തീരുമാനിച്ചത്.

സഹായവാക്സീനുമായി ഇന്ത്യ

എവിടെനിന്നു ലഭിക്കും വാക്സീൻ എന്ന് ആശങ്കപ്പെട്ടിരുന്ന അഫ്ഗാന് സൗജന്യമായിട്ടായിരുന്നു അഞ്ചു ലക്ഷം ഡോസ് കോവിഷീൽഡ് വാക്സീൻ ഇന്ത്യ അയച്ചുകൊടുത്തത്. മുംബൈയിൽനിന്ന് പ്രത്യേക വിമാനത്തിലായിരുന്നു കാബൂൾ വിമാനത്താവളത്തിലേക്ക് സൗജന്യ വാക്സീൻ എത്തിയത്. തുടർന്ന് ഡബ്ല്യുഎച്ച്ഒയുടെ അനുമതിക്കായി കാത്തിരിപ്പ്.  ഇന്ത്യയുടെ സീറം ഇൻസ്റ്റിറ്റ്യൂട്ട് ഉൽപാദിപ്പിക്കുന്ന കോവിഷീല്‍ഡിന് അഫ്ഗാനില്‍ ഉൾപ്പെടെ ഉപയോഗത്തിനുള്ള അനുമതി ഡബ്ല്യുഎച്ച്ഒ ഫെബ്രുവരി 15ന് നൽകിയതോടെ ഒരുക്കങ്ങൾ തകൃതിയായി. 23ന് പ്രസിഡന്റ് അഷ്റഫ് ഘാനിയുടെ കൊട്ടാരത്തിൽനടന്ന ചടങ്ങിൽ ഔദ്യോഗികമായി വാക്സിനേഷനു തുടക്കവും കുറിച്ചു. രണ്ടര ലക്ഷത്തോളം വരുന്ന ആരോഗ്യ പ്രവർത്തകർ, മാധ്യമ പ്രവർത്തകർ, അധ്യാപകർ, സുരക്ഷാ സേനാംഗങ്ങൾ എന്നിവർക്കാണ് ആദ്യഘട്ടത്തിൽ വാക്സീൻ നൽകുക.