തരൂരിനറിയാം, കോൺഗ്രസിലെ കലഹം നിസ്സാരം, അണിയറയിൽ ഒരുങ്ങുന്നുണ്ട് മറ്റൊരു കൂട്ടർ

കഴിഞ്ഞ മൂന്ന് പാർലമെന്റ് തിരഞ്ഞെടുപ്പുകളിലും തിരുവനന്തപുരത്ത് ‘കബളിപ്പിക്കപ്പെട്ട’ പാർട്ടിയാണ് ബിജെപി. അതിന്റെ കാരണക്കാരനാകട്ടെ തരൂർ ആണ്. കേരളത്തിൽ ബിജെപി ആറ്റുനോറ്റു കാത്തിരുന്ന ലോക്സഭാ സീറ്റ് ആയിരുന്നു തിരുവനന്തപുരം. ഇവിടെ പല സർവേകളിലും ബിജെപി ജയിക്കുമെന്ന് പ്രഖ്യാപിച്ചിട്ടുണ്ട്. മറ്റു മണ്ഡലങ്ങളിൽ ശരാശരി ഹിന്ദു വോട്ടർമാർ 55% ആണെങ്കിൽ തിരുവനന്തപുരം മണ്ഡലത്തിൽ അത് 67% ആണ്. അതിൽ തന്നെ സവർണ വിഭാഗം വോട്ടർമാരുടെ കൂടിയ സാന്നിധ്യവുമുണ്ട്. ഇതെല്ലാം ഓരോ തവണയും ബിജെപിയുടെ പ്രതീക്ഷകളെ വാനോളമുയർത്തിയിരുന്നു. പ്രചാരണരംഗത്ത് അവർ സർവശക്തിയും പ്രയോഗിക്കും. 

തിരഞ്ഞെടുപ്പു ദിവസത്തോടടുക്കുമ്പോൾ നഗരത്തിലെ ആരോടു സംസാരിച്ചാലും ജയം ബിജെപിക്ക് എന്നാവും. ഓരോ വോട്ടർമാരും ബിജെപി പ്രചാരകരാവുന്ന കാലം. ഇവരോട് ദുർബലമായ പ്രചാരണവുമായാണ് ശശി തരൂർ ഏറ്റുമുട്ടുന്നത്. ഫലം വരുമ്പോൾ ‘തരൂർ മാജിക്’ ആയിരിക്കും വിജയിക്കുക. 2014ൽ മോദി തരംഗവും സുനന്ദ പുഷ്കറുടെ മരണവും ഉണ്ടായിട്ടും തരൂരിനെ തോൽപ്പിക്കാനായില്ല. ഇപ്പോഴത്തെ സന്ദർഭം ബിജെപിയെ സംബന്ധിച്ചിടത്തോളവും സമ്മർദം നൽകുന്നതാണ്. ഹൈന്ദവ ആശയങ്ങളോട് ആഭിമുഖ്യമുള്ളവരെ തനിക്കൊപ്പം കൊണ്ടുപോകാൻ തരൂരിന് സാധിക്കും. സംഘപരിവാറിന്റെ കേരളത്തിലെ കപ്പൽ മുക്കാൻ കഴിയുന്നയാളാണ് തരൂർ. 

∙ ഞാനെന്തുകൊണ്ട് ഹിന്ദുവായി? 

‘ഞാനെന്തുകൊണ്ട് ഒരു ഹിന്ദുവാണ്’ എന്നാണ് തരൂരിന്റെ ശ്രദ്ധേയമായ പുസ്തകത്തിന്റെ തലക്കെട്ട്. വൈവിധ്യമുള്ള ആശയങ്ങളെയും ഇതര വിശ്വാസങ്ങളെയും ഉൾക്കൊള്ളാൻ കഴിയുന്നതാണ് ഹിന്ദുമതം എന്നതിനാലാണ്, ഞാൻ ഒരു ഹിന്ദുവാണ് എന്ന് തരൂർ പറയുന്നത്. അതിനാൽ വ്യത്യസ്ത ആശയങ്ങളെ ഉൾക്കൊള്ളുക എന്നതാണ് അദ്ദേഹത്തിന് പ്രിയപ്പെട്ട കാര്യം. ഇതേ പുസ്തകം ഒപ്പുചാർത്തിക്കിട്ടാനായി തന്നെ സമീപിച്ച ഇതര മതസ്ഥരുടെ എണ്ണം തന്നെ അദ്ഭുതപ്പെടുത്തിയെന്നാണ് തരൂർ പറഞ്ഞത്. നെഹ്റു വിശ്വസിച്ചത് ഇന്ത്യയിൽനിന്ന് ജാതി അപ്രത്യക്ഷമാകും എന്നാണ്. എന്നാൽ ജാതിയെ ആളുകൾ കൂടുതൽ പുണരുകയാണ് ചെയ്യുന്നത്. അതിനാൽ നെഹ്റുവിന്റെ മതനിരാസമല്ല തരൂർ പിന്തുടരുന്നത്. അതിനാൽ തരൂരിന് കേരളത്തിലെ ബിജെപി വോട്ട് അപഹരിക്കാൻ കഴിയും. 

സംഘപരിവാർ ആഭിമുഖ്യമുള്ളവരെയും, അങ്ങനെ ഒരു വിഭാഗം ബിജെപി വോട്ടുകൾ പിടിക്കലും തരൂരിന്റെ ലക്ഷ്യമാണ്. പഴയ പ്രതാപത്തിലേക്ക് തിരിച്ചുവരണമെങ്കിൽ ബിജെപിയിലേക്കു പോയ തങ്ങളുടെ വിഹിതം വോട്ട് തിരിച്ചുപിടിക്കണം എന്ന് യുഡിഎഫുകാർക്ക് അറിയാം. കേന്ദ്രത്തിൽ ബിജെപിയും കേരളത്തിൽ എൽഡിഎഫും ‘പ്രോ ഇൻകുബൻസിയെ’ നേട്ടമാക്കുന്ന കാലമാണ്. അതിനെ തകർക്കണമെങ്കിൽ ശക്തമായ കാറ്റുണ്ടാവണം. ദേശീയതലത്തിൽ 19% വോട്ടിലേക്ക് പാർട്ടി കൂപ്പുകുത്തി. 2009ൽ മൻമോഹൻ സിങ്ങിന് വിദ്യാഭ്യാസമുള്ളവരുടെ, ഇടത്തരക്കാരുടെ, പ്രഫഷനലുകളുടെ ഒക്കെ പിന്തുണ കിട്ടി. പിന്നീട് ആ വിഭാഗത്തെ ബിജെപി കൊണ്ടുപോയി എന്നാണ് തരൂർ എഴുതിയിട്ടുള്ളത്. അതിനാൽ ആ വിഭാഗത്തെ കോൺഗ്രസിൽ തിരിച്ചെത്തിക്കണമെന്നും അദ്ദേഹം നിർദേശിക്കുന്നു. തന്റെ നീക്കങ്ങൾക്ക് ഈ ലക്ഷ്യമുണ്ടെന്ന് തരൂർ പറയാതെ പറയുന്നു. 

∙ തരൂരിനെ ആർക്കാണ് പേടി?

രാജാവ് നഗ്നനാണ് എന്നാണ് ശശി തരൂർ പറഞ്ഞത്. അതായത് കേരളത്തിൽ ഒരു പാർട്ടിയിലും പഴയതുപോലെ ജനകീയ അടിത്തറയുള്ള നേതാക്കളില്ല എന്ന വസ്തുതയാണ് തരൂരിനോടുള്ള ജനങ്ങളുടെ താൽപര്യം പുറത്തുകൊണ്ടുവന്നത്. കഴിഞ്ഞ പതിറ്റാണ്ടിൽ വി.എസ്. അച്യുതാനന്ദൻ സൃഷ്ടിച്ച ഓളം കഴിഞ്ഞതിനു ശേഷം രാഷ്ട്രീയം ശാന്തമായിരുന്നു. അഴിമതിയും പക്ഷപാതിത്വവും രാഷ്ട്രീയക്കൊലകളും മാത്രമാണ് ചലനങ്ങളുണ്ടാക്കിയത്. ഇത് യുവതലമുറയടക്കമുള്ളവരെ ചതിക്കുന്നതാണെന്ന തോന്നൽ ശരാശരി മലയാളിക്കുണ്ട്. ആധുനിക കാലത്തിന് പറ്റിയ ഒരു നേതാവിനെ തേടുകയായിരുന്നു കേരളമനസ്സ്. രാഷ്ട്രീയം അടക്കമുള്ള സാമൂഹ്യവിഷയങ്ങളിൽ പ്രചോദിപ്പിക്കുന്ന തരത്തിൽ ആശയാവിഷ്കാരം നടത്താനുള്ള തരൂരിന്റെ കഴിവിനെ കേരളം അംഗീകരിക്കാൻ അതൊരു കാരണമാണ്. തരൂരിന്റെ പ്രസംഗങ്ങൾ, എഴുത്തുകൾ എന്നിവയിലൂടെ പ്രസരിക്കുന്ന നിരീക്ഷണങ്ങൾക്ക് കേരളം കാതുകൂർപ്പിക്കുന്നു. ‘നിരീക്ഷണം പോയിട്ട് മറ്റുള്ള രാഷ്ട്രീയക്കാർ ഇതൊന്നും ആലോചിക്കുന്നുപോലുമില്ല’ എന്ന് നിരീക്ഷിച്ചത് ഒരു ഇടതുബുദ്ധിജീവിയാണ്. നിലവിലുള്ള രാഷ്ട്രീയ നേതാക്കളുടെ പരിമിതികളെയാണ് തരൂർ പുറത്തുകൊണ്ടുവരുന്നത്. വലിയ വര വരച്ച് മറ്റെല്ലാറ്റിനെയും ചെറിയ വരയാക്കുന്ന തന്ത്രം. അതാണ് കേരളത്തിൽ ഇപ്പോൾ നടക്കുന്ന പ്രതിഭാസം. 

നേതാവ് ഒന്നുകിൽ കരുത്തനായിരിക്കണം, അല്ലെങ്കിൽ അസാധാരണ വ്യക്തിത്വമുള്ളവരായിരിക്കണം. അത്തരം വ്യക്തികളുടെ പിന്നിൽ അണിനിരക്കുന്നതാണ് പൊതുരീതി. കേരളത്തിൽ കരുത്തൻ പ്രതിച്ഛായയാണ് പിണറായി വിജയന് കോവിഡ് പ്രതിസന്ധി കാലം നൽകിയത്. എല്ലാ വിഭാഗം ജനങ്ങളെയും ആകർഷിക്കുന്ന വ്യക്തിത്വമാണ് തരൂരിന്റെ മുതൽക്കൂട്ട്. കേരള രാഷ്ട്രീയത്തിൽ നേതൃഗുണമുള്ള വ്യക്തിത്വങ്ങളുടെ അഭാവം പ്രകടമാണ്. സമരങ്ങൾ നയിച്ച പാരമ്പര്യം പറഞ്ഞ് തരൂരിനെ നിഷ്പ്രഭനാക്കാൻ നോക്കുന്നവർ ഒബാമയും ഋഷി സുനകും ഏതു സമരം നയിച്ചു എന്നു ചിന്തിക്കുന്നില്ല. ദിവസവും സംഭവിക്കുന്ന കാര്യങ്ങളെക്കുറിച്ച് പത്രസമ്മേളനം നടത്തുന്നതാണ് പ്രതിപക്ഷത്തിന്റെ ചുമതല എന്നു കരുതുന്ന നേതാക്കളാണ് ഏറെയും. സ്വന്തമായി എന്തെങ്കിലും ആശയങ്ങൾ  മുന്നോട്ടുവച്ച് മുന്നോട്ടുനീങ്ങാൻ കഴിയുന്നില്ല. ഇവിടെയാണ് ഏതു വിഷയത്തെപ്പറ്റിയും അഭിപ്രായം പറയാൻ കഴിയുന്ന തരൂരിനെ കേൾക്കാൻ ജനം കാതുകൂർപ്പിക്കുന്നത്. കേരള രാഷ്ട്രീയത്തിന്റെ ദിശ മാറുന്നു എന്നാണ് സൂചന. 

∙ പോസിറ്റീവ് രാഷ്ട്രീയം

തരൂർ പറഞ്ഞിരുന്നെങ്കിൽ വേദി നൽകാൻ തയാറാകുമെന്നാണ് രാജ്മോഹൻ ഉണ്ണിത്താൻ പറഞ്ഞത്. ഒരാഴ്ച ശരാശരി 40 യോഗങ്ങൾക്ക് ക്ഷണം കിട്ടുന്നയാളാണ് താൻ എന്നാണ് തരൂർ പറയുന്നത്. അതിനാൽ യോഗങ്ങളിൽ പങ്കെടുക്കുന്നത് വിവാദമാക്കുകയോ വിവാദമാകുകയോ ചെയ്യുന്നത് ഏറ്റവും അദ്ഭുതപ്പെടുത്തുന്നത് അദ്ദേഹത്തെ തന്നെയായിരിക്കും. ഗൂഢാലോചനയിലൂടെ അവസരങ്ങൾ സൃഷ്ടിക്കുന്നു എന്നത് തമാശയായി മാറും. കേരളത്തിൽ അപ്രതീക്ഷിത താരോദയം പോലെ പൊതുസമൂഹം തരൂരിനെ കാണുന്നതിനു പിന്നിൽ സമകാലിക രാഷ്ട്രീയവും കാരണമാണ്. തുടരുന്ന ഗവർണർ– സർക്കാർ പോരും അതിനു പിന്നാലെ പുറത്തുവന്ന സത്യങ്ങളും എല്ലാ വിഭാഗം മലയാളികളെയും നിരാശയിലാഴ്ത്തുന്നതായിരുന്നു. ‌‌

കേരളത്തിന്റെ ഉന്നത വിദ്യാഭ്യാസ മേഖല മുന്നോട്ടല്ലെന്നു മാത്രമല്ല, നെല്ലിപ്പടി കാണുന്ന അവസ്ഥയിലാണെന്നും ഉള്ള തിരിച്ചറിവ് മലയാളികൾക്ക് വിഷാദരോഗം നൽകുന്നതായിരുന്നു. തരൂരിന്റെ വരവ് നന്നായി എന്ന് ഇടതു സർക്കിളുകളിൽ പോലും വ്യാപകമായി പറയപ്പെടുന്നതിന്റെ സാഹചര്യം ഇതാണ്. പെട്ടെന്ന് ജനങ്ങൾക്കിടയിൽ ഒരു ആശ്വാസം പരന്നു. അത്തരമൊരു പോസിറ്റീവ് വികാരം വളർത്താൻ ഒരാൾക്കു കഴിയുന്നുവെങ്കിൽ അതൊരു വലിയ കാര്യം തന്നെയാണ്. സംഘടനാ ചട്ടക്കൂട്, വിഭാഗീയ പ്രവർത്തനം, ഗ്രൂപ്പ് നിർമാണം, സമാന്തര പ്രവർത്തനം എന്നിങ്ങനെ ചതഞ്ഞ പ്രയോഗങ്ങൾകൊണ്ട് തരൂരിനെ നേരിടാൻ നോക്കുമ്പോൾ തരൂരിന് അതൊന്നും പിടികിട്ടുന്നില്ല എന്നതാണ് അദ്ദേഹത്തിന്റെ മഹത്വം. തങ്ങൾ മറ്റുള്ളവരെ അളക്കുന്ന അളവുകോൽ വച്ച് തരൂരിനെ അളക്കുന്നു എന്നിടത്താണ് നേതാക്കൾ സ്വയം പരിഹാസ്യരായി മാറുന്നത്. 

∙ സംഘടന വേണോ, ഭരണം വേണോ?

അച്യുതമേനോൻ മുഖ്യമന്ത്രി ആയിരിക്കുന്ന കാലത്ത് സംഘടനാ ചുമതലകൾ ഒന്നും നിർവഹിച്ചിരുന്നില്ല. അരനൂറ്റാണ്ട് മുൻപ് കേരളം ഭരിക്കാനെത്തിയ അച്യുതമേനോനുമായാണ് തരൂരിനെ പലരും താരതമ്യപ്പെടുത്തുന്നത് എന്നത് യാദൃച്ഛികമല്ല. പാർട്ടിയും ഭരണവും ഒന്നാകുന്നത് ഇടതുപക്ഷ രീതിയാണ്. ജനാധിപത്യ രീതിയിൽ മുന്നോട്ടുപോകാൻ കഴിയാത്തവരാണ്, രണ്ട് അധികാരകേന്ദ്രങ്ങൾ പാടില്ല എന്ന തിയറിക്കു പിന്നിൽ. രണ്ടാം പിണറായി മന്ത്രിസഭ കൂട്ടായ തീരുമാനമല്ല എടുക്കുന്നതെന്ന പരാതി സിപിഎം– സിപിഐ അണികൾക്കുണ്ട്. കമ്യൂണിസ്റ്റ് മൂല്യങ്ങൾക്ക് സ്ഥാനമില്ലെന്ന തിരിച്ചറിവിൽ ഇവർ അസ്വസ്ഥരാണ്. അതോടൊപ്പം  തരൂരിനെ നേരിടാൻ പോപ്പുലർ നേതാവില്ല എന്നത് സിപിഎമ്മിനെ അസ്വസ്ഥമാക്കും. അടി കോൺഗ്രസിലാണെങ്കിലും അണിയറയിൽ ഒരുക്കം സിപിഎമ്മിലാണ്. അതുകൊണ്ടാണ് തരൂർ കോൺഗ്രസിലെ കലഹത്തെ നിസ്സാരമാക്കി കാണുന്നത്. യഥാർഥ വെല്ലുവിളി മറുവശത്തുനിന്നാണെന്ന് അദ്ദേഹത്തിനറിയാം. അതിനായി എന്തുചെയ്യും എന്നിടത്താണ് മാസ്റ്റർ സ്ട്രോക്. 

യുഡിഎഫിൽ അപകടകരമായ നിലനിൽപ്പ് തുടരുന്ന ആർഎസ്പി പോലുള്ള പാർട്ടികൾക്ക് ആശ്വാസം പകരുന്നതാണ്, യുഡിഎഫിന് കിട്ടുന്ന പുനർജീവനം. സഹികെട്ട് വരട്ടെ എന്ന നിലപാടാണ് സിപിഎം ആർഎസ്പിയുടെ കാര്യത്തിൽ സ്വീകരിച്ചിട്ടുള്ളത്. രക്ഷയില്ലെങ്കിൽ ഇടതുപാളയത്തിലേക്ക് തിരിച്ചുപോകാം എന്നാണ് പാർട്ടി കരുതുന്നതും. 2024 ലോക്സഭാ തിരഞ്ഞെടുപ്പിനു മുൻപ് എൽഡിഎഫിലേക്ക് പോകാനാണ് ഒരു വിഭാഗം നീക്കം നടത്തുന്നതെന്നാണ് വാർത്തകൾ. രണ്ടു പക്ഷമായി നിൽക്കുകയാണ് അണികൾ. അതേസമയം അങ്ങനെ വന്നാൽ എൻ.കെ. പ്രേമചന്ദ്രനെ സംബന്ധിച്ചിടത്തോളം അതു ആത്മഹത്യാപരം ആകുകയും ചെയ്യും. സി.പി. ജോൺ നേതൃത്വം നൽകുന്ന സിഎംപിയാണ് മറ്റൊരു പാർട്ടി. ജോണിനെപ്പോലെ സമർഥനായ നേതാവുണ്ടായിട്ടും യുഡിഎഫിലെ അവസ്ഥ കാരണം നേട്ടമുണ്ടാകുന്നില്ല. തരൂർ കൊണ്ടുവരുന്ന കാറ്റിൽ ചെറുപാർട്ടികൾക്കും വ്യക്തിത്വം വീണ്ടെടുക്കാൻ കഴിയും. 

∙ ആൾക്കൂട്ടം എന്തുകൊണ്ട്?

തങ്ങൾക്കു ചുറ്റും ആളുകൂടുന്നില്ല എന്ന പരിഭ്രമം ആണ് പലരുടെയും പെരുമാറ്റത്തിൽ നിന്ന് പുറത്തുവരുന്നത്. ഉപരിപ്ലവതയും കാപട്യവും ഉള്ള നേതാക്കളുമായാണ് തരൂരിനെ ജനങ്ങൾ താരതമ്യം ചെയ്യുന്നത്. കേരള രാഷ്ട്രീയത്തിൽ ശ്രദ്ധ കേന്ദ്രീകരിക്കാനുള്ള തരൂരിന്റെ തീരുമാനം വ്യാപകമായി സ്വാഗതം ചെയ്യപ്പെടുന്നതിന്റെ കാരണം അതാണ്. തരൂർ ഒരു ബഹുമുഖ പ്രതിഭയാണെന്ന് സാധാരണക്കാർ വിശ്വസിക്കുകയും മാനിക്കുകയും ചെയ്യുന്നു. പാർട്ടിയെ നയിക്കാൻ ഏതു നേതാവിനേക്കാളും തരൂരിന് കഴിയുമെന്ന് അണികളും കരുതുന്നു. അണികളുടെ ഈ വികാരത്തെ ഗ്രൂപ്പിനതീതമായി നിരന്നുനിന്ന് നേരിടാനുള്ള ഒരു വിഭാഗം നേതാക്കളുടെ ആദ്യഘട്ട ശ്രമമാണ് ഇതുവരെ കണ്ടത്. പക്ഷേ അതു സാധ്യമല്ലെന്ന് തിരിച്ചറിഞ്ഞ് എം.കെ. രാഘവന്റെയും കെ. മുരളീധരന്റെയും നിരയിലേക്ക് അവർ എത്തിച്ചേരും. അപ്പോഴാണ് യഥാർഥ പ്രതിസന്ധി രൂപപ്പെടുക. അത് മറുവശത്തായിരിക്കും. തരൂരിനെ മുഖ്യമന്ത്രി സ്ഥാനാർഥിയായി യുഡിഎഫ് ഉയർത്തിക്കാട്ടുമ്പോൾ മറുവശത്ത് ആരായിരിക്കും? ഇതാവും കേരള രാഷ്ട്രീയത്തെ വരുംകാലത്ത് ഇളക്കിമറിക്കുക. 

English Summary: Why does Shashi Tharoor's Attempts to set Footing in Kerala Politics Upset Some?