സ്വർഗത്തിൽനിന്ന് എണ്ണയൊഴുകുന്നു, രാജ്യത്ത് മുഴുപ്പട്ടിണി; ധൂർത്തടിച്ച് പ്രസിഡന്റും മകനും

പ്രസിഡന്റിന്റെ മകനും രാജ്യത്തിന്റെ വൈസ് പ്രസിഡന്റുമായ തിയഡോറോ ഒബിയാങ് എൻഗുമാ മാംഗ്വെ തന്റെ ആഡംബര ജീവിതശൈലി കൊണ്ട് കുപ്രസിദ്ധനാണ്. വിലപിടിച്ച കാറുകളും കൊട്ടാരങ്ങളുമെല്ലാം വാങ്ങിക്കൂട്ടുന്നതിലാണ് കൊച്ചുപ്രസിഡന്റിന് ഹരം. കലിഫോർണിയയിലും ഫ്രാൻസിലുമായി പണമൊഴുക്കുകയാണ് മാംഗ്വെ. മൈക്കൽ ജാക്സന്റെ കടുത്ത ആരാധാകനായ വൈസ് പ്രസിഡന്റ് അദ്ദേഹത്തിന്റെ വിലയേറിയ കയ്യുറകൾ ഉൾപ്പെടെ ശേഖരിച്ചിട്ടുണ്ട്. 

ഡാനിഷ് മോഡലായ ക്രിസ്റ്റീന മിക്കെൽസനായിരുന്നു ഒരു കാലത്ത് ഇദ്ദേഹത്തിന്റെ കാമുകി. ഇപ്പോഴും ആ ബന്ധം തുടരുന്നുണ്ടെന്നാണ് റിപ്പോർട്ടുകൾ. മിസ് ഡെന്മാർക്ക് കൂടിയായിരുന്നു ക്രിസ്റ്റീന. മാംഗ്വെയുടെ പേരിലുള്ള കേസുകൾ ഇവർക്കും തിരിച്ചടിയായിരുന്നു. മിസ് ഡെന്മാർക്ക് പദവി പോലും ഒരു ഘട്ടത്തിൽ നഷ്ടമായി. പണം തട്ടിപ്പു കേസിൽ സ്വിറ്റ്സർലൻഡിന്റെ അഭ്യർഥന പ്രകാരം ഡെന്മാർക്ക് സർക്കാർ മാംഗ്വെയുടെ ആഡംബര നൗക പിടിച്ചെടുത്തപ്പോഴായിരുന്നു ഇത്. പത്തു കോടി ഡോളർ മൂല്യമുള്ള ആഡംബര നൗകയാണ് അന്ന് പിടിച്ചെടുത്തത്.

അഴിമതിയിലും തട്ടിപ്പിലും മുങ്ങി നടത്തിയ ചില പണമിടപാടുകളെ തുടർന്ന് 2001 ൽ യുഎസിൽ വച്ചും ഇദ്ദേഹത്തിന്റെ സ്വത്തുക്കൾ പിടിച്ചെടുക്കുകയുണ്ടായി. വിലയേറിയ കാറുകൾ ഉൾപ്പെടെയുള്ള വസ്തുക്കൾ ലേലത്തിന് വച്ച് ലഭിച്ച തുക ഗിനിയിലെ ജനങ്ങൾക്കായി വകയിരുത്തുകയും ചെയ്തു. മാംഗ്വെ പ്രതിയായ സമാനമായ തട്ടിപ്പുകേസിൽ സ്വിറ്റ്സർലൻഡും ഒടുവിൽ ഒത്തുതീർപ്പിന് സമ്മതിക്കുകയായിരുന്നു. നഷ്ടപരിഹാരമായി ലഭിച്ച തുക ഗിനിയിലെ ജനങ്ങൾക്ക് ഉപകാരപ്രദമാകുന്ന പദ്ധതിയിൽ നിക്ഷേപിക്കാൻ ധാരണയാവുകയും ചെയ്തു. വൈസ് പ്രസിഡന്റ് പദവിക്ക് ലഭിക്കുന്ന ശമ്പളത്തിന്റെ ആയിരം മടങ്ങാണ്, പാരിസിലെ ആറ് നില ബംഗ്ലാവിനും എണ്ണമറ്റ സ്പോർട്സ് കാറുകൾക്കുമായി മാംഗ്വെ ചെലവഴിക്കുന്നത് എന്നാണ് ഫ്രാൻസിലെ കോടതി നിരീക്ഷിച്ചത്. പൊതുമുതൽ കൊള്ളയടിച്ചതിനും കള്ളപ്പണം വെളുപ്പിക്കാൻ ശ്രമിച്ചതിനും തട്ടിപ്പിനുമെല്ലാമെതിരെയായിരുന്നു ഫ്രഞ്ച് കോടതിയുടെ വിധി. എന്തു‌തന്നെയായാലും സ്വന്തം രാജ്യത്ത് മാംഗ്വെയ്ക്ക് എതിരെ ഒരു ചെറുവിരൽ പോലുമനങ്ങില്ല. തന്റെ കാലശേഷം മകനെ ഭരണാധികാരിയാക്കാനുള്ള കരുനീക്കങ്ങൾ നടത്തുകയാണ‌ിപ്പോൾ പ്രസിഡന്റ്.

∙ എണ്ണയൊഴുകുന്നു, എന്നാലും മുഴുപ്പട്ടിണി

എണ്ണയാണ് ആഫ്രിക്കയിലെ ഈ കൊച്ചു രാജ്യത്തിന്റെ പൊന്ന്. സബ് സഹാറൻ ആഫ്രിക്കയിൽ നൈജീരിയയ്ക്കും അംഗോളയ്ക്കും സുഡാനും ശേഷം ഏറ്റവുമധികം എണ്ണ ഉൽപാദിപ്പിക്കുന്ന രാജ്യമാണിന്ന് ഗിനി. 27 വർഷങ്ങൾക്ക് മുൻപ് മൊബീൽ എന്ന അമേരിക്കൻ എണ്ണക്കമ്പനി ഇക്വറ്റോറിയൽ ഗിനിയിൽ വൻ എണ്ണശേഖരം കണ്ടെത്തിയത് രാജ്യത്തിന്റെ തലവരതന്നെ മാറ്റിവരയ്ക്കുകയായിരുന്നു. രാജ്യത്തിന് പുരോഗതിയിലേക്കുള്ള വഴി തുറന്ന എണ്ണനിക്ഷേപത്തെ ‘സ്വർഗത്തിൽ നിന്നുള്ള മന്നാ’ എന്നാണ് ഒബിയാങ് അന്ന് വിശേഷിപ്പിച്ചത്. 40 വർഷക്കാലം മരുഭൂമിയിൽ അലഞ്ഞു നടന്ന ഇസ്രയേലികൾക്ക് ജീവൻ നിലനിർത്താനായി ദൈവം നൽകിയ അപൂർവ ഭക്ഷണമാണ് മന്നാ. ഹീബ്രുവിൽ സ്വർഗത്തിന്റെ അപ്പം, ആത്മീയ മാംസം, ദൂതന്റെ ഭക്ഷണം എന്നെല്ലാമാണ് അർഥം. നൂറ്റാണ്ടുകൾ നീണ്ട കൊളോണിയൽ ഭരണവും അടിമത്തവും തളർത്തിക്കളഞ്ഞ രാജ്യത്തിന് എണ്ണയിലൂടെ വിശപ്പടക്കാനും ഉയർന്നുവരാനും കഴിയുമെന്നായിരുന്നു പ്രതീക്ഷ. എന്നാൽ പിന്നീടുള്ള വർഷങ്ങളിൽ അതൊരു മിഥ്യാധാരണയാണെന്ന് തെളിയിക്കപ്പെട്ടു.

രാജ്യം സമ്പന്നമായെങ്കിലും ജനങ്ങളിൽ ഭൂരിഭാഗവും പട്ടിണിയിൽനിന്നു കര കയറിയില്ല. എണ്ണയിൽനിന്ന് കൊയ്തെടുക്കുന്ന പണമെല്ലാം പ്രസിഡന്റും കൂട്ടാളികളും ഉൾപ്പെട്ട പ്രബലവിഭാഗങ്ങളിലേക്ക് മാത്രം ഒഴുകി. 2006 ലെ ഫോബ്സ് പട്ടിക പ്രകാരം 600 മില്യൻ ഡോളറിന്റെ ആസ്തിയാണ് ഗിനി പ്രസിഡന്റിനുള്ളത്. ആളോഹരി വരുമാനം വളരെ കൂടുതലാണെങ്കിലും യുണൈറ്റഡ് നാഷൻസ് ‍ഡവലപ്മെന്റ് പ്രോഗ്രാമിന്റെ കണക്കുകൾ പ്രകാരം സാമൂഹിക –സാമ്പത്തിക പുരോഗതിയിൽ 188 രാജ്യങ്ങളിൽ‍ 138ാം സ്ഥാനത്താണ് ഗിനി. ജനസംഖ്യയുടെ പകുതിയോളം പേരും ശുദ്ധമായ കുടിവെള്ളം പോലും കിട്ടാതെ കഷ്ടപ്പെടുകയാണ്. എണ്ണയിൽനിന്നുള്ള കോടിക്കണക്കിന് രൂപയുടെ സമ്പത്ത് പൊതുജന ക്ഷേമത്തിനായി ഉപയോഗിക്കാതെ ധൂർത്തടിച്ച് കളയുന്ന സ്വേച്ഛാധിപത്യത്തിന്റെ ഉത്തമോദാഹരണമാണിന്ന് ഈ രാജ്യം. ക്രൂഡ് ഓയിലിന് പുറമെ ബോക്സൈറ്റ്, ഇരുമ്പയിര് എന്നിവയുടെ ശേഖരവും ഗിനിയെ സമ്പന്നമാക്കുന്നു. സ്വർണവും ഡയമണ്ടും ഉൾപ്പെടെയുള്ളവയും ഗിനിയുടെ മണ്ണിൽ സുലഭം.

∙ ആകെ മൊത്തം എത്ര ഗിനി!

ഗിനി എന്ന പേരിൽ ആഫ്രിക്കൻ രാജ്യങ്ങൾ ഒന്നും രണ്ടുമല്ല നാലിലേറെയാണ്. ഗിനി, ഇക്വറ്റോറിയൽ ഗിനി, ഗിനി ബിസാവ് തുടങ്ങിയവയാണ് അവ. കറുത്ത ആളുകളുടെ കൂട്ടം എന്ന പദത്തിൽ നിന്നാവാം ഗിനി എന്ന പേര് വന്നത് എന്ന് ചില പഠനങ്ങൾ പറയുന്നു. കോളനി കാലഘട്ടത്തിൽ ആഫ്രിക്കയിലെ വിവിധ സ്ഥലങ്ങളെ എളുപ്പത്തിൽ മനസ്സിലാക്കാൻ ഗിനി എന്ന പേര് ഉപയോഗിച്ച് തുടങ്ങി. പോർച്ചുഗൽ ഗിനി, സ്പാനിഷ് ഗിനി, ഫ്രഞ്ച് ഗിനി, ജർമൻ ഗിനി എന്നിവയൊക്കെ അങ്ങനെ വന്നതാണ്. സ്വതന്ത്ര്യം നേടിയതിനു ശേഷം, പേരിലെ ഗിനി നിലനിർത്താൻ‍ പല രാജ്യങ്ങളും തീരുമാനമെടുക്കുകയായിരുന്നു. സ്പാനിഷ് ഗിനിയാണ് ഇക്വറ്റോറിയൽ ഗിനി. പോർച്ചുഗൽ ഗിനിയെന്നത് ഗിനി ബിസാവ് ആയപ്പോൾ ഗിനി എന്ന പേര് മാത്രമായി ഫ്രഞ്ച് ഗിനിയും മാറി. എന്നാൽ ജർമൻ ഗിനികൾ കാമറൂൺ, ടോഗോ എന്നിങ്ങനെ മറ്റു പേരുകളിലേക്ക് മാറുകയായിരുന്നു

∙ ഭരണപരിഷ്കാരങ്ങൾ

ഐക്യരാഷ്ട്ര സംഘടനയുടെ പ്രശംസ പിടിച്ചുപറ്റിയ ഒരു നടപടിയും പ്രസിഡന്റിന്റെ ഭാഗത്തുനിന്നുണ്ടായിരുന്നു. രാജ്യത്ത് വധശിക്ഷ നിർത്തലാക്കിയതാണ് ആ സംഭവം. ആഫ്രിക്കയിൽ വധശിക്ഷ നിർത്തലാക്കുന്ന 25–ാമത്തെ രാജ്യമാണിത്. പല ചെപ്പടി വിദ്യകളും കാട്ടി ലോകത്തിനു മുൻപിൽ മുഖം നന്നാക്കാനുള്ള കടുത്ത പരിശ്രമത്തിലാണ് ഇക്വറ്റോറിയൽ ഗിനി. മാധ്യമസ്വതന്ത്ര്യത്തിന് കൂച്ചുവിലങ്ങിട്ടിട്ടുള്ളതിനാൽ മാത്രം സർക്കാരിനെ സംബന്ധിക്കുന്ന പല വാർത്തകളും രാജ്യത്തിനകത്ത് വാർത്തയാകാറില്ല. എന്നാൽ ഒബിയാങ്ങിന്റെ ഭരണത്തിനു കീഴിൽ അഴിമതിയും അടിച്ചമർത്തലും നടക്കുന്നത് പുറംനാട്ടിൽ പാട്ടാണ്.

∙ വളർച്ചയുടെ തളർച്ച

ആരോഗ്യ –വിദ്യാഭ്യാസ രംഗങ്ങളിൽ കൂടുതൽ പണം ചെലവഴിക്കുമെന്ന് ബജറ്റുകളിൽ ആവർത്തിക്കുന്നതല്ലാതെ പ്രാവർത്തികമാകുന്നില്ല എന്നതാണ് ഇക്വറ്റോറിയൽ ഗിനിക്കെതിരെയുള്ള വലിയ ആരോപണം. ഐഎംഎഫിന്റെ കണക്കുകൾ പ്രകാരം ചില വർഷങ്ങളിൽ ബജറ്റിന്റെ രണ്ടു ശതമാനം മാത്രമാണ് വിദ്യാഭ്യാസത്തിനായി നൽകുന്നത്. ആരോഗ്യ മേഖലയുടെ കാര്യവും അങ്ങനെത്തന്നെ. വലിയ കെട്ടിടങ്ങളും മറ്റും നിർമിക്കാനാണ് ബജറ്റിന്റെ സിംഹഭാഗവും മാറ്റിവയ്ക്കുന്നത്. ഇക്വറ്റോറിയൽ ഗിനിയിലെ നാലിൽ ഒരു കുട്ടിക്ക് പോഷകാഹാരക്കുറവു മൂലം വളർച്ചയില്ലാതാകുന്ന അവസ്ഥയാണ്. ഓർഗനൈസേഷൻ ഓഫ് ഇക്കണോമിക് കോൺഫറൻസ് ഡവലപ്മെന്റിന്റെ കണക്ക് പ്രകാരം, മറ്റ് ആഫ്രിക്കൻ രാജ്യങ്ങളുമായി താരതമ്യം ചെയ്യുമ്പോൾ ഗിനിയുടെ നികുതിയും ജിഡിപിയുമായുള്ള ആനുപാതം 7.5 ശതമാനത്തോളം കുറവാണ്. 60 ശതമാനത്തിൽ കൂടുതൽ ആളുകളുടെയും പ്രതിദിന വരുമാനം ഒരു ഡോളറിൽ താഴെയാണ്. ഇങ്ങനെയൊക്കെയാണ് സാഹചര്യമെങ്കിലും, രാജ്യത്തെ പ്രസിഡന്റിന്റെ മകന്റെ കോടികളുടെ ധൂർത്തിനു മാത്രം ഇപ്പോഴും ഒരു കുറവുമില്ലെന്നതാണ് യാഥാർഥ്യം.

English Summary: Teodoro Obiang, Equatorial Guinea's Iron-fisted Ruler, and World's Longest-serving President