ചരിത്രം ‘പറന്നു’, റെക്കോർഡുകളുടെ ബഹിരാകാശത്ത് ജെഫ് ബെസോസ്; ഇതെങ്ങനെ?

പൂർണമായും ഓട്ടണമസ് ആയിരുന്നു യാത്ര. അതായത്, ന്യൂഷെപ്പേഡിനെ യാത്രികരിൽ ആരും നിയന്ത്രിക്കേണ്ടി വന്നില്ല. ഭൂമിയിലിരുന്നായിരുന്നു കംപ്യൂട്ടർ വഴി അതിന്റെ നിയന്ത്രണം. യാത്രക്കാർക്ക് ബഹിരാകാശക്കാഴ്ചകൾ കാണാനും പഠിക്കാനും യാത്രയിലുടനീളം അവസരം ലഭിക്കുന്ന അവസ്ഥ. വിശാലമായ കാഴ്ചയ്ക്കു സഹായിക്കും വിധമുള്ള വാതിലുകളും ക്യാപ്‌സൂളിലുണ്ട്. ന്യൂമെക്സിക്കോയിൽനിന്നായിരുന്നു റിച്ചഡ് ബ്രാൻസനും സംഘവും പറന്നത്. ബെസോസാകട്ടെ പടിഞ്ഞാറൻ ടെക്സസിൽനിന്നും. ഗവേഷകരല്ലാതെ സാധാരണക്കാരുമായി, ആദ്യമായിട്ടാണ് ഒരു പൈലറ്റില്ലാ പേടകം ബഹിരാകാശത്തേക്കു കുതിക്കുന്നത്. ബ്ലൂ ഒറിജിൻ കമ്പനിയിലെ വിദഗ്ധരോ ജീവനക്കാരോ ഒപ്പമില്ല.

വിദഗ്ധരുടെ പോലും സഹായമില്ലാതെ ബഹിരാകാശത്തേക്കു പോയി വരാം എന്നാണ് അതിലൂടെ ബെസോസ് വ്യക്തമാക്കുന്നതും. അതേ സമയം വെർജിൻ ഗലാക്റ്റിക്കിന്റെ യാത്രാ സംഘത്തിൽ നാസയിൽനിന്നു വിരമിച്ച നിക്കോളസ് പാട്രിക്ക് ഉൾപ്പെടെ 2 പൈലറ്റുമാരും വെർജിൻ ഗലാക്റ്റിക്കിന്റെ മുഖ്യ ആസ്ട്രോനട്ട് ഇൻസ്ട്രക്ടറും മുഖ്യ ഓപറേഷൻസ് എൻജീനിയറുമെല്ലാമാണ് ഉണ്ടായിരുന്നത്. കുത്തനെ പറന്നുയരുകയും കുത്തനെ വന്നിറങ്ങുകയും ചെയ്യുന്ന വെർട്ടിക്കൽ ടേക്ക് ഓഫ്, വെർട്ടിക്കൽ ലാൻഡിങ് സാങ്കേതിക വിദ്യയിലാണ് ന്യൂ ഷെപ്പേഡിന്റെ പറക്കൽ. അതിനാൽത്തന്നെ നീളൻ റൺവേയും ആവശ്യമില്ല.

എന്നാൽ വിർജിൻ ഗലാക്റ്റിന്റെ വിഎസ്എസ് യൂണിറ്റി എന്ന ബഹിരാകാശ വിമാനം വഹിക്കാൻ ഒരു കാരിയർ വിമാനം വേണമായിരുന്നു. വൈറ്റ്‌നൈറ്റ് 2 എന്ന ആ വിമാനത്തിൽ ആകാശത്തെത്തിച്ച്, വിഎസ്എസ് യൂണിറ്റിയെ ആകാശത്തുവച്ച് ‘റിലീസ്’ െചയ്ത് റോക്കറ്റ് ജ്വലിപ്പിച്ച് ബഹിരാകാശത്തേക്ക് കുതിക്കുന്ന രീതിയായിരുന്നു റിച്ചഡിന്റേത്. അതിനാൽത്തന്നെ കാരിയർ വിമാനത്തിന് റൺവേ അത്യാവശ്യമായിരുന്നു. റിച്ചഡിന്റെയും ബെസോസിന്റെയും ബഹിരാകാശ ദൗത്യങ്ങൾ പക്ഷേ ഭൂമിയുടെ ഭ്രമണപഥത്തിലേക്കു പ്രവേശിക്കുന്നില്ല.

ന്യൂ ഷെപ്പേഡ് സമുദ്രനിരപ്പില്‍നിന്ന് ഏകദേശം 100 കിലോമീറ്റർ ഉയരെയുള്ള കാർമൻ രേഖ കടന്നു പോവുകയാണു ചെയ്യുന്നത്. 106 കിലോമീറ്റര്‍ വരെ എത്തിയെന്നും കരുതുന്നു. രാജ്യാന്തര തലത്തിൽ ബഹിരാകാശ അതിർത്തിയായി നിർണയിച്ചിരിക്കുന്ന രേഖയാണിത്. യാത്രയ്ക്കു ശേഷം മണിക്കൂറിൽ 1.6 കിലോമീറ്റർ വേഗത്തിലായിരുന്നു ക്രൂ ക്യൂപ്സൂളുമായുള്ള പാരച്യൂട്ട് ടെക്സസിലെ മരുപ്രദേശത്തു തിരികെ ലാൻഡ് ചെയ്തത്. വെർജിൻ ഗലാക്റ്റിക്കിന്റെ ഫ്ലൈറ്റ് സമുദ്രനിരപ്പിൽനിന്ന് 86 കിലോമീറ്റർ ഉയരെ വരെയാണ് എത്തിയത്.

ആരുണ്ടാകും ആകാശത്ത് സഹായിക്കാൻ?

അതേസമയം ബ്ലൂ ഒറിജിൻ കമ്പനിയിലെ വിദഗ്ധരെ യാത്രയിൽ ഉൾപ്പെടുത്താത്തിനെതിരെ കമ്പനിയിൽതന്നെ മുറുമുറുപ്പുണ്ട്. ആറു പേർക്ക് യാത്ര ചെയ്യാം ന്യൂ ഷെപ്പേഡിൽ. എന്നാൽ പോയത് നാലു പേർ മാത്രം. ഉപയോക്താവിന് കൂടുതൽ മെച്ചപ്പെട്ട അനുഭവം ഉറപ്പാക്കാനാണത്രേ ഇത്. എന്നാൽ കമ്പനി വിദഗ്ധർ കൂടിയുണ്ടായിരുന്നെങ്കിൽ ആവശ്യം വേണ്ട ഡേറ്റ ശേഖരിക്കാനും ടെക്നിക്കൽ പ്രശ്നങ്ങൾ മനസ്സിലാക്കാനും സാധിക്കുമായിരുന്നു. കമ്പനിയുടെ കന്നിയാത്രയാണ് ഇതെന്നും ഓർക്കണം. വരുംകാല യാത്രകളിൽ നിർണായകമായേനെ ഇത്തരത്തിൽ ശേഖരിക്കുന്ന ഡേറ്റ.

മണിക്കൂറിൽ 3540 കിലോമീറ്റർ വേഗത്തിലാണ് പേടകത്തിന്റെ യാത്ര. അതിനാൽത്തന്നെ കൂട്ടത്തിൽ ഒരു ആസ്ട്രോനോട്ട് കൂടിയുണ്ടായിരുന്നെങ്കിൽ യാത്രക്കാർ കുറച്ചുകൂടി ‘കംഫർട്ടബ്ള്‍’ ആയിരുന്നേനെയെന്നും വിദഗ്ധർ പറയുന്നു. രണ്ടു ദിവസത്തെ പരിശീലനത്തിനു ശേഷമാണ് സംഘത്തിന്റെ യാത്ര. യാത്രക്കാരെ സഹായിക്കാൻ താഴെ രണ്ട് സ്റ്റാഫ് അംഗങ്ങളുണ്ടായിരുന്നു. യാത്രയിലുടനീളം ഇവർക്ക് ഹെഡ്സെറ്റിലൂടെ നിർദേശങ്ങൾ ലഭിച്ചുകൊണ്ടേയിരുന്നു. ‘ഒരു അമ്യൂസ്മെന്റ് പാർക്കിലെ റൈഡ് പോലെ സുഖപ്രദം..’ എന്നാണ് കമ്പനി വക്താവ് പറയുന്നത്. എന്നാൽ മേഖലയിലെ വിദഗ്ധർക്ക് മറ്റൊരു ആശങ്കയുമുണ്ടായിരുന്നു.

ബഹിരാകാശത്ത് അൽപ സമയത്തേക്ക് ക്യൂപ്സൂളിലെ സീറ്റുമായി ബന്ധിപ്പിച്ചിരിക്കുന്ന ബെൽറ്റ് സംഘാംഗങ്ങള്‍ വിടുവിക്കും. സീറോ ഗ്രാവിറ്റിയിൽ ക്യാപ്സൂളിൽ പറക്കുന്ന ആ സമയത്താണു പ്രശ്നം. ഇതാദ്യമായിട്ടായിരിക്കും ഇത്തരമൊരു അനുഭവത്തിലേക്ക് സംഘമെത്തുക. അതിനാൽത്തന്നെ മാനസികമായ ആവേശത്തള്ളിച്ചയിൽ ചില നിർണായക നിർദേശങ്ങൾ പോലും ശ്രദ്ധിക്കാനാകാതെ വരും. അസാധാരണ ശബ്ദങ്ങൾ ഭയപ്പെടുത്തും. യാത്രികൾ ബോധംകെടാനോ പരുക്കേൽക്കാനോ സാധ്യതയുണ്ട്. ഇത്തരം ഘട്ടങ്ങളിലെല്ലാം പരിശീലനം ലഭിച്ച ഒരു ബഹിരാകാശ യാത്രികൻ ഒപ്പമുണ്ടാകുന്നത് ഏറെ സഹായിക്കും– വിദഗ്ധർ നിരീക്ഷിക്കുന്നു. ഇത്തരമൊരു അനുഭവം സംഘത്തിന് ഉണ്ടായിരുന്നോയെന്ന് വരുംനാളുകളിൽ വ്യക്തമാകും. എന്നാൽ ക്രൂ ക്യാപ്സൂളിൽനിന്നിറങ്ങിയ നാലു യാത്രികരുടെയും മുഖം വിളിച്ചു പറഞ്ഞത് യാത്രയിൽ യാതൊരു കുഴപ്പവുമില്ലായിരുന്നു എന്നാണ്. കൗബോയ് തൊപ്പിവച്ച് ചിരിച്ചായിരുന്നു ജെഫ് പുറത്തിറങ്ങിയതുതന്നെ.

കൂട്ടത്തിൽ വാലി ഫങ്കിനു മാത്രമാണ് അൽപമെങ്കിലും പരിശീലനം ലഭിച്ചിരുന്നത്. അതുപക്ഷേ 1960കളിലായിരുന്നു. അതിനു ശേഷമുണ്ടായ മാറ്റങ്ങൾ അത്രയേറെയാണ്. ‘സാധാരണക്കാരനു പോലും എളുപ്പത്തിൽ പോയി വരാനാകുന്ന ഇടമാണ് ബഹിരാകാശം എന്നു കാണിക്കുകയാണ് ഞങ്ങളുടെ ലക്ഷ്യം...’ എന്നാണ് യാത്രയെപ്പറ്റി ബ്ലൂ ഒറിജിൻ വക്താവ് പറഞ്ഞത്. അതിനാൽത്തന്നെ യാത്രികന് ഒരു ചെറിയ പ്രശ്നം പോലും വരാത്ത നിധം സംരക്ഷണം ഉറപ്പു വരുത്തേണ്ടത് കമ്പനിയുടെ ആവശ്യവുമാണ്. ഈ ആത്മവിശ്വാസത്തിന്റെ ബലത്തിലായിരുന്നു വിദഗ്ധരുടെ പിന്തുണയില്ലാതെയുള്ള ന്യൂ ഷെപ്പേഡിലെ യാത്രയും.

തീപാറുന്ന ടൂറിസം!

‘ബഹിരാകാശത്തുനിന്ന് ഭൂമിയെ കാണുന്നത് നിങ്ങളുടെ കാഴ്ചപ്പാട് തന്നെ മാറ്റിക്കളയും. അതു ഭൂമിയുമായുള്ള നിങ്ങളുടെ ബന്ധത്തെ മാറ്റിമറിക്കും, കൂടുതൽ മനുഷ്വത്വപരമായി മാറും ആ ബന്ധം..’ കഴിഞ്ഞ മാസം ഒരു വിഡിയോ സന്ദേശത്തിൽ ബെസോസ് പറഞ്ഞതാണിത്. ന്യൂ ഷെപ്പേഡിന്റെ വിജയകരമായ ഈ യാത്രയ്ക്കൊടുവിൽ മറ്റൊന്നു കൂടി മാറിമറിയുമെന്നത് ഉറപ്പ്– ടൂറിസത്തിന്റെ പരമ്പരാഗത മുഖം. ടെക്ക് ലോകത്തെ മറ്റൊരു ശതകോടീശ്വരനായ ഇലൻ മസ്ക്കും ബഹിരാകാശ ടൂറിസത്തിലേക്കിറങ്ങുകയാണ്. അദ്ദേഹത്തിന്റെ കമ്പനി സ്പേസ് എക്സിന്റെ ക്രൂ ഡ്രാഗൺ ക്യാപ്സൂളിൽ അയക്കുന്നവർക്ക് ദിവസങ്ങൾ നീളുന്ന ബഹിരാകാശ അനുഭവമാണു വാഗ്ദാനം. മാത്രവുമല്ല, ഭൂമിയുടെ ഭ്രമണപഥത്തിലേക്കു കടക്കുകയും ചെയ്യും.

‘ഞാനിതൊരു മത്സരമായല്ല കാണുന്നത്. ബഹിരാകാശത്തേക്ക് ഒരു പാതയൊരുക്കുകയാണ്. അതുവഴി വരുംതലമുറയ്ക്ക് ബഹിരാകാശത്ത് അതുല്യമായ കാര്യങ്ങൾ ചെയ്യാനാകും...’ അൻപത്തിയേഴുകാരനായ അമേരിക്കൻ കോടീശ്വരൻ ബെസോസ് ഇങ്ങനെ പറയുന്നുണ്ടെങ്കിലും, ഇനി താണ്ടാൻ വൻകരകൾ മാത്രമല്ല നീലാകാശവുമുണ്ടെന്ന വെല്ലുവിളി മനുഷ്യനു മുന്നിലേക്കു വയ്ക്കുകയാണ് ഈ പദ്ധതികളുടെയെല്ലാം ലക്ഷ്യമെന്നത് നീലാകാശംപോലെ വ്യക്തം. സ്വിസ് ബാങ്കായ യുബിഎസിന്റെ നിഗമനം പ്രകാരം അടുത്ത ഒരു ദശാബ്ദത്തിനിടെ പ്രതിവർഷം 300 കോടി ഡോളർ മൂല്യമുള്ള ബിസിനസ് എന്ന കണക്കിലായിരിക്കും ബഹിരാകാശ ടൂറിസം മേഖലയിൽ ഇടപാട് നടക്കുക. യാത്രികരെ തേടിയുള്ള പോരാട്ടത്തിന്റെ മുൻനിരയിലുണ്ടാകുന്നതാകട്ടെ ലോക കോടീശ്വരന്മാരുടെ കമ്പനികളും. ബഹിരാകാശത്തേക്കുള്ള യാത്രയ്ക്കു വേണ്ടി, ഭൂമിയിൽ തീപാറുമെന്നത് ഉറപ്പ്.

ബ്ലൂ ഒറിജിന്റെ ആദ്യയാത്രയ്ക്കുതന്നെ ഏകദേശം 143 രാജ്യങ്ങളിലെ 6000 പേരാണ് ലേലത്തിൽ പങ്കെടുത്തത്. അതിൽതന്നെ ഏറ്റവും ഉയർന്ന തുകയായ 206 കോടി രൂപ മുന്നോട്ടുവച്ച വ്യക്തിയാണ് ‘സമയമില്ലാത്ത’ കാരണത്താൽ പിന്മാറിയത്. സെപ്റ്റംബർ–ഒക്ടോബറിലായി അടുത്ത യാത്രയുമുണ്ടാകും. പിന്മാറിയ അജ്ഞാതനും ഒരുപക്ഷേ ആ യാത്രയിലുണ്ടാകുമെന്നും ബ്ലൂ ഒറിജിൻ ചീഫ് എക്സിക്യുട്ടിവ് ബോബ് സ്മിത്ത് പറയുന്നു. പൊതുജനത്തിന് ഇനി എന്നാണ് ബഹിരാകാശത്തേക്ക് വിനോദയാത്ര പോകാനാവുക? എത്ര രൂപയുടെ പാക്കേജായിരിക്കും ലഭ്യമാക്കുക? യാത്രികർക്കുള്ള മാനദണ്ഡങ്ങൾ, യോഗ്യത... ചോദ്യങ്ങളേറെയാണ് ജെഫ് ബെസോസിനൊപ്പം ബഹിരാകാശത്തേക്ക് ഉയരുന്നത്. വരുംനാളുകളിൽ ഉറപ്പായും ലഭിക്കും, ഇവയ്ക്കെല്ലാമുള്ള ഉത്തരം.

English Summary: What are World's Richest Man Jeff Bezos' Plans in First Space Flight and Blue Origin's Dreams on Space Tourism?