രക്‌തസാക്ഷി ഫണ്ടിൽ വരെ കയ്യിട്ട് സിപിഎം? പയ്യന്നൂർ സഖാക്കൾക്കെതിരെ ഗൂഢസംഘം?

പരാതി ഉന്നയിച്ചതും അതിനൊപ്പം അവസാനം വരെ നിലകൊണ്ടതും വിഭാഗീയതയാണെന്ന വിലയിരുത്തൽ നേതൃത്വം കൈക്കൊണ്ടു. ക്രമക്കേട് പരാതിയുടെയും ആദർശ നിലപാടുകളുടെയും ആത്മാർഥത കണക്കിലെടുക്കാതെയായിരുന്നു ഇത്. 2 വിഭാഗങ്ങൾ തമ്മിലുള്ള ഏറ്റുമുട്ടലാണ് ആരോപണങ്ങൾക്കു പിറകിലെന്ന തരത്തിൽ, പരാതിയുടെ നിലയും വിലയും കുറയ്ക്കാൻ വേണ്ടിക്കൂടിയായിരുന്നു ഈ വിലയിരുത്തൽ. പക്ഷേ ഒരാൾ മാത്രമായി എങ്ങനെ വിഭാഗീയ പ്രവർത്തനം നടത്തുമെന്ന ചോദ്യം ബാക്കിയാകുന്നു. 50 വർഷമായി അഴിമതിയുടെയോ മറ്റെന്തെങ്കിലും തരത്തിലുള്ളതോ ആയ ആരോപണങ്ങളുടെ കറപുരളാത്ത ഒരാൾ എന്തിനു വേണ്ടി വിഭാഗീയ പ്രവർത്തനം നടത്തുന്നുവെന്ന സംശയത്തിനും ഉത്തരമുണ്ടാകാനിടയില്ല. പാർട്ടി ഏരിയ കമ്മിറ്റിയുടെ അറിവോടെയാണ് വി.കുഞ്ഞികൃഷ്ണനും ഏരിയ കമ്മിറ്റി അംഗങ്ങളും ഫണ്ട് തിരിമറി അന്വേഷിച്ചത്. ജില്ലാ നേതൃത്വത്തിന്റെ നിർദേശപ്രകാരമാണ്, അന്വേഷണത്തിന്റെ ഭാഗമായി മറ്റൊരു നേതാവിന്റെ ബാങ്ക് സ്റ്റേറ്റ്മെന്റ് വി.കുഞ്ഞികൃഷ്ണൻ ശേഖരിച്ചത്. അപ്പോൾ എവിടെയാണു വിഭാഗീയത?

ഫണ്ട് തിരിമറി സംബന്ധിച്ച്, പയ്യന്നൂരിലെ ചില നേതാക്കൾക്കെതിരെ മാധ്യമങ്ങൾക്കു വാർത്ത ചോർത്തിയെന്ന ആരോപണവും ഒരു വിഭാഗം ഉയർത്തിയിരുന്നു. ജില്ലാ കമ്മിറ്റി നിയോഗിച്ച 2 അംഗ സമിതിയുടെ റിപ്പോർട്ടിൽ, ഫണ്ട് തിരിമറി നടന്നതിനു തെളിവില്ലെന്നു കണ്ടെത്തിയെന്നു മാധ്യമങ്ങളിൽ വാർത്തകൾ വന്നിരുന്നു. എങ്കിൽ, ഈ വാർത്ത ചോർത്തിയതും വിഭാഗീയതയല്ലേയെന്നു പയ്യന്നൂരിലെ ചില പാർട്ടി സഖാക്കൾ ചോദിക്കുന്നു. 

∙ കേട്ടുകേൾവിയില്ലാത്ത തിരിമറികൾ

സിപിഎമ്മിൽ, പ്രത്യേകിച്ച് ചെങ്കോട്ടയായ കണ്ണൂർ ജില്ലയിലെ സിപിഎമ്മിൽ കേട്ടുകേൾവിയില്ലാത്ത സാമ്പത്തിക തിരിമറി വിവാദങ്ങളാണു പയ്യന്നൂരിൽ ഉയർന്നത്. ധനരാജ് ഫണ്ടിലെ കണക്കുകളിലെ പൊരുത്തക്കേടുകൾ കൂടി പുറത്തു വന്നതോടെ അതു വൈകാരികമായി. പക്ഷേ, സിപിഎം ജില്ലാ കമ്മിറ്റി നിയോഗിച്ച 2 അംഗ സമിതിയുടെ കണ്ടെത്തലുകൾ ആക്ഷേപങ്ങളെയും പരാതികളെയും തീർത്തും അവഗണിക്കുന്ന തരത്തിലായിരുന്നു. തിരിമറി നടന്നിട്ടില്ലെന്നും മേൽനോട്ടത്തിൽ വീഴ്ച പറ്റിയെന്നുമൊക്കെ, ഒഴുക്കൻ മട്ടിൽ പറഞ്ഞു വയ്ക്കുകയായിരുന്നു റിപ്പോർട്ടിൽ. 

വി.കു‍ഞ്ഞികൃഷ്ണൻ നൽകിയ പരാതിയിലെ വിശദാംശങ്ങളും കണക്കുകളും പിന്നീട് ചർച്ച ചെയ്യപ്പെട്ടില്ല. ധനരാജ് ഫണ്ടിലെ 42 ലക്ഷം രൂപ എവിടെപ്പോയെന്ന ചോദ്യവും അവഗണിക്കപ്പെട്ടു. മാത്രമല്ല, സംസ്ഥാന സെക്രട്ടറി കോടിയേരി ബാലകൃഷ്ണൻ, കേന്ദ്ര കമ്മിറ്റി അംഗം ഇ.പി.ജയരാജൻ തുടങ്ങിയ സംസ്ഥാന നേതാക്കൾ കൂടി ഫണ്ട് ക്രമക്കേട് പരാതിയും അന്വേഷണ റിപ്പോർട്ടുമൊക്കെ ചർച്ച ചെയ്ത ജില്ലാ കമ്മിറ്റി യോഗങ്ങളിൽ പങ്കെടുത്തതോടെ സംഭവം ജില്ലാ നേതൃത്വത്തിന്റെ പിടിയിൽ നിൽക്കാതാവുകയും ചെയ്തു. 

∙ പോരാടി പയ്യന്നൂർ സഖാക്കൾ

ജില്ലാ കമ്മിറ്റിയും ജില്ലാ സെക്രട്ടേറിയറ്റുമൊക്കെ ഫണ്ട് തിരിമറി പരാതിയും അതിന്മേലെടുക്കേണ്ട നടപടികളും പലതവണ ചർച്ച ചെയ്തതാണ്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ സാന്നിധ്യത്തിൽ തന്നെ 3 തവണ ചർച്ച നടന്നു. കേന്ദ്ര കമ്മിറ്റി അംഗം ഇ.പി.ജയരാജനും പലതവണ ഈ വിഷയത്തിലുള്ള ചർച്ചകളിൽ പങ്കെടുത്തിരുന്നു. ഏറ്റവുമൊടുവിൽ ഇ.പി.ജയരാജന്റെ സാന്നിധ്യത്തിൽ നടന്ന ജില്ലാ കമ്മിറ്റിയിൽ കുറ്റാരോപിതർക്കെതിരെ പേരിനു മാത്രം നടപടിയെടുത്തു മുന്നോട്ടു പോകാൻ പോലും നിർദേശമുയർന്നു. എന്നാൽ, പയ്യന്നൂുരിൽ നിന്നുള്ള 3 ജില്ലാ കമ്മിറ്റി അംഗങ്ങൾ ശക്തമായ നിലപാടെടുത്തു. പയ്യന്നൂർ സഖാക്കൾ കണ്ടെത്തിയ ക്രമക്കേടിൽ നടപടിയുണ്ടായില്ലെങ്കിൽ അവിടെ പാർട്ടിയുണ്ടാകില്ലെന്ന് അവർ മുന്നറിയിപ്പു നൽകി. അതോടെയാണ്, കുറച്ചെങ്കിലും ഗൗരവമുള്ള നടപടിയെടുക്കാൻ സിപിഎം നിർബന്ധിതമായത്. 

∙ രൂക്ഷമായി പ്രതികരിച്ച് പയ്യന്നൂർ സഖാക്കൾ

അച്ചടക്ക നടപടി ജൂൺ 16ന് സിപിഎം പയ്യന്നൂർ ഏരിയ കമ്മിറ്റിയിൽ റിപ്പോർട്ട് ചെയ്തിരുന്നു. കുഞ്ഞികൃഷ്ണനെതിരായ നടപടിക്കെതിരെ രൂക്ഷമായ വിമർശനമുയർന്നു. 21 ഏരിയ കമ്മിറ്റി അംഗങ്ങളിൽ 16 പേരും നടപടി പാടില്ലെന്നു പറഞ്ഞു. പക്ഷേ, ജില്ലാ കമ്മിറ്റിയുടെ തീരുമാനമെന്ന നിലയിൽ അതു നടപ്പാക്കുകയായിരുന്നു. ഉച്ചയ്ക്ക് 2 മണിക്ക് ജില്ലാ സെക്രട്ടറിയടക്കമുള്ള ജില്ലാ കമ്മിറ്റി അംഗങ്ങളുടെ സാന്നിധ്യത്തിൽ തുടങ്ങിയ റിപ്പോർട്ടിങ് യോഗം അവസാനിച്ചത് അർധരാത്രിക്കു ശേഷമാണ്. രൂക്ഷമായ വാഗ്വാദവും വിശദീകരണങ്ങളും വിമർശനവുമുയർന്നു. വെളളിയാഴ്ച, പയ്യന്നൂർ ഏരിയയിലെ ലോക്കൽ കമ്മിറ്റികളിൽ നടന്ന റിപ്പോർട്ടിങ്ങുകളിലും ഇതേ എതിർശബ്ദങ്ങളാണുയർന്നത്. കുഞ്ഞികൃഷ്ണനെതിരായ നടപടി അംഗീകരിക്കാൻ കഴിയില്ലെന്ന് അംഗങ്ങൾ തുറന്നു പറഞ്ഞു. 

∙ പയ്യന്നൂരിലെ ഗൂഢസംഘം?

പയ്യന്നൂർ കേന്ദ്രീകരിച്ച് റിയൽ എസ്റ്റേറ്റ് മേഖലയിൽ ഒരു ഗൂഢസംഘം വളർന്നു നിൽപുണ്ട്. ഹക്കീം വധക്കേസിലാണ് ഈ ഗൂഢസംഘത്തിന്റെ പങ്ക് ആദ്യമായി പുറത്തു വന്നത്. ഈ സംഘത്തിനു ചില സിപിഎം നേതാക്കളുടെ തണലുണ്ടെന്ന്  അന്നേ ആരോപണമുയർന്നതുമാണ്. സിപിഎമ്മിലെ തന്നെ ഒരുവിഭാഗം ഈ അവിശുദ്ധ കൂട്ടുകെട്ടിനെതിരെ ശബ്ദമുയർത്തുകയും ഹക്കീം വധക്കേസിലെ യഥാർഥ പ്രതികളെ കണ്ടെത്തണമെന്ന ആവശ്യമുയർത്തി സമരം നടത്തുകയും ചെയ്തിരുന്നു. പക്ഷേ, ആ അവിശുദ്ധ കൂട്ടുകെട്ടും ഗൂഢസംഘവുമൊക്കെ ഇപ്പോഴും പയ്യന്നൂരിലുണ്ട്. കുഞ്ഞികൃഷ്ണനെ പോലെ ധൈര്യവും ആദർശവും ഒരുമിച്ചു ചേരുന്ന നേതാക്കൾ ഈ കൂട്ടുകെട്ടിനു ഭീഷണി തന്നെയാണ്. ആ ഭീഷണിയാണിപ്പോൾ അവർ തുടച്ചു മാറ്റിയിരിക്കുന്നതും. 

ഇതുവരെ പയ്യന്നൂർ സഖാക്കളുടെ നിയന്ത്രണത്തിലായിരുന്നു പയ്യന്നൂരിലെ പാർട്ടി. സത്യത്തിനു നിരക്കാത്തതെല്ലാം അവർ നിരസിച്ചിട്ടുണ്ട്. നിലവിൽ ജില്ലാ സെക്രട്ടേറിയറ്റ് അംഗമായ മുൻ എംഎൽഎ സി.കൃഷ്ണനെ രണ്ടാമതും നിയമസഭയിലേക്കു മത്സരിപ്പിക്കാതിരിക്കാനുള്ള നീക്കത്തെ എതിർത്തു തോൽപിച്ച പാർട്ടി ഘടകമാണു പയ്യന്നൂരിലേത്. പക്ഷേ, ഇപ്പോൾ അദൃശ്യരായ ചിലരുടെ നിയന്ത്രണത്തിലേക്ക് പയ്യന്നൂരിലെ സിപിഎം കൈമാറ്റം ചെയ്യപ്പെടുകയാണെന്ന ആശങ്ക പലരും ഉന്നയിക്കുന്നുണ്ട്. കുഞ്ഞികൃഷ്ണന്റെ പിന്മാറ്റം പയ്യന്നൂർ സഖാക്കൾക്ക് തിരിച്ചടി തന്നെയാണ്. പക്ഷേ, ഒരു കുഞ്ഞികൃഷ്ണൻ മാത്രമല്ല പയ്യന്നൂരിലുള്ളതെന്ന് അവർ പറയുന്നു. ഓരോ തുള്ളിച്ചോരയിൽ നിന്നും ഒരായിരം കുഞ്ഞികൃഷ്ണന്മാർ ഉയരുമെന്ന് അവർ പ്രതീക്ഷിക്കുന്നു. 

English Summary: Misappropriation of Party Fund: All You Need to Know about the Payyannur CPM's New Controversy