‘തിരഞ്ഞെടുപ്പ് പ്രലോഭനം അതിജീവിച്ച ബജറ്റ്; വളർച്ചാ കണക്കിൽ പൂർണവിശ്വാസം വേണ്ട’

കേന്ദ്ര മന്ത്രി നിർമല സീതാരാമൻ പാർലമെന്റിൽ അവതരിപ്പിച്ച ബജറ്റിനെക്കുറിച്ച് ധനകാര്യ വിദഗ്ധനും ഗുലാത്തി ഇൻസ്റ്റിറ്റ്യൂട്ട് ഓഫ് ഫിനാൻസ് ആൻഡ് ടാക്സേഷൻ മുൻ സീനിയർ ഫാക്കൽറ്റിയുമായ ഡോ. ജോസ് സെബാസ്റ്റ്യൻ മനോരമ ഓൺലൈനിനോടു പ്രതികരിക്കുന്നു:

രാജ്യത്തിലെ അഞ്ചു പ്രമുഖ സംസ്ഥാനങ്ങളിൽ തിരഞ്ഞെടുപ്പു പ്രഖ്യാപിച്ചിരിക്കുന്ന സാഹചര്യത്തിലാണ് ധനമന്ത്രി നിർമല സീതാരാമൻ കേന്ദ്ര ബജറ്റ് അവതരിപ്പിച്ചിരിക്കുന്നത്. സ്വാഭാവികമായി ധാരാളം ക്ഷേമ പദ്ധതികൾ ബജറ്റിൽ നിറയേണ്ടതാണ്. തിരഞ്ഞെടുപ്പു ജയത്തിനായി ജനപ്രിയ പ്രഖ്യാപനങ്ങൾ നടത്താനുള്ള പ്രലോഭനം ഭരണത്തിലിരിക്കുന്ന ഏതു സർക്കാരിനും ഉണ്ടാകും. എന്നാൽ രാജ്യത്തിന്റെ സാമ്പത്തിക സ്ഥിതി അതിന് അനുകൂലമല്ലെന്ന തിരിച്ചറിവിൽ അത്തരം പ്രലോഭനങ്ങളെ അതിജീവിക്കാൻ ധനമന്ത്രിക്കു കഴിഞ്ഞിരിക്കുന്നു. 

റവന്യൂ കമ്മി 6.8 ശതമാനമായി ഉയർന്നു നിൽക്കുന്ന ഒരു രാജ്യത്ത് അത്തരം പ്രഖ്യാപനങ്ങൾ വലിയ പണപ്പെരുപ്പത്തിനു വഴിവയ്ക്കുമായിരുന്നു. അടിസ്ഥാന സൗകര്യ വികസനത്തിന് ഊന്നൽ നൽകുന്ന ബജറ്റാണ് ഇപ്പോൾ അവതരിപ്പിച്ചിരിക്കുന്നത്. അതു പതിയെ ആണെങ്കിലും സാധാരണക്കാരുടെ കയ്യിലേക്കു പണം എത്തിക്കാൻ സഹായകമാണ്. അതുകൊണ്ടുതന്നെ സ്വാഗതം ചെയ്യേണ്ട ബജറ്റാണിത്. 

‘എല്ലാം കണ്ണടച്ചു വിശ്വസിക്കേണ്ട’

ഈ ബജറ്റിന്റെ  ലക്ഷ്യം ഉൽപാദന രംഗത്തെ വളർച്ചയും അടിസ്ഥാന സൗകര്യ വികസനവുമാണ്. വളരുന്ന സാമ്പത്തിക ഘടനയിലേ ക്ഷേമപദ്ധതികൾ യാഥാർഥ്യമാകൂ എന്ന സങ്കൽപവും ബജറ്റ് പങ്കു വയ്ക്കുന്നു. കോവിഡ് മഹാമാരിയെ നമ്മുടെ സമ്പദ്ഘടന ചെറുത്തു നിൽക്കുന്നുണ്ടെന്നാണ് ബജറ്റിലെ സ്ഥിതിവിവരക്കണക്കുകൾ വ്യക്തമാക്കുന്നത് എന്നാൽ വളർച്ചാ നിരക്കിലെ കണക്കുകളിൽ പൂർണമായി വിശ്വസിക്കേണ്ടതില്ല. അതിൽ കൃത്രിമങ്ങൾക്കു സാധ്യതയുണ്ട്. റവന്യൂ കമ്മി 6.8 ശതമാനമായി ഉയർന്നു നിൽക്കുന്നുവെന്നതും കാണാതിരുന്നു കൂടാ.