തട്ടിപ്പു കാശിന് മകളുടെ ആഡംബരക്കല്യാണം; ദുബായിൽ അറസ്റ്റ്, തകർന്ന ഗുപ്ത സാമ്രാജ്യം

പിന്നെ പിടിച്ചാൽ കിട്ടാത്ത പോക്കായിരുന്നു. ഐടിയിലും മീഡിയയിലും ഖനികളിലുമെല്ലാം ബിസിനസ്. സ്വന്തം ടിവി ചാനലും അതിൽ കുറേ മോഡലുകളെ വച്ച് ന്യൂസ് വായിക്കലും. ഇവർക്കു വേണ്ടി കള്ളവാർത്തകൾ പടയ്ക്കാൻ ന്യൂസ് നെറ്റ്‌വർക്കും. ധാതുസമ്പന്നമായ ഖനികളിൽ നിന്നു കോടികളൊഴുകി. ഇത്രയൊക്കെ ആയ സ്ഥിതിക്ക് മര്യാദയ്ക്കു ബിസിനസ് ചെയ്തു ജീവിച്ചാൽ പോരായിരുന്നോ? അത്യാഗ്രഹം കേറി രാജ്യത്തിന്റെ മുതൽ കക്കാൻ തുടങ്ങി. മന്ത്രിമാരെ നിശ്ചയിക്കുന്നതും പുറത്താക്കുന്നതുമെല്ലാം ഗുപ്തമാർ. സർക്കാർ നയം തീരുമാനിക്കുന്നത് ഗുപ്തമാർ. അവർക്ക് ഇഷ്ടമില്ലാത്തവരെ മാറ്റും, ഇഷ്ടമുള്ളവർക്ക് പ്രമോഷനും ഗംഭീരം സ്ഥാനങ്ങളും!

∙ പന പോലെ വളർച്ച

ജോഹാനസ്ബർഗ് നഗരത്തിൽ സ്ഥലം വാങ്ങി ഗുപ്ത എസ്റ്റേറ്റ് എന്ന പേരിൽ ഒന്നല്ല നാല് ആഡംബര വീടുകൾ പണിതു. പക്ഷേ 7000 കോടി എങ്ങനെ സ്വന്തമായി? 2016ലെ കണക്ക് അനുസരിച്ച് ഇവരുടെ ബിസിനസുകളുടെ ആകെ വിറ്റുവരവ് 160 കോടിക്കടുത്തു മാത്രം. 10,000 ജീവനക്കാരുണ്ടായിരുന്നു. പലവിധ കരാറുകൾ ബിനാമി കമ്പനികൾ വഴി തട്ടിയെടുക്കുക, ചെയ്യുന്ന പണിയുടെ നാലിരട്ടി കാശ് തട്ടുക, സർക്കാർ പദ്ധതികൾക്കു നീക്കി വയ്ക്കുന്ന തുക തട്ടിയെടുക്കുക എന്നിങ്ങനെ മനസ്സാക്ഷിയില്ലാത്ത പണികളാണു ചെയ്തത്. റെയിൽ, തുറമുഖം, പൈപ്പ് ലൈൻ തുടങ്ങിയ കോളടിക്കുന്ന കരാറുകൾ സ്വന്തമാക്കിയും കോടികൾ വെട്ടിച്ചു.

ദക്ഷിണാഫ്രിക്കയിൽ കാര്യമായി ക്ഷീരോൽപ്പാദന ബിസിനസ് ഇല്ലാത്തതിനാൽ ഡെയറി ഫാമുകൾ വളർത്താൻ പ്രത്യേക പദ്ധതിയും ഫണ്ടും ഉണ്ടായിരുന്നു. പാവം ആഫ്രിക്കക്കാർക്ക് പശുവിനെ വളർത്തി പാലു വിറ്റ് ജീവിക്കാനുള്ള പദ്ധതിയാണ്. അതിൽനിന്നു പോലും കയ്യിട്ടു വാരി. ആ പണമാണത്രെ 2013ൽ സൺസിറ്റിയിൽ വച്ച് ഗുപ്തമാരിലൊരാളുടെ മകൾ വേദയുടെ കല്യാണത്തിനായി ചെലവിട്ടത്. ലോകം കണ്ട ഏറ്റവും ചെലവേറിയ ആഡംബര വിവാഹങ്ങളിലൊന്നായിരുന്നു അത്. അന്ന് വിവാഹചടങ്ങിൽ നൃത്തം അവതരിപ്പിച്ചവരിൽ ഒരാൾ ബോളിവുഡ് നടി കത്രീന കൈഫായിരുന്നു. ആ വിഡിയോ കാണാം (ചുവടെ)

∙ ഗുപ്തയുടെ വിളിപ്പേര് മാറി സുപ്തയായി!

ജേക്കബ് സുമയുമായുള്ള അമിതമായ അടുപ്പം മൂലം ഗുപ്തയുടെ പേരിന് നാട്ടുകാർ ചെറിയ മാറ്റം വരുത്തി. സുമയുടെ ആദ്യാക്ഷരമായ സെഡ് ചേർത്ത് സുപ്ത എന്നു വിളിക്കാൻ തുടങ്ങി. ശകുനം നന്നെന്നു കരുതി പുലരുവോളം കക്കരുതെന്നാണു പഴഞ്ചൊല്ലിൽ പറയുന്നത്. അതുതന്നെ സംഭവിച്ചു. ജേക്കബ് സുമയ്ക്കെതിരെ വൻ പ്രക്ഷോഭം ഉയർന്നു വന്നപ്പോൾ ഗുപ്തമാരും വെറുക്കപ്പെട്ടവരായി. അതിനിടെയാണ് ഡപ്യൂട്ടി ധനമന്ത്രിക്ക് ഇവർ കൈക്കൂലി ഓഫർ ചെയ്യുന്നത്. കോടികളും ധനമന്ത്രിയായി പ്രമോഷനും വാഗ്ദാനം. അയാൾ അത്തരക്കാരനല്ലായിരുന്നു. കഷ്ടപ്പെട്ട് ജനാധിപത്യം നേടിയത് ഇതിനായിരുന്നോ എന്നാണ് പ്രവീൺ ഗോർധൻ എന്ന ഡപ്യൂട്ടി ധനമന്ത്രി ചോദിച്ചത്. ഉടനെ അദ്ദേഹത്തെ ഇവർ പുറത്താക്കിച്ചു.

∙ പതനം ആരംഭിക്കുന്നു

ജേക്കബ് സുമയെ മാറ്റാനുള്ള പ്രക്ഷോഭം കൊടുമ്പിരിക്കൊണ്ടപ്പോൾ നിവൃത്തിയില്ലാതെ 2018ൽ ആഫ്രിക്കൻ നാഷനൽ കോൺഗ്രസും എതിരായി. പ്രതിപക്ഷം അവിശ്വാസ പ്രമേയം കൊണ്ടുവന്ന് അദ്ദേഹത്തെ പുറത്താക്കി. പിന്നീട് അദ്ദേഹം ജയിലിലുമായി. കണക്കില്ലാത്ത കൊള്ളമുതലുമായി ഗുപ്തമാർ രാജ്യം വിട്ട് ദുബായിലെത്തി 225 കോടിയുടെ കൊട്ടാരം വാങ്ങി സുഖവാസം തുടങ്ങി. ഇവർക്കെതിരെ സംസാരിക്കുന്ന തെളിവുകൾ ഒരു ലക്ഷത്തോളം ഇമെയിലുകളിലുണ്ടായിരുന്നു. അതെല്ലാം അന്വേഷണ ഏജൻസികൾ കണ്ടെത്തി. ആഴത്തിലുള്ള അഴിമതി ബന്ധം വെളിപ്പെട്ടു.