ആ പേടിയിലാണ് പഞ്ചാബിൽ ആം ആദ്മി; ബിജെപി സ്വപ്നം ‘59ൽ’, സിദ്ദുവിന് ആശങ്ക

ഒറ്റഘട്ടത്തിൽത്തന്നെ വോട്ടെടുപ്പ് പൂർത്തിയായതോടെ പഞ്ചാബിലെ രാഷ്ട്രീയക്കളത്തിൽ ഇനി കാത്തിരിപ്പിന്റെ നാളുകൾ. കഴിഞ്ഞ ഏതാനും ആഴ്ചകൾ കൊണ്ടും കൊടുത്തും പോരടിച്ച നേതാക്കൾക്ക് ഇനി മാർച്ച് 10നു ഫലം വരുന്നതു വരെ വിശ്രമിക്കാം. വോട്ട് രേഖപ്പെടുത്തിയ ശേഷം നേതാക്കളെല്ലാം വിജയപ്രതീക്ഷ പങ്കുവച്ചു. കോൺഗ്രസ് മൂന്നിൽ രണ്ട് ഭൂരിപക്ഷത്തിൽ ഭരണം നിലനിർത്തുമെന്ന് മുഖ്യമന്ത്രി ചരൺജിത് സിങ് ഛന്നി. ശിരോമണി അകാലിദൾ – ബിഎസ്പി സഖ്യം 80 സീറ്റുകൾ നേടുമെന്ന് അകാലിദൾ നേതാവ് സുഖ്ബീർ സിങ് ബാദൽ ആവേശത്തോടെ പറയുന്നു. ഇത്തവണ ആം ആദ്മി പാർട്ടി അധികാരം പിടിക്കുമെന്ന കാര്യത്തിൽ അവരുടെ മുഖ്യമന്ത്രി സ്ഥാനാർഥി ഭഗവന്ത് സിങ് മാന് തെല്ലുമില്ല സംശയം. 

ചങ്കിടിപ്പിൽ നേതാക്കൾ

പുറമെ ആത്മവിശ്വാസം പ്രകടിപ്പിക്കുമ്പോഴും നേതാക്കൾ ചങ്കിടിപ്പിലാണ്. പഞ്ചാബിൽ മുൻപെങ്ങുമില്ലാത്ത വിധം വാശിയേറിയ ചതുഷ്കോണ പോരാട്ടമായിരുന്നു ഇക്കുറി. കോൺഗ്രസ്, ആം ആദ്മി, അകാലിദൾ–ബിഎസ്പി സഖ്യം, ബിജെപി–പഞ്ചാബ് ലോക് കോൺഗ്രസ്–സംയുക്ത ശിരോമണി അകാലിദൾ സഖ്യം എന്നിവർ പോരടിച്ച ഗോദയിൽ രാഷ്ട്രീയത്തിനു പുറത്തു നിന്നുള്ള കർഷക പാർട്ടിയായ സംയുക്ത സമാജ് മോർച്ചയും രംഗത്തിറങ്ങി. ഇത്രയുമധികം പാർട്ടികളുടെ സാന്നിധ്യം തിരഞ്ഞെടുപ്പിനെ എങ്ങനെ സ്വാധീനിക്കുമെന്ന ചോദ്യത്തിന് നേതാക്കൾക്ക് കൃത്യമായ ഉത്തരമില്ല. 

പഞ്ചാബിൽ ആരു ജയിക്കുമെന്ന് ചോദിച്ചാൽ ജനങ്ങളിൽനിന്ന് ഏറ്റവുമധികം കേൾക്കുന്ന പേര് ആം ആദ്മി പാർട്ടിയുടേതാണ്. ആം ആദ്മി തരംഗമാണെന്നു ചിലർ ഉറപ്പിച്ചു പറയുന്നു. ആം ആദ്മിയും കോൺഗ്രസും തമ്മിൽ നേർക്കുനേർ പോരാട്ടമാണെന്നു മറ്റു ചിലർ. അകാലിദൾ നേട്ടമുണ്ടാക്കുമെന്ന പ്രതികരണവും സുലഭം. വിവാദ കൃഷി നിയമങ്ങളുടെ പേരിൽ കേന്ദ്ര സർക്കാരിനോടുള്ള എതിർപ്പ് പഞ്ചാബിൽ ഇപ്പോഴും പ്രകടമാണ്. ബിജെപി കാര്യമായ സീറ്റുകൾ നേടില്ലെന്ന അഭിപ്രായം പലരും പങ്കുവച്ചു.. 

തമ്മിലടിയിൽ കോൺഗ്രസിന് ആശങ്ക 

പഞ്ചാബിൽ ഭരണം പിടിക്കുക കോൺഗ്രസിന് അഭിമാനപ്രശ്നമാണ്. തിരഞ്ഞെടുപ്പിനു മാസങ്ങൾ മുൻപ് ക്യാപ്റ്റൻ അമരിന്ദർ സിങ്ങിനെ മാറ്റി ദലിത് നേതാവായ ചരൺജിത് സിങ് ഛന്നിയെ മുഖ്യമന്ത്രിയാക്കിയതിലൂടെ കോൺഗ്രസ് ദേശീയ നേതൃത്വമായ ഹൈക്കമാൻഡ് സമീപകാലത്തൊന്നും ഒരു സംസ്ഥാനത്തും പരീക്ഷിക്കാത്ത നീക്കമാണു പയറ്റിയത്. ഭരണം നിലനിർത്താൻ സാധിച്ചാൽ, അത് ഹൈക്കമാൻഡിന്റെ കൂടി വിജയമാകും. 

സംസ്ഥാനത്ത് കോൺഗ്രസിന്റെ ഏറ്റവും വലിയ ശാപം നേതാക്കൾക്കിടയിലുള്ള തമ്മിലടിയാണെന്നു പാർട്ടി വൃത്തങ്ങൾ സമ്മതിക്കുന്നു. ഛന്നിയെ മുഖ്യമന്ത്രിയാക്കിയതിൽ പിസിസി പ്രസിഡന്റ് നവജ്യോത് സിങ് സിദ്ദുവിനും മുൻ പിസിസി പ്രസിഡന്റ് സുനിൽ ഝാക്കറിനും നീരസമുണ്ട്. സിദ്ദു തന്റെ മണ്ഡലമായ അമൃത്‌സർ ഈസ്റ്റിനു പുറത്ത് കാര്യമായി പ്രചാരണം നടത്തിയിട്ടില്ല. തന്റെ അനന്തരവൻ സന്ദീപ് ഝാക്കർ മത്സരിക്കുന്ന അബോഹർ മണ്ഡലം മാത്രം കേന്ദ്രീകരിച്ചായിരുന്നു ഝാക്കറുടെ പ്രചാരണം. 

സിദ്ദു ജാട്ട് സിഖും ഝാക്കർ ഹിന്ദുവുമാണ്. ഇരു വിഭാഗങ്ങൾക്കിടയിലും കോൺഗ്രസിനായി വോട്ട് പിടിക്കാൻ സംസ്ഥാനം മുഴുവൻ പ്രചാരണത്തിനിറങ്ങേണ്ട ഇരുവരും ഒാരോ മണ്ഡലത്തിലേക്കു സ്വയം ഒതുങ്ങിയത് പാർട്ടിക്കു ദോഷം ചെയ്തേക്കും. ഛന്നി മാത്രമാണു സംസ്ഥാനം മുഴുവൻ പ്രചാരണം നടത്തിയത്. സഹായത്തിനായി പ്രചാരണത്തിന്റെ അവസാനനാളുകളിൽ രാഹുൽ ഗാന്ധിയും പ്രിയങ്ക ഗാന്ധിയും തുടർച്ചയായി പഞ്ചാബിലേക്കെത്തിയിരുന്നു. 

തരംഗം പ്രതീക്ഷിച്ച് ആം ആദ്മി 

ആം ആദ്മിക്ക് പിന്തുണയേറുന്നുവെന്ന് സൂചനയുള്ളപ്പോഴും പഞ്ചാബിലുടനീളം ശക്തമായ സംഘടനാസംവിധാനമില്ലാത്തത് പാർട്ടിയെ ആശങ്കയിലാഴ്ത്തുന്നു. ജനങ്ങളുടെ പിന്തുണ വോട്ടാക്കി മാറ്റാനുള്ള പാർട്ടി സംവിധാനം ചിലയിടങ്ങളിൽ ആം ആദ്മിക്കില്ല. 117ൽ 69 സീറ്റുള്ള മാൾവ മേഖലയിൽ പാർട്ടിക്ക് ശക്തമായ അടിത്തറയുണ്ട്. പക്ഷേ, മാജ, ദോബ മേഖലകളിൽ സംഘടനാ സംവിധാനത്തിന് ഉറപ്പു പോരാ. 

ഡൽഹിയിലേതു പോലെ ആം ആദ്മി തരംഗം പഞ്ചാബിലും അടിച്ചാൽ, സംഘടനാ  സംവിധാനത്തിന്റെ കുറവ് മറികടന്ന് ജനങ്ങൾ കൂട്ടമായി വോട്ട് കുത്തുമെന്നാണ് ആം ആദ്മിയുടെ കണക്കുകൂട്ടൽ. അത്തരമൊരു തരംഗത്തിന്റെ സാധ്യത ഇക്കുറി പഞ്ചാബിലുണ്ടെന്ന് ആം ആദ്മി നേതാക്കൾ  ഉറച്ചു വിശ്വസിക്കുന്നു. ആ തരംഗമുണ്ടായില്ലെങ്കിൽ ആം ആദ്മിയുടെ കണക്കുകൂട്ടൽ പാളും. 

കണക്കുകൂട്ടി അകാലിദൾ

ഡൽഹിയിൽനിന്ന് പഞ്ചാബിലേക്കു കടന്നുകയറിയ ആം ആദ്മി പാർട്ടി തങ്ങളുടെ വോട്ട് ബാങ്കിലേക്കു കടന്നുകയറിയേക്കുമെന്ന ആശങ്ക അകാലിദളിനുണ്ട്. ഇക്കാരണത്താൽ പ്രചാരണ സമ്മേളനങ്ങളിൽ സുഖ്ബീർ സിങ് ബാദൽ ആം ആദ്മിയെ നിരന്തരം കടന്നാക്രമിച്ചു.. ഇറക്കുമതി പാർട്ടിയായ ആം ആദ്മി പഞ്ചാബ് വിരുദ്ധ പാർട്ടിയാണെന്നായിരുന്നു മുഖ്യ ആരോപണം. 

ദലിത് സിഖ് വിഭാഗക്കാരനായ ഛന്നിയെ മുഖ്യമന്ത്രിയാക്കിയ കോൺഗ്രസിൽനിന്ന് ജാട്ട് സിഖ് വിഭാഗം അകലുമെന്നും അവർ തങ്ങൾക്കൊപ്പം നിൽക്കുമെന്നും അകാലിദൾ കണക്കുകൂട്ടുന്നു. ഛന്നിയിലൂടെ ദലിത് വോട്ടുകൾ കോൺഗ്രസിലേക്ക് ഒഴുകുന്നതു തടയാനാണ് അകാലിദൾ മായാവതിയുടെ ബിഎസ്പിയെ കൂട്ടുപിടിച്ചത്. സംസ്ഥാനത്ത് 32 ശതമാനമുള്ള ദലിത് വോട്ടർമാർക്കു പഞ്ചാബിന്റെ വിധി നിർണയിക്കുന്നതിൽ നിർണായക സ്വാധീനമുണ്ട്. 

കിങ് മേക്കർ പദവി സ്വപ്നം കണ്ട് ബിജെപി 

പഞ്ചാബിൽ ഭരണം പിടിക്കാമെന്ന അമിതപ്രതീക്ഷകളൊന്നും ബിജെപിക്കില്ല. മുൻ മുഖ്യമന്ത്രി ക്യാപ്റ്റൻ അമരിന്ദർ സിങ്ങിന്റെ പഞ്ചാബ് ലോക് കോൺഗ്രസുമായുള്ള സഖ്യത്തിനു പഞ്ചാബിലുടനീളം സ്വാധീനമുണ്ടാക്കാനുള്ള  ശേഷിയില്ല. പക്ഷേ, ബിജെപി അവസരം കാണുന്ന മറ്റൊരു സാഹചര്യമുണ്ട് – 4 രാഷ്ട്രീയ മുന്നണികൾ പോരടിക്കുന്ന സംസ്ഥാനത്ത് ആർക്കും കേവല ഭൂരിപക്ഷം (59 സീറ്റ്) ലഭിക്കാതിരിക്കാനുള്ള സാധ്യത തള്ളിക്കളയാനാവില്ല. അങ്ങനെ സംഭവിച്ചാൽ, ആരു ഭരിക്കണമെന്നു തീരുമാനിക്കുന്ന കിങ് മേക്കറാകാനുള്ള നീക്കം ബിജെപി നടത്തിയേക്കും.