‘വന്ദേഭാരത് ട്രെയിനുകൾ പ്രഖ്യാപിച്ച സാഹചര്യത്തിൽ കെ–റെയിലിൽനിന്ന് പിന്മാറാം’

കോഴിക്കോട്∙ കേന്ദ്രബജറ്റ് രാജ്യവികസനത്തിനും കുതിച്ചുചാട്ടത്തിനും സഹായകരമായതാണെന്നു ബിജെപി സംസ്ഥാന പ്രസിഡന്റ് കെ.സുരേന്ദ്രൻ. കോവിഡിനിടയിലും രാജ്യത്തിന്റെ സുസ്ഥിരത വെളിവാക്കുന്ന ബജറ്റാണിത്. അടിസ്ഥാന സൗകര്യവികസനമേഖലയിൽ കുതിച്ചുചാട്ടമുണ്ടാവും. ഗ്രാമീണവികസനം മുതൽ വിമാനത്താവള വികസനം വരെ ഉൾക്കൊള്ളിച്ചിട്ടുണ്ട്. എല്ലാ സംസ്ഥാനങ്ങളോടും തുല്യമായ നീതി നടപ്പാക്കുന്ന ബജറ്റാണ് പ്രഖ്യാപിച്ചതെന്നും സുരേന്ദ്രൻ പറഞ്ഞു.

കെ–റെയിൽ പോലുള്ള വലിയ പദ്ധതികളല്ല ആവശ്യം. കൂടുതൽ വേഗത്തിലോടുന്ന വന്ദേഭാരത് ട്രെയിനുകളാണ് കേരളത്തിനാവശ്യം. സംസ്ഥാനത്തിന് ട്രെയിനുകൾ അനുവദിക്കും. ഈ വർഷം 75 ട്രെയിനുകൾ പുറത്തിറങ്ങുമെന്ന് അറിയിച്ചിട്ടുണ്ട്. റെയിൽവേ മന്ത്രിയുമായി നാലിന് കേരളത്തിലെ ബിജെപി നേതാക്കൾ ചർച്ച നടത്തുന്നുണ്ട്. വന്ദേഭാരത് ട്രെയിനുകൾ പ്രഖ്യാപിച്ച സാഹചര്യത്തിൽ കേരളത്തിന് കെ–റെയിലിൽനിന്ന് പിൻമാറാമെന്നും സുരേന്ദ്രൻ പറഞ്ഞു. കെ–റെയിൽ നടപ്പാക്കാൻ ബിജെപി അനുവദിക്കില്ല. സമരങ്ങൾ ശക്തിപ്പെടുത്തും. ഇത്തരമൊരു ഹിമാലയൻ മണ്ടത്തരത്തിനു റെയിൽവേ മന്ത്രാലയം അനുമതി നൽകില്ല.

പിഎംഎവൈ ആവാസ് യോജനയിലൂടെ വീടില്ലാത്തവർക്കു ആശ്വാസമേകാൻ പണമനുവദിച്ചിട്ടുണ്ട്. ഡിജിറ്റൽ വിദ്യാഭ്യാസ നയം കേരളത്തിന് ഏറെ സഹായകമാണ്. ഡിജിറ്റൽ കറൻസിക്ക് ആർബിഐ അംഗീകാരം നൽകിയതോടെ വലിയ കുതിച്ചുചാട്ടമുണ്ടാവും. രാജ്യത്തെ ജനങ്ങളെ സംതൃപ്തിപ്പെടുത്തുന്ന ബജറ്റാണ് അവതരിപ്പിച്ചതെന്നും കെ.സുരേന്ദ്രൻ പറഞ്ഞു. സർക്കാർ ചിലകാര്യങ്ങൾ മുൻകൂട്ടി കണ്ടുകൊണ്ടാണ് ലോകായുക്തയുടെ അധികാരം എടുത്തുകളയുന്നത്. മുഖ്യമന്ത്രിക്കെതിരെ ഉടനെ ചില കേസ് വരുമെന്നറിഞ്ഞാണ് പുതിയ നീക്കം.