പ്രിയങ്ക ഗാന്ധിയുടെ ‘ക്യാംപെയ്ൻ ഗേൾസ്’ ബിജെപിയിൽ; ‘ഷോക്കടിക്കാതെ’ പ്രചാരണം

കുംഭമാസ നിലാവു പോലെയാണ് ഭാവങ്ങൾ മാറുന്നത്. പരിഹാസ ശരങ്ങളുതിർക്കുമ്പോൾ മുഖത്തു വിരിയുന്ന ചിരി വിമർശനങ്ങളിലേക്കും സ്ത്രീകൾക്കും ദലിതർക്കും നേരിടേണ്ടി വരുന്ന പീഡനങ്ങളിലേക്കും കടക്കുമ്പോൾ രൗദ്രഭാവത്തിനു വഴിമാറുന്നു. മൊഴികൾ തീഷ്ണമാകുന്നു. മിഴികളിൽ നിശ്ചയ ദാർഢ്യം സ്ഫുരിക്കുന്നു. ഗ്യാസ് തന്നവർ അതു വീണ്ടും നിറയ്ക്കാൻ പണം തന്നോയെന്നും, സൗജന്യ റേഷൻ തന്നുവെന്ന് അവകാശപ്പെടുന്നവർ അതു പാചകം ചെയ്യാൻ എണ്ണയ്ക്കും മറ്റും വിലകുറച്ചോയെന്നും പ്രിയങ്ക ചോദിക്കുന്നു. ഹാത്രസും ഉന്നാവുവും ഓർമിപ്പിക്കുന്നു. 

70 വർഷം കോൺഗ്രസ് ഒന്നും ചെയ്തില്ലെങ്കിൽ പിന്നെ ഇപ്പോൾ നിങ്ങളെടുത്തു വിൽക്കുന്ന പൊതുമേഖലാ സ്ഥാപനങ്ങൾ ആരു കൊണ്ടുവന്നതാണെന്ന് കേന്ദ്രത്തോടു ചോദിക്കുന്നു. ലക്നൗവിലെ എയിംസും വിമാനത്താവളവും ഉന്നത വിദ്യാഭ്യാസ സ്ഥാപനങ്ങളും ആരു കൊണ്ടുവന്നതാണെന്നു യോഗി ആദിത്യനാഥിനോടും ചോദ്യമുണ്ട്. കൃത്യം ആറിന് ചോദ്യങ്ങളും പ്രസംഗങ്ങളും അവസാനിച്ച് വാഹനത്തിനു മുകളിൽനിന്ന് ചാടിയിറങ്ങി പ്രിയങ്ക മടങ്ങുകയാണ്.

ആൾക്കൂട്ടമൊഴിഞ്ഞിട്ടും കാരവൻ റോഡിലുണ്ട്. എടുക്കാൻ പൊലീസ് പറയുമ്പോൾ ഡ്രൈവർ കൈ മലർത്തുന്നു. നേരത്തേ താക്കോൽ ഊരിയെടുത്ത സുരക്ഷാ ഉദ്യോഗസ്ഥൻ പ്രിയങ്കയുടെ വാഹനവ്യൂഹത്തിനൊപ്പം പോയി. പൊലീസുകാരൻ അയാളുടെ വഴിക്കു പോയപ്പോൾ മേൽപോട്ടു നോക്കി നിൽക്കുന്നു, ഡ്രൈവർ. 

‘ആരാണ് നിന്നെ അയച്ചത്’?

രാവിലെ ചിൻഹട്ട് ബസാറിലെ റോഡ് ഷോയ്ക്കും നല്ല ജനക്കൂട്ടമുണ്ടായിരുന്നു. പെൺകുട്ടികളുടെ ശാക്തീകരണ ക്യാംപെയ്നിന്റെ പിങ്ക് ബാൻഡ് അണി‍ഞ്ഞാണ് പ്രിയങ്ക യുപിയിലെത്തുന്നത്. കെട്ടുകണക്കിന് ബാൻഡുകൾ റോഡരികിൽ നിൽക്കുന്ന സ്ത്രീകൾക്ക് എറിഞ്ഞു കൊടുക്കുന്നുണ്ട്. അവർ തിരിച്ച് പുഷ്പവർഷം നടത്തുന്നു. ഇടയ്ക്ക് ഒരു തിരിവിൽ റോഡരികിൽ നിൽക്കുന്ന ആജാനുബാഹുവെങ്കിലും കാലു നിലത്തുറയ്ക്കാത്ത മനുഷ്യൻ ‘ഗാന്ധി കുടുംബം രാജ്യദ്രോഹി’കളാണെന്ന് വിളിച്ചു പറയുന്നു. കോൺഗ്രസുകാർ അയാളുടെ അടുത്തെത്തുന്നതിനു മുൻപേ യുപി പൊലീസ് അയാളെ പൊക്കിയെടുത്ത് വാനിനുള്ളിലേക്ക് എറിയുന്നു. 

‘ആരാണ് നിന്നെ അയച്ചത്’ എന്ന് ഓഫിസർ പല്ലുകടിച്ചു ചോദിക്കുന്നുണ്ട്. ക്യാമറകളുള്ളതിനാലാവാം കൈക്രിയകൾ അവിടെയുണ്ടായില്ല. വഴിയോരത്തു കൊടിയും പിടിച്ചു നിൽക്കുന്ന കണ്ണുകളിൽ പീള കെട്ടിയൊരു 93കാരനുണ്ട്. മെയ്കു സിങ്. പണ്ടേക്കു പണ്ടേ കോൺഗ്രസുകാരനാണ്. നെഹ്റുവിന്റെ കൊച്ചുമകളെ കാണാൻ വന്നതാണ്. വാക്കുകൾ കൂട്ടിച്ചൊല്ലാൻ വിഷമിക്കുന്ന മെയ്കുവിനു പകരം സംസാരിക്കുന്നത് ഭാര്യ രമാദേവിയാണ്. 

‘എല്ലാവരും വന്ന് ഓരോന്നൊക്കെ പറഞ്ഞിട്ടു പോകും. പക്ഷേ കാര്യമായ മെച്ചമൊന്നും ജീവിതത്തിലില്ലെന്നാണ് അവർ പറയുന്നത്. ചിൻഹട്ട് ഉൾപ്പെട്ട ബക്ഷി കാ താലാബ് മണ്ഡലത്തിലെ കോൺഗ്രസ് സ്ഥാനാർഥി ലാലൻ കുമാർ സിങ് സഹായിക്കാറുണ്ട്’. അതിന്റെ നന്ദി കാണിക്കാൻ കൂടിയാണ് മക്കളും കൊച്ചുമക്കളുമൊക്കെയായി പ്രിയങ്കയുടെ റോഡ് ഷോ കാണാൻ വന്നിരിക്കുന്നത്.

യുപിയിൽ കോൺഗ്രസിന്റെ അടിത്തറ എത്രത്തോളം ബാക്കിയുണ്ട് എന്നതിന്റെ ലിറ്റ്മസ് ടെസ്റ്റ് കൂടിയാണ് യുപിയിൽ നടക്കുന്നത്. 400ലേറെ സീറ്റുകളിൽ പാർട്ടി മൽസരിക്കുന്നുണ്ട്. അഖിലേഷ് യാദവിനെതിരെയുള്ള സ്ഥാനാർഥിയെ പിൻവലിച്ചിട്ടുമുണ്ട്. കഴിഞ്ഞ തവണ മഹാസഖ്യത്തിൽ മത്സരിച്ചിട്ടും 7 സീറ്റാണു കിട്ടിയത്. അതിൽ 2 പേർ ബിജെപിയിലേക്കും ഒരാൾ സമാ‌ജ്‌വാദി പാർട്ടിയിലേക്കും പോയി. രാഹുൽ ഗാന്ധി ഇത്തവണ പ്രചാരണത്തിന് യുപിയിൽ എത്തിയിട്ടില്ല. പ്രിയങ്ക ഒരാളുടെ ചുമതലയെന്ന മട്ടിലാണോ നേതാക്കൾ തിരഞ്ഞെടുപ്പു പ്രചാരണത്തെ കാണുന്നതെന്ന് പുറത്തു നിന്നു കാണുന്നവർക്ക് സംശയം തോന്നിയേക്കാം. 

സംശയം വേണ്ടെന്നും പാർട്ടിയുടെ താഴേത്തട്ടിലുള്ള പ്രവർത്തകർ വരെ സജീവമായി രംഗത്തുണ്ടെന്നും യുപി പിസിസി പ്രസിഡന്റ് അജയ് കുമാർ ലല്ലുവടക്കമുള്ളവർ പറയുന്നുണ്ട്. പ്രിയങ്കയുടെ പരിപാടികളിൽ രാത്രി വരെ കാത്തു നിൽക്കുന്നവർ കോൺഗ്രസിന്റെ ശക്തിയുടെ തെളിവാണെന്നാണ് നേതാക്കൾ അവകാശപ്പെടുന്നത്. സ്ത്രീകൾക്കിടയിൽ വിലക്കയറ്റമടക്കമുളള വിഷയങ്ങൾ എത്തിക്കാൻ ശ്രമിക്കുന്നുണ്ടെന്നും അതിന്റെ ഫലമാണ് ആൾക്കൂട്ടമെന്നും അവർ കരുതുന്നുണ്ട്. ആൾക്കൂട്ടമൊക്കെ വോട്ടായി മാറുമോ എന്നറിയാൻ പക്ഷേ മാർച്ച് 10നു ഫലം വരണം.

English Summary: Reporter's Diary from Uttar Pradesh with Congress Leader Priyanka Gandhi