‘അന്തിമയുദ്ധത്തിന് ആയുധം സംഭരിച്ചിരുന്നു താലിബാന്‍; തകരാം യുഎസ്–പാക്ക് ബന്ധവും’

അമേരിക്കയുടെ അധിനിവേശത്തെത്തുടർന്ന് മരണ സംഘങ്ങളുണ്ടാക്കുകയും ആളുകളെ കൂട്ടമായി തലയറുത്ത് കൊലപ്പെടുത്തിയ ശേഷം അതിന്റെ വിഡിയോ പുറത്തു വിടുകയും ചെയ്തിരുന്നു ഈ ഭീകര ശൃംഖല. ആത്മീയവും രാഷ്ട്രീയവും സൈനികവുമായ അധികാരം കയ്യാളുന്ന ഇപ്പോഴത്തെ താലിബാൻ പരമോന്നത നേതാവ് ശരിയത്ത് ഭരണം നടപ്പാക്കുമെന്നും ഉറപ്പിച്ചു കഴിഞ്ഞു.

അന്തിമ യുദ്ധത്തിനായി താലിബാൻ വർഷങ്ങളായി തയാറെടുപ്പ് നടത്തിയിരുന്നു. രാജ്യത്തിന്റെ പല ഭാഗങ്ങളിലും സമീപ നഗര പ്രദേശങ്ങളിലും അവർ വേരുറപ്പിച്ചു. അഫ്ഗാൻ സേനയിൽനിന്നു വൻതോതിൽ ആയുധശേഖരങ്ങൾ പിടിച്ചെടുത്തു സംഭരിച്ചുവയ്ക്കുകയും ചെയ്തു. സാമ്പത്തിക സ്രോതസ് വിപുലീകരിക്കാൻ പല മാർഗങ്ങൾ സ്വീകരിച്ചിരുന്ന അവർ മയക്കുമരുന്നു കടത്തിനുമപ്പുറം സമ്പന്നമായ സായുധസേനാവിഭാഗത്തെ സൃഷ്ടിക്കുകയായിരുന്നു. അതുകൊണ്ടുതന്നെ താലിബാന്റെ മുന്നേറ്റം ശൂന്യതയിൽനിന്നുണ്ടായതല്ല.

നേറ്റോ യുദ്ധം ഔദ്യോഗികമായി 2014ൽ സമാപിച്ചതിനു ശേഷം ക്രമസമാധന ചുമതലയേറ്റ അഫ്ഗാൻ സൈന്യത്തിന് മുന്നിൽ നിന്നു പ്രക്ഷോഭങ്ങളെ നേരിടാൻ കഴിഞ്ഞില്ല. അമേരിക്കയുടെ സാമ്പത്തിക സഹായവും ഉപദേശവും പരിശീലനവും ഉണ്ടായിട്ടുപോലും... അഫ്ഗാൻ സൈന്യത്തിലെ ഏറ്റവും കരുത്തുറ്റ വിഭാഗമായിരുന്ന അഫ്ഗാൻ സ്പെഷൽ ഫോഴ്സിനെ അമിതമായി ജോലി ചെയ്യിക്കുകയും അതു വഴി അവരെ ശാരീരികമായി തളർത്തുകയും ചെയ്തു.

താലിബാന്റെ ആക്രമണങ്ങൾ വർധിച്ചിട്ടും സൈന്യം വേണ്ടത്ര ആയുധങ്ങൾ ലഭിക്കാതെയും കൃത്യമായി ശമ്പളം ലഭിക്കാതെയും ബുദ്ധിമുട്ടി എന്നതും തകർച്ചയ്ക്ക് ആക്കം കൂട്ടി. ഭരണതലത്തിലുണ്ടായ അഴിമതിയുടെ കാഠിന്യം മൊത്തം സംവിധാനത്തെ തളർത്തി. ലഹളകൾ ഒതുക്കാനുള്ള തന്ത്രം മെനയേണ്ട ഭരണകൂടത്തിൽനിന്നു വേണ്ടത്ര പിന്തുണ ലഭിച്ചതുമില്ല. അമേരിക്ക പിന്മാറുകയാണെന്ന പ്രഖ്യാപനം താലിബാനും അനുകൂല ശക്തികൾക്കും കരുത്തു പകർന്നപ്പോൾ അഫ്ഗാനിസ്ഥാൻ പട്ടാളത്തിന്റെ ആത്മവിശ്വാസം കെടുത്തുന്നതായി പരിണമിച്ചു.

ശക്തമായ രാഷ്ട്രീയ നേതൃത്വത്തിന്റെ അഭാവവും വ്യക്തമായ തന്ത്രങ്ങളിലെ പാളിച്ചയും കൂടിയായപ്പോൾ മുന്നേറിയെത്തിയ താലിബാന്റെ മുൻപിൽ അവർ ഉരുകിയൊലിച്ചു പോയി. യുഎസ് പിൻമാറിയില്ലായിരുന്നുവെങ്കിലും അഫ്ഗാൻ ഭരണകൂടം അസ്ഥിരതയിലേക്കു കൂപ്പുകുത്തിക്കൊണ്ടിരിക്കുകയായിരുന്നു. 2020ൽ ട്രംപ് പ്രഖ്യാപിച്ച സേനാ പിന്മാറ്റത്തോട് ക്രിയാത്മകമായി പ്രതികരിക്കാൻ താലിബാൻ തയാറായില്ല. റെക്കോർഡ് തകർക്കുന്ന രീതിയിലുള്ള കൊലപാതകങ്ങളും സാധാരണ ജനങ്ങൾക്കു നേരെയുള്ള ആക്രമണങ്ങളും വർധിച്ചുവന്നു.

യുഎസ് ഇനി എന്തു ചെയ്യും?

യുഎസ് നേരത്തേ നൽകിക്കൊണ്ടിരുന്ന സാമ്പത്തിക സഹായം അഫ്ഗാനിസ്ഥാനു തുടർന്നും ലഭിക്കണമെങ്കിൽ താലിബാൻ ഭരണകൂടത്തിന് അംഗീകാരം നൽകേണ്ടിവരും. എന്നാൽ, താലിബാൻ ക്രൂരത തുടരുകയും താലിബാന്റേതല്ലാത്ത നേതാക്കളെ ഭരണത്തിൽ ഉൾപ്പെടുത്തുകയും ചെയ്തില്ലെങ്കിൽ അംഗീകാരം നൽകാൻ യുഎസ് തയാറാകില്ല. കൂടാതെ രാജ്യത്തിന്റെ പല ഭാഗങ്ങളിൽ ചിതറിപ്പോയ അഭയാർഥികളായി മാറിയവർക്കു നേരെയുള്ള ആക്രമണം അവസാനിപ്പിക്കുകയും വേണം.

സമാധാന മാർഗത്തിലേക്കെത്താൻ താലിബാന് ഒട്ടേറെ അവസരങ്ങൾ ലഭിച്ചതാണ്. 2020ലെ ഒത്തുതീർപ്പിനു ശേഷവും പ്രതികാര നടപടികളുടെ ഭാഗമായി കൊലപാതകങ്ങളും കീഴടങ്ങുന്ന പട്ടാളക്കാരെ വധശിക്ഷയ്ക്കു വിധേയമാക്കലുമാണ് അവിടെ നടക്കുന്നത്. സമാധാനത്തെപ്പറ്റി വായ്നിറയെ സംസാരിക്കുന്ന താലിബാന്റെ പ്രവർത്തനങ്ങൾ സമാധാനശ്രമങ്ങളെ പരിഹസിക്കുന്നതാണ്.

അനിവാര്യമെങ്കിൽ വാഷിങ്ടണ് താലിബാന്റെ നിയമസാധുതതന്നെ ഇല്ലാതാക്കാൻ കഴിയും. രാജ്യത്തിനകത്തും പുറത്തുമുള്ള മാധ്യമങ്ങളുമായി ബന്ധപ്പെടുന്നത് തടയാൻ കഴിയും. താലിബാനുമായുള്ള വാണിജ്യ ബന്ധം പൂർണമായി നിർത്തലാക്കാൻ അതിർത്തി രാജ്യങ്ങളോട് ആവശ്യപ്പെടുകയും ചെയ്താൽ അഫ്ഗാൻ ഒറ്റപ്പെടും.

അമേരിക്ക മറ്റു രാജ്യങ്ങളെ വിളിച്ചു കൂട്ടി അഫ്ഗാനിസ്ഥാൻ വിഷയത്തിൽ ഉച്ചകോടി നടത്തേണ്ടത് അത്യാവശ്യമാണെന്ന് എനിക്കു തോന്നുന്നു. അമേരിക്കയ്ക്ക് അഫ്ഗാനിൽ കടിച്ചു തൂങ്ങിക്കിടക്കുന്നതിനേക്കാൾ മറ്റു വിഷയങ്ങളിൽ നോട്ടം എത്തിക്കേണ്ടതുണ്ട്. ചൈനയുമായുള്ള തന്ത്രപ്രധാനമായ മത്സരം, ആഗോള ഭീകര പ്രവർത്തനം, കാലാവസ്ഥാ വ്യതിയാനം എന്നിവയിൽ ശ്രദ്ധ കേന്ദ്രീകരിക്കേണ്ടതുണ്ട്.

താലിബാനും മയക്കുമരുന്നും... പാക്ക് നിലപാട് എന്താണ്?

അനധികൃത മയക്കുമരുന്നു കടത്തിന് സഹായം ചെയ്തു കൊടുക്കുന്നതാണ് താലിബാന്റെ പ്രധാന വരുമാന മാർഗം. അവരുടെ നിയന്ത്രണത്തിലുള്ള പ്രദേശങ്ങളിലെ പോപ്പി കൃഷിക്കാരിൽനിന്നും ഹെറോയിൻ ഉൽപാദകരിൽ നിന്നും നികുതി പിരിക്കുന്നുണ്ട്. ഇന്ധന വ്യാപാരികൾ, അനധികൃത ഖനനം നടത്തുന്നവർ തുടങ്ങിയവരിൽനിന്ന് വൻതോതിൽ നികുതി ഈടാക്കുന്നതിലൂടെയും വൻ വരുമാനമാണ് ലഭിക്കുന്നത്. വർഷം തോറും 11,000 കോടിയിലേറെ രൂപ ഈയിനത്തിൽ താലിബാനു ലഭിക്കുന്നതായാണ് നേറ്റോയുടെ പഠനത്തിൽ കണ്ടെത്തിയത്.