കാതലായ പ്രശ്‌നങ്ങള്‍ക്കുനേരെ കണ്ണടച്ചു; കിറ്റും പെന്‍ഷനും വയനാട്ടില്‍ വോട്ടാകുമോ?

വയനാട്ടിലിപ്പോള്‍ വിളവെടുപ്പിന്റെ കാലമാണ്. കാപ്പിയും കുരുമുളകും ഏറെക്കുറെ പറിച്ചു കഴിഞ്ഞു. കൊയ്ത്തും പൂര്‍ത്തിയായി. ഇനി രാഷ്ട്രീയ പാര്‍ട്ടികളുടെ വിളവെടുപ്പാണ്. ആരു കൊയ്യും എന്നതിനെക്കുറിച്ച് ഒന്നും പറയാന്‍ സാധിക്കാത്ത സ്ഥിതി. തൊഴിലുറപ്പ് ഇടങ്ങളിലും കാപ്പി പറിക്കുന്നിടത്തും നെല്ലുകൊയ്യുന്നിടത്തും രാഷ്ട്രീയം ചര്‍ച്ച ചെയ്യപ്പെടുന്നു. ലോക്ഡൗണ്‍ സമയത്ത് ചേര്‍ത്തു പിടിച്ച സര്‍ക്കാരിനെപ്പറ്റി പലരും വാചാലരാകുന്നു. പെന്‍ഷന്‍ തുക കൂട്ടിയതും റേഷന്‍ കിറ്റ് വിതരണം ചെയ്തതും സാധാരണക്കാർക്കു വലിയ ആശ്വാസമായിരുന്നു. അതേസമയം ബദല്‍ പാത, മെഡിക്കല്‍ കോളജ്, റെയില്‍വേ തുടങ്ങിയ ബൃഹദ് പദ്ധതികളിലൊന്നും ഇടതു സർക്കാരിനു കാര്യമായ പുരോഗതി ഉണ്ടാക്കാന്‍ സാധിക്കാത്തതും ചര്‍ച്ച ചെയ്യപ്പെടുന്നു. ഇതിനിടെയാണ് പരിസ്ഥിതി ലോല മേഖല പ്രഖ്യാപനവും ദേശീയപാത 766 ലെ യാത്രാ നിരോധനവും ആശങ്കകള്‍ക്ക് വഴിയൊരുക്കിയത്. 

യുഡിഎഫ് അനുകൂല ജില്ലയായിരുന്നിട്ടും തദ്ദേശ തിരഞ്ഞെടുപ്പില്‍ ഒപ്പം പിടിക്കാൻ എല്‍ഡിഎഫിനായി. അതിനാല്‍ നിയമസഭാ തിരഞ്ഞെടുപ്പിലും നേട്ടം കൊയ്യാനാകുമെന്നാണ് എല്‍ഡിഎഫ് കരുതുന്നത്. അതുകൊണ്ടുതന്നെ വയനാട്ടിലെ തിരഞ്ഞെടുപ്പു രാഷ്ട്രീയത്തിന് പതിവിലും ചൂട് കൂടുതലാണ് ഇത്തവണ. കഴിഞ്ഞ തിരഞ്ഞെടുപ്പിലെ അതേ വാഗ്ദാനങ്ങളും പെന്‍ഷനും റേഷന്‍ കിറ്റുമായിരിക്കും ഇത്തവണത്തെ തിരഞ്ഞെടുപ്പു പ്രചാരണത്തില്‍ മുഴങ്ങിക്കേള്‍ക്കുക. 

അഞ്ചു വര്‍ഷത്തിനുശേഷം വീണ്ടും ഒരു മെഡിക്കല്‍ കോളജ്

വയനാട് മെഡിക്കല്‍ കോളജ് 5 വര്‍ഷത്തിനു ശേഷം രണ്ടാം തവണയും ആരോഗ്യമന്ത്രി കെ.കെ. ശൈലജ ഉദ്ഘാടനം ചെയ്തു. ചന്ദ്രപ്രഭ ചാരിറ്റബിള്‍ ട്രസ്റ്റ് സൗജന്യമായി നല്‍കിയ 50 ഏക്കര്‍ സ്ഥലത്ത് മെഡിക്കല്‍ കോളജ് നിര്‍മിക്കുന്നതിന് 5 വര്‍ഷം മുന്‍പ് അന്നത്തെ മുഖ്യമന്ത്രി ഉമ്മന്‍ ചാണ്ടിയാണ് തറക്കല്ലിട്ടത്. പ്രളയത്തിനു ശേഷം കെട്ടിടം നിര്‍മിക്കാന്‍ സാധിക്കില്ലെന്ന് പഠനം വന്നതോടെ സ്ഥലം ഉപേക്ഷിച്ചു. വയനാട്ടിലെ ഏക സ്വകാര്യ മെഡിക്കല്‍ കോളജ് ആയ ഡിഎം വിംസ് ഏറ്റെടുക്കാന്‍ സര്‍ക്കാര്‍ തയാറായെങ്കിലും അവസാന നിമിഷം പിന്നോട്ടു പോയി. ഇതോടെയാണ് താല്‍ക്കാലികമായി മാനന്തവാടി ജില്ലാ ആശുപത്രി മെഡിക്കല്‍ കോളജായി ഉയര്‍ത്തിയത്. 140 തസ്തികകളും അനുവദിച്ചു. മെഡിക്കല്‍ കോളജിന്റെ രണ്ടാം ഉദ്ഘാടനം രാഷ്ട്രീയ വിവാദങ്ങള്‍ക്ക് വഴിതുറന്നു. കല്‍പറ്റ മണ്ഡലത്തില്‍ തുടങ്ങാനിരുന്ന മെഡിക്കല്‍ കോളജ് മാനന്തവാടിയിലേക്കു മാറ്റിയതാണ് കാരണം. കല്‍പറ്റ എംഎല്‍എ സി.കെ. ശശീന്ദ്രന്‍ ചടങ്ങില്‍ പങ്കെടുക്കാതിരുന്നതും ചര്‍ച്ചയായി. 

ഡോ. ആസാദ് മൂപ്പന്‍ വഞ്ചിച്ചതാണ് ഡിഎം വിംസ് ഏറ്റെടുക്കുന്നതില്‍നിന്നു പിന്‍മാറാന്‍ കാരണമെന്ന് ശശീന്ദ്രന്‍ വെളിപ്പെടുത്തി. കല്‍പറ്റയിലും മാനന്തവാടിയിലും എല്‍ഡിഎഫ് എംഎൽഎമാരാണ്. മെഡിക്കല്‍ കോളജ് മാനന്തവാടിയിലെത്തിക്കാന്‍ സാധിച്ചത് സ്ഥലം എംഎല്‍എ ഒ.ആര്‍. കേളുവിന് വന്‍ നേട്ടമാണ്. അതേസമയം മെഡിക്കല്‍ കോളജ് ജില്ലയുടെ ഒരറ്റമായ മാനന്തവാടിയിലേക്ക് കൊണ്ടുപോയതില്‍ കല്‍പറ്റക്കാരും ബത്തേരിക്കാരും അതൃപ്തരാണ്. മെഡിക്കല്‍ കോളജ് മാനന്തവാടിയില്‍ എല്‍ഡിഎഫിന് ഗുണം ചെയ്യുമെങ്കിലും കല്‍പറ്റയിലും ബത്തേരിയിലും വിപരീത ഫലമുണ്ടാക്കാന്‍ സാധ്യതയുണ്ടെന്ന് രാഷ്ട്രീയ നിരീക്ഷകര്‍ പറയുന്നു. യുഡിഎഫ് നടത്തിയതുപോലെ തിരഞ്ഞെടുപ്പു സമയത്ത് നടത്തിയ ഉദ്ഘാടന മാമാങ്കം മാത്രമാണ് മെഡിക്കല്‍ കോളജ് എന്നും ആരോപണമുണ്ട്. 

വയനാട്ടിലേക്കെന്നും ദുരിത യാത്ര

വയനാട്ടിലേക്കു പ്രവേശിക്കാനുള്ള പ്രധാന പാതയായ വയനാട് ചുരത്തില്‍ നവീകരണ പ്രവൃത്തികള്‍ നടക്കുകയാണ്. ഒരു മാസം റോഡ് അടച്ചു. ചുരം റോഡ് അടയ്ക്കുന്നതോടെ വയനാട്ടുകാര്‍ നേരിടുന്ന പ്രശ്‌നം ചെറുതല്ല. മറ്റൊരു പാത കണ്ടെത്തണമെന്ന പതിറ്റാണ്ടുകളായുള്ള ആവശ്യത്തിന് ഇതുവരെ തീരുമാനവുമായില്ല. നൂറു ദിന പദ്ധതിയുടെ ഭാഗമായി മുഖ്യമന്ത്രി മേപ്പാടി- ആനക്കാംപൊയില്‍ തുരങ്കപാത പ്രഖ്യാപിച്ചു. പ്രാഥമിക പഠനം പോലും നടത്താതെയായിരുന്നു പദ്ധതി പ്രഖ്യാപിച്ചത്. നിബിഡ വനത്തിലൂടെ ഇത്തരത്തിലൊരു തുരങ്കപാത അടുത്തകാലത്തൊന്നും നടക്കാന്‍ പോകുന്നില്ലെന്നാണ് വയനാട്ടുകാര്‍ പറയുന്നത്. അതിനേക്കാള്‍ എളുപ്പത്തില്‍ സാധ്യമാകുമായിരുന്ന പടിഞ്ഞാറത്ത-പൂഴിത്തോട് റോഡ് നിര്‍മാണത്തിന് യാതൊരു നടപടിയും സ്വീകരിച്ചതുമില്ല. വയനാട് ചുരത്തില്‍ ഗതാഗത തടസ്സം നേരിട്ടാല്‍ പിന്നെയുള്ള മാര്‍ഗം കുറ്റിയാടി ചുരം ആണ്. കല്‍പറ്റയില്‍നിന്ന് 72 കിലോമീറ്ററാണ് താമരശേരി വഴി കോഴിക്കോട്ടേക്ക്. കുറ്റിയാടി വഴി 140 കിലോമീറ്ററും. കുത്തനെയുള്ള കയറ്റവും വീതിയില്ലായ്മയും കാരണം വലിയ വാഹനങ്ങള്‍ക്ക് ഇതുവഴി കടന്നുപോകാന്‍ സാധിക്കില്ല. തുരങ്കപാത വരുന്നതോടെ ഗതാഗതപ്രശ്‌നം പരിഹരിക്കപ്പെടുമെന്നാണ് സര്‍ക്കാര്‍ അവകാശവാദമെങ്കിലും പദ്ധതി പ്രാവര്‍ത്തികമാകുമോ എന്ന കാര്യം സംശയമാണ്. നിര്‍ദിഷ്ട ചിപ്പിലിത്തോട്-മരുതിലാവ്-തളിപ്പുഴ ബൈപാസ് യാഥാർഥ്യമാക്കണമെന്നാവശ്യപ്പെട്ട് വയനാട് ചുരം ബൈപാസ് ആക്‌ഷന്‍ കമ്മിറ്റി സമരം തുടങ്ങാനുള്ള നീക്കത്തിലാണ്. 

പാളം തെറ്റിയ റെയില്‍വേ പദ്ധതി

വയനാട്ടുകാര്‍ ഏറെ സ്വപ്‌നം കണ്ടിരുന്ന നഞ്ചന്‍കോട്-വയനാട്-നിലമ്പൂര്‍ റെയില്‍വേ പദ്ധതി അട്ടിമറിച്ചത് ഇടതു സര്‍ക്കാരാണെന്ന്  ആക്ഷേപമുണ്ട്. ഇ. ശ്രീധരന്റെ വെളിപ്പെടുത്തലുകള്‍ ആ വാദം ശരിവയ്ക്കുന്നു. യഥാസമയം ഡിപിആര്‍ പൂര്‍ത്തിയാക്കാനായിരുന്നെങ്കില്‍ ഏറെ വൈകാതെ ട്രെയിന്‍ ഓടിത്തുടങ്ങുമായിരുന്നു എന്ന് അദ്ദേഹം വ്യക്തമാക്കി. മുഖ്യമന്ത്രിക്കും സിപിഎമ്മിനുമുള്ള ചില താല്‍പര്യങ്ങളുടെ പേരിലാണ് ഡിപിആര്‍ തയറാക്കുന്നതു തടഞ്ഞതെന്നും അദ്ദേഹം വെളിപ്പെടുത്തി. ഡിപിആര്‍ തയാറാക്കുന്നതിനുള്ള 2 കോടി രൂപ സര്‍ക്കാര്‍ തടഞ്ഞുവച്ചു. കേന്ദ്ര സര്‍ക്കാര്‍ എല്ലാ അനുമതിയും നല്‍കിയ പദ്ധതി അട്ടിമറിക്കപ്പെട്ടതില്‍ വയനാട്ടുകാര്‍ തീര്‍ത്തും നിരാശരാണ്. വയനാട്ടിലെ ഗതാഗതപ്രശ്‌നത്തിന് ഒരു പരിധിവരെ പരിഹാരമാകുമായിരുന്നു ഈ പദ്ധതി. ബെംഗളൂരുവില്‍നിന്നു കോഴിക്കോട്ടേക്കും കൊച്ചിയിലേക്കും എളുപ്പത്തില്‍ എത്തിച്ചേരാവുന്ന ഈ പാതയിലൂടെ റോ റോ സര്‍വീസ് വഴി ചരക്ക് നീക്കവും സുഗമമാകുമായിരുന്നു. യുഡിഎഫ് സര്‍ക്കാരിന്റെ കാലത്ത് പദ്ധതി എവിടെ നിര്‍ത്തിയോ അവിടെനിന്ന് ഒരിഞ്ചുപോലും മുന്നോട്ടുപോകാന്‍ ഇടതു സര്‍ക്കാരിനായില്ല.