‘വലിയ പാർട്ടികളിൽ അസ്വാരസ്യം പതിവ്; കേരളത്തിൽ ബിജെപി ലക്ഷ്യം പരമാവധി സീറ്റ്’

എന്തു സന്ദേശമാണു ജനങ്ങളോടു ബിജെപി പറയുന്നത്?

വികസനരംഗത്തു കേരളത്തെ തുടർച്ചയായി ഭരിച്ചു പിന്നോട്ടടിപ്പിച്ച ഭരണമാണ് എൽഡിഎഫിന്റേതും യുഡിഎഫിന്റേതും. എങ്ങനെയാണു ബിജെപി നരേന്ദ്ര മോദിയുടെ നേതൃത്വത്തിൽ വ്യത്യാസമുണ്ടാക്കുന്നതെന്നു ജനങ്ങളെ മനസ്സിലാക്കിക്കൊടുക്കും. അമിത് ഷാ, ജെ.പി.നഡ്ഡ എന്നിവരുടെയും നായകത്വത്തിൽ എങ്ങനെയാണ് ഈ രാജ്യത്ത് ഒരു വ്യത്യാസമുണ്ടാക്കിയതെന്നു ജനം തിരിച്ചറിയണം. വലിയ തോതിൽ ഈ രാജ്യത്തെ മാറ്റി. പല പരിഷ്കാരങ്ങളും രാജ്യത്തു നടപ്പായി. മുന്നോട്ടുള്ള വഴി എന്നാണു ബിജെപിയെ വിശേഷിപ്പിക്കാനാകുക. ബിജെപിയാണു പരിഹാരം. ഇത്തരത്തിലുള്ള മാറ്റങ്ങൾ ഇടതു സർക്കാരിനു കേരളത്തിൽ കൊണ്ടുവരാനായിട്ടില്ല. സിപിഎം അടക്കമുള്ള കമ്യൂണിസ്റ്റ് പാർട്ടികൾക്കു നമ്മുടെ രാജ്യത്ത് എല്ലാത്തരത്തിലുള്ള പ്രസക്തിയും നഷ്ടപ്പെട്ടു. രാജ്യത്തിന്റെ മറ്റ് എല്ലാ മേഖലകളിൽനിന്നും അവർ തുടച്ചുനീക്കപ്പെട്ടു. കേരളത്തിൽ മാത്രമാണ് അവർ ശേഷിക്കുന്നതും. അതും ഏതാനും കാലത്തേക്കു മാത്രം.

യുഡിഎഫാകട്ടെ, തികച്ചും ശോചനീയാവസ്ഥയിലാണ്. ഭരണപക്ഷം മാത്രമല്ല, പ്രതിപക്ഷവും പാടേ പരാജയമാണെന്നു തെളിയിച്ച സംസ്ഥാനമാണു കേരളം. പ്രാദേശികമായും ദേശീയതലത്തിലും കോൺഗ്രസിനു ദേശീയ പ്രാധാന്യവും സ്വഭാവവും നഷ്ടമായി. കോൺഗ്രസിനകത്തു നേതൃത്വത്തിനെതിരെ ചോദ്യങ്ങൾ ഉയർന്നുതുടങ്ങി. ഏറെക്കുറെ കോൺഗ്രസ് മുക്ത ഭാരതം എന്ന സ്ഥിതിയിലേക്കു കാര്യങ്ങളെത്തിത്തുടങ്ങി. പുറത്തുനിന്നുള്ളതിനെക്കാൾ, കോൺഗ്രസിനകത്തുനിന്നുതന്നെയുള്ള സ്വാഭാവികപ്രക്രിയയിലൂടെ ആ പാർട്ടി ഇല്ലാതായിക്കൊണ്ടിരിക്കുകയാണ്.

പ്രതിപക്ഷം വേണ്ട എന്നാണോ ഉദ്ദേശിക്കുന്നത്?

ഒരിക്കലുമല്ല. പ്രതിപക്ഷം ജനാധിപത്യത്തിൽ അവിഭാജ്യഘടകമാണ്. എന്നാൽ അതു കോൺഗ്രസിന്റെ സ്വഭാവത്തിലുള്ളതാകരുത്. സ്വാതന്ത്ര്യത്തിനു മുൻപും പിൻപും കോൺഗ്രസുണ്ട്. എന്നാൽ പതിറ്റാണ്ടുകളായി ആ പാർട്ടിയിൽ പുതിയ മുഖങ്ങളില്ലാത്ത അവസ്ഥയാണ്. ഇപ്പോഴും നേതാക്കളുടെ ചിന്തകളെ അടിച്ചേൽപിക്കുന്ന അവസ്ഥയാണു കോൺഗ്രസിൽ. പ്രസക്തിയില്ലാത്ത കാര്യങ്ങൾപോലും ഏറ്റെടുത്തു നടത്താൻ അതിനാൽ കോൺഗ്രസിലെ അണികൾ നിർബന്ധിതരാകുന്നു. മുന്നോട്ടുള്ള യാത്രയിലല്ല കോൺഗ്രസ്. ആ പാർട്ടി നശിച്ചുകഴിഞ്ഞു. ബിജെപി അങ്ങനെയല്ല, രാജ്യത്തിന്റെ ദേശീയത ഉയർത്തിപ്പിടിക്കുമ്പോൾത്തന്നെ സാമൂഹികമായും രാഷ്ട്രീയമായും സാമ്പത്തികമായും മുന്നോട്ടുള്ള അതിവേഗ പ്രയാണമാണു ബിജെപി സാധ്യമാക്കുന്നത്. എല്ലാ വിഭാഗം ജനങ്ങളിലും എത്താൻ ബിജെപിക്കു സാധിക്കുന്നു. അവസരത്തിനൊത്ത് ഉയരുന്നു. എല്ലാ ജനങ്ങളിലും വലിയ പ്രതീക്ഷയാണു ബിജെപിയെക്കുറിച്ചുള്ളത്.

അയൽ രാജ്യങ്ങൾക്കുപോലും കൃത്യമായ സന്ദേശം നൽകാൻ ഇന്നു നമുക്കാകുന്നു. ചൈനയോടു മുഖാമുഖം നോക്കി ഇന്ത്യ സംസാരിച്ചുതുടങ്ങി. മുൻ സർക്കാരുകളെല്ലാംതന്നെ അവരുടെ മേൽക്കോയ്മ അംഗീകരിച്ചാണു കാര്യങ്ങളെ സമീപിച്ചിരുന്നത്. എന്നാൽ ഇന്നു സ്ഥിതി മാറി. നമുക്കു പറയാനുള്ളതു ശക്തമായും വ്യക്തമായും പറയാൻ നമുക്കു സാധിക്കുന്നു. ഇന്ത്യയുടെ ശക്തി അവരെ മനസ്സിലാക്കാൻ നമുക്കു സാധിച്ചു. ഒരുതരത്തിലും നിങ്ങളെക്കാൾ പിന്നിലല്ല ഇന്ത്യയെന്ന ശക്തമായ സന്ദേശം. ലോകത്തുതന്നെ ഇത്രയും കുറഞ്ഞ കാലയളവിനുള്ളിൽ ഇത്രയധികം പരിഷ്കാരങ്ങൾ നടപ്പാക്കിയ മറ്റൊരു സർക്കാരുണ്ടാകില്ല. ഡിജിറ്റൽ മുന്നേറ്റം, ഡിജിറ്റൽ പേമെന്റ്, ഓൺലൈൻ ബാങ്കിങ് സംവിധാനങ്ങൾ, ഇ–വിദ്യാഭ്യാസം, ഇ ഗവേണൻസ്, തിരിച്ചറിയൽ സംവിധാനം, സേവനങ്ങൾ, അക്കൗണ്ട്, വെർച്വൽ ഇടപാടുകൾ, ഡിജിറ്റൽ ഇടപാടുകൾ… പലതും വിശ്വസിക്കാൻപോലും സാധിക്കാത്ത തരത്തിലുള്ള മുന്നേറ്റമാണിത്. വികസിത രാജ്യങ്ങളിൽപോലും ഇത്ര വലിയ തോതിൽ ഡിജിറ്റൈസേഷൻ സാധ്യമായിട്ടുണ്ടാകില്ല.

എന്തു വ്യത്യാസമാണു ബിജെപി കേരളത്തിനായി മുന്നോട്ടുവയ്ക്കുന്നത്?

ദേശീയ ഭരണത്തിലെ വ്യത്യാസം കണ്ടില്ലേ? അത്തരം മാറ്റങ്ങൾ കേരളത്തിലും ബിജെപിക്കു കൊണ്ടുവരാനാകും. വികസനമെന്നതു യഥാർഥ അനുഭവത്തിൽ ജനങ്ങൾക്കു മനസ്സിലാക്കാനാകും. യുവജനവിഭാഗത്തിനും മികച്ച അവസരങ്ങൾ കൊണ്ടുവരാൻ ബിജെപിക്കാകും.

കർണാടക ഐടി മേഖലയെ കോവിഡ് എങ്ങനെ ബാധിച്ചു?

ലോകത്ത് എല്ലായിടത്തെയുമെന്ന പോലെ കോവിഡ് കർണാടകയെയും ബാധിച്ചിട്ടുണ്ട്. പക്ഷേ, ഐടി മേഖലയെ അത്രകണ്ടു ബാധിച്ചെന്നു പറയാനാകില്ല. വീടുകളിലിരുന്നും മറ്റും ജോലി ചെയ്ത് ഐടി വ്യവസായം മുന്നോട്ടുപോകുകയാണ്. ബെംഗളൂരു നഗരത്തിൽ ചെറുകിട വ്യാപാരികളെയും മറ്റും ദോഷകരമായി ബാധിച്ചിട്ടുണ്ട്. കാരണം ആളുകൾ, പ്രത്യേകിച്ചും ഐടി ജീവനക്കാരും മറ്റും വീടുകളിലിരുന്നു ജോലി ചെയ്യുന്നു. അതിനാൽ ഗതാഗത മേഖലയിലും വ്യാപാരമേഖലയിലുമുള്ളവരെ കോവിഡ് ദോഷകരമായി ബാധിച്ചിട്ടുണ്ട്. ഇതു സമയത്തിന്റെ പ്രശ്നമാണ്. കോവിഡ് മാറുന്നതോടെ കൂടുതൽ ഊർജസ്വലമായി കാര്യങ്ങൾ സാധാരണനിലയിലേക്കു തിരിച്ചുവരും.

കർണാടകയിലേക്കു പ്രവേശനത്തിനു കോവിഡ് ടെസ്റ്റ് നിർബന്ധമാക്കിയതു മാറ്റുമോ?

കേരളത്തിൽനിന്നു കർണാടകയിലേക്കു പ്രവേശിക്കുന്നവർക്ക് ആർടിപിസിആർ പരിശോധന നിർബന്ധമാക്കിയതിൽ ഇളവ് അനുവദിക്കും. ഇക്കാര്യത്തിൽ മലയാളികളുടെ ആശങ്ക ഇല്ലാതാക്കും. 72 മണിക്കൂറിനകം കർണാടകയിലെത്തി മടങ്ങുന്നവർക്ക് ആർടിപിസിആർ പരിശോധന നിർബന്ധമാക്കേണ്ടതില്ലെന്ന നിർദേശം ആരോഗ്യമന്ത്രാലയത്തിനു നൽകിയിട്ടുണ്ട്. കാസർകോട്, കണ്ണൂർ, വയനാട് അതിർത്തികളിൽനിന്നു കർണാടകയിൽ തൊഴിൽ, വ്യാപാര, വിദ്യാഭ്യാസ, ചികിത്സാ ആവശ്യങ്ങൾക്കായെത്തി നിശ്ചിത സമയത്തുതന്നെ മടങ്ങുന്നവരെ ഇതു ദോഷകരമായി ബാധിക്കുന്നതു ശ്രദ്ധയിൽ പെട്ടിട്ടുണ്ട്.

പരിശോധനയിൽ കേന്ദ്ര സർക്കാർ മാർഗനിർദേശം പാലിക്കാനാണു തീരുമാനം. പനി, ജലദോഷം, ചുമ, തൊണ്ടവേദന തുടങ്ങിയ രോഗലക്ഷണങ്ങളുമായെത്തുന്നവർക്കു സമയപരിധി നോക്കാതെതന്നെ പരിശോധന നിർബന്ധമാക്കും. എന്നാൽ, 72 മണിക്കൂറിലേറെ സമയം കർണാടകയിൽ ചെലവഴിക്കുന്നവർക്കു പരിശോധന നിർബന്ധമാക്കുമെന്നുതന്നെയാണു നിലവിലെ നിലപാട്. ഈ വിഷയം കോടതിയുടെ പരിഗണനയിൽകൂടിയാണിപ്പോഴുള്ളത്.

English Summary: Interview With Karnataka Minister and BJP's Kerala Election in-charge CN Ashwath Narayan