ഹർഷദ്; നീങ്കൾ നല്ലവരാ കെട്ടവരാ...? ഓർമയുണർത്തി ‘സ്കാം’, ‘ബിഗ് ബുൾ’

പുതുതായി കണ്ടുപിടിച്ച വഴികളിലൂടെ ആയിരുന്നില്ല ഹർഷദിന്റെ വഴി തെറ്റിയ യാത്രകൾ. നിലവിലെ വഴികളിൽ ഉണ്ടായിരുന്ന ചില കുറുക്കു വഴികളിലൂടെ അമിതവേഗത്തിൽ സഞ്ചരിച്ചതായിരുന്നു പ്രശ്നം. മറ്റു പലരും അന്നു ഈ വഴികളിലൂടെ സഞ്ചരിക്കുന്നുണ്ടായിരുന്നു. പക്ഷേ എന്തും ലാർജ് സ്കെയിലിൽ ചെയ്യുന്ന ഹർഷദിന്റെ ഗ്രേഡ് മാർക്ക് രീതിയാണ് വഴി തെറ്റിച്ചത്. സർക്കാർ ബോണ്ടുകളും കടപത്രങ്ങളും ബാങ്കുകൾക്കായി വിൽക്കുകയും വാങ്ങുകയും ചെയ്യുന്ന ഇടനിലയിലായിരുന്നു ഹർഷദ് തട്ടിപ്പ് നടത്തിയത്.

ഹർഷദിന്റെ തട്ടിപ്പിന്റെ രീതി ഇങ്ങനെയായിരുന്നു. എ എന്ന ബാങ്ക് കടപത്രങ്ങൾ വിൽക്കാനും ബി എന്ന ബാങ്ക് അത് വാങ്ങാനും ഉദ്ദേശിക്കുന്നു എന്നു കരുതുക. ഹർഷദ് എ യിൽ നിന്നു കടപത്രങ്ങൾ വാങ്ങുകയും വാങ്ങാൻ പറ്റിയവരെ കണ്ടെത്താൻ അൽപം സമയം ആവശ്യപ്പെടുകയും ചെയ്യുന്നു. ഇതേസമയം തന്നെ ബി ബാങ്കിൽ നിന്നു ഈ കടപത്രത്തിന്റെ പേരിൽ പണം കൈപ്പറ്റുകയും ചെയ്യും.

കടപത്രം നൽകാൻ ബി ബാങ്കിൽ നിന്നും അൽ‍പ്പം സമയം ആവശ്യപ്പെടും. എ ബാങ്കിന്റെ പേരിൽ പണം നൽകുന്നതിനു പകരം ഹർഷദിന്റെ പേരിലാകും ബി ബാങ്ക് പണം നൽകുക. ഈ പണമാണ് ഹർഷദ് ഓഹരി വിപണിയിലേക്ക് ഒഴുകുക. തനിക്ക് ആവശ്യമുള്ള കമ്പനികളിലേക്ക് അനിയന്ത്രിതമായി പണം ഒഴുക്കി അവയുടെ വില കൂട്ടുകയും ആവശ്യത്തിന് ലാഭം നേടുകയും ചെയ്യുമ്പോൾ വിറ്റുമാറുകയുമായിരുന്നു രീതി. ബാങ്കുകളിൽ നിന്നുള്ള പണം ഒഴുക്ക് നിലയ്ക്കാതിരിക്കാൻ മണിചെയ്ൻ പോലെ ഇടപാടുകൾ കൊണ്ടു പോവുകയും ചെയ്തു. അമിത ലാഭം ആഗ്രഹിച്ച് അടുത്ത ഘട്ടത്തിൽ ചെറുകിട ബാങ്കുകളിൽ നിന്നുള്ള വ്യാജ ബാങ്ക് രസീതുകളും ഹർഷദ് ഹാജരാക്കി. ബാങ്ക് ഉദ്യോഗസ്ഥരുടെ സഹായവും ഇതിനുണ്ടായിരുന്നു.

ചില പ്രധാന ബാങ്കുകളിലെ ഇന്റേണൽ ഓഡിറ്റിൽ ഇത്തരം വ്യാജ ബാങ്ക് രസീതുകൾ കണ്ടെത്തിയതോടെയാണ് ഇടപാടുകൾ പുറത്തായത്. തുടർന്ന് എല്ലാ ബാങ്കുകളിലും റിസർവ് ബാങ്ക് പരിശോധനയും നടത്തി. കൈവശമില്ലാത്ത കടപ്പത്രങ്ങൾക്ക് രസീതുകൾ നൽകുകയും വാങ്ങാത്തവയ്‌ക്കു പണം കൊടുക്കുകയും ചെയ്ത ബാങ്കുകളെ ആർബിഐ ഓഡിറ്റർമാർ കണ്ടെത്തി.
ബാങ്കുകളിലെ വെട്ടിപ്പ് മാധ്യമങ്ങളിൽ വാർത്തയായതോടെ ഇൻകംടാക്സ് ഡിപ്പാർട്മെന്റും സിബിഐയും ഹർഷദിന്റെ വീട്ടിലും സ്ഥാപനങ്ങളിലും റെയ്ഡ് നടത്തുകയും ഹർഷദിനെയും അശ്വിനെയും സിബിഐ അറസ്റ്റ് ചെയ്യുകയും ചെയ്തു.

തിരിച്ചുവരവിനും ശ്രമം, ജയിലിൽ മരണം