ബജറ്റ് പെട്ടി തുറക്കുമ്പോൾ മോദി സർക്കാരിന് വോട്ടു വീഴുമോ? വരുമോ വർക് ഫ്രം ഹോമിനും അലവൻസ്?

ദിവസങ്ങൾക്കുള്ളിൽ അവതരിപ്പിക്കുന്ന രണ്ടാം മോദി സർക്കാരിന്റെ അവസാനത്തെ സമ്പൂർണ ബജറ്റ് ജനകീയമായിരിക്കുമെന്നതിൽ അധികമാർക്കും സംശയമില്ല. ഈ വർഷം തന്നെ 9 സംസ്ഥാനങ്ങളിലേക്കു നടക്കുന്ന നിയമസഭാ തിരഞ്ഞെടുപ്പിലും 2024 ആദ്യം നടക്കുന്ന ലോക്സഭാ തിരഞ്ഞെടുപ്പിലും വോട്ട് പെട്ടിയിലാക്കാനുള്ളതെല്ലാം ബജറ്റ് പെട്ടിയിൽ നിറച്ചിട്ടുണ്ടാവുമെന്ന പ്രതീക്ഷയോടെയാണ് നിർമല സീതാരാമന്റെ ബജറ്റിനായി രാജ്യം കാത്തിരിക്കുന്നത്. ബജറ്റിൽ ജനപ്രിയ പ്രഖ്യാപനങ്ങളുടെ പെരുമഴ തന്നെ പ്രതീക്ഷിക്കാമോ? അതോ വിലപ്പെരുപ്പവും സാമ്പത്തികമാന്ദ്യവും അടക്കമുള്ള സാമ്പത്തിക സാഹചര്യം കണക്കിലെടുത്ത് ചെലവുചുരുക്കലിന്റെയും മിതത്വത്തിന്റെയും പാതയിലായിരിക്കുമോ ബജറ്റ്? 

ജീവിതച്ചെലവ് പരിധി വിട്ടുയരുന്ന സാഹചര്യത്തിൽ ബജറ്റിനെ വലിയ പ്രതീക്ഷയോടെയാണു സാധാരണക്കാർ കാണുന്നത്. ആദായ നികുതി സ്ലാബുകളിൽ ഇളവുകൾ ഇത്തവണ എല്ലാവരുംതന്നെ പ്രതീക്ഷിക്കുന്നുണ്ട്. സ്റ്റാൻഡേഡ് ഡിഡക്ഷനും 80 സി ഇളവു പരിധിയും ഉയർത്തി ശമ്പളക്കാരെ സന്തോഷിപ്പിക്കുമോ? ഇറക്കുമതി നികുതി കുറച്ച് സ്വർണവില കുറയ്ക്കാനുള്ള ശ്രമം നിർമല സീതാരാമൻ നടത്തുമോ? പലിശ നിരക്കുകൾ ഉയർന്ന നിരക്കിലായ സാഹചര്യത്തിൽ വായ്പകളിൽ കൂടുതൽ ആദായനികുതിയിളവു പ്രഖ്യാപിക്കുമോ? ഏതായാലും ജനപ്രിയ പദ്ധതികൾ പ്രഖ്യാപിക്കേണ്ട ബാധ്യത രണ്ടുതരത്തിൽ സർക്കാരിനുണ്ട്. വരാനിരിക്കുന്ന തിരഞ്ഞെടുപ്പുകളാണ് ഒന്നാമത്തേതെങ്കിൽ രണ്ടാമത്തേത് സാമ്പത്തിക വളർച്ചാ നിരക്ക് ഉയർത്തുകയെന്ന വെല്ലുവിളിയാണ്. 

വിലപ്പെരുപ്പം നിയന്ത്രിക്കാനായി റിസർവ് ബാങ്ക് അടിസ്ഥാന നിരക്കുകൾ കുത്തനെ കൂട്ടിയതോടെ വായ്പാ നിരക്കുകൾ ഉയർന്നു. വിലപ്പെരുപ്പ സൂചികകളിൽ ചെറിയ തോതിലുള്ള ആശ്വാസം കാണുന്നുണ്ടെങ്കിലും അവശ്യസാധനങ്ങളുടെയെല്ലാം വില വലിയ തോതിൽ ഉയർന്നു തന്നെ തുടരുകയാണ്. പൊതുവിപണിയിൽ ചെലവഴിക്കാൻ രാജ്യത്തെ സാധാരണക്കാരുടെ പക്കൽ പണമില്ലാത്ത സാഹചര്യമാണുള്ളത്. വിപണിയിലേക്ക് പണമൊഴുക്കാനുള്ള നടപടികൾ സർക്കാർ കൊണ്ടുവന്നില്ലെങ്കിൽ ഇത് ജിഡിപി വളർച്ചയെ തടസ്സപ്പെടുത്തും. അതിനാൽ പണം ചെലവഴിക്കുന്ന വലിയ പദ്ധതികൾക്കൊപ്പം ആളുകളുടെ കൈകളിൽ കൂടുതൽ പണമെത്താനുള്ള, ജനകീയമെന്നു തോന്നുന്ന തീരുമാനങ്ങളും ബജറ്റിൽ ഉണ്ടാകും. ബജറ്റിൽ നികുതി മേഖലയിൽ സാധാരണക്കാർ പ്രതീക്ഷിക്കുന്ന ഇളവുകളെന്തൊക്കെയാണെന്നു നോക്കാം.

∙ ആദായ നികുതി സ്ലാബുകളിൽ ഇളക്കമുണ്ടാകുമോ?

2020ലെ ബജറ്റ് പ്രഖ്യാപനത്തോടെ ആദായനികുതി രണ്ടു രീതിയിൽ നികുതിദായകർക്ക് അടയ്ക്കാം. ഏതു രീതിയിൽ വേണമെന്ന് രാജ്യത്തെ ഓരോ നികുതിദായകനും തിരഞ്ഞെടുക്കാം. പഴയ രീതിയിൽ തുടരാനും പുതിയ രീതിയിലേക്കു മാറാനും ഓപ്ഷനുകളുണ്ട്. പുതിയ രീതി തിരഞ്ഞെടുത്താൽ പിന്നീട് പഴയ രീതിയിലേക്കു മടങ്ങിപ്പോകാനാകില്ല. എന്നാൽ ഭൂരിപക്ഷം, നികുതിയദായകരും ഇപ്പോഴും വിവിധ ഇളവുകൾ നൽകുന്ന പഴയ രീതിയിലാണ് റിട്ടേൺ ഫയൽ ചെയ്യുന്നത്. പുതിയ ആദായ നികുതി വ്യവസ്ഥയിൽ ഇൻകം ടാക്സ് ആക്ടിന്റെ സെക്‌ഷൻ 10നു കീഴിൽ വരുന്ന വീട്ടു വാടക, ലീവ് ട്രാവൽ അലവൻസ് (എൽടിഎ) എന്നിവയൊന്നും ക്ലെയിം ചെയ്യാനാകില്ല. 80 സി, 80 സിസിസി, 80 സിസിഡി, 80 ഡി, 80 ഡിഡി, 80 ഇ, 80 ഇഇ, 80 ജി, 80 ജിജി, 80ജിജിഎ, 80 ജിജിസി, 80 ടിടിഎ, ഭവന വായ്പയുടെ പലിശയിൽ ലഭിക്കുന്ന കിഴിവ്, സ്റ്റാൻഡേർഡ് ഡിഡക്ഷൻ (50,000 രൂപ) എന്നിവയും ലഭിക്കില്ല. മുതിർന്ന പൗരനാണോ അല്ലയോ എന്ന വ്യത്യാസവും പുതിയ രീതിയിൽ വരുന്നില്ല. മുതിർന്ന പൗരൻമാർക്ക് 80ഡിയിൽ അടക്കം പ്രത്യേക ഇളവുകൾ പഴയ സമ്പ്രദായത്തിൽ ലഭിക്കുന്നുണ്ട്. പുതിയ വ്യവസ്ഥയിൽ എല്ലാവർക്കും ഒരേതരം ഇളവാണ് സർക്കാർ നൽകുന്നത്.

ആദായനികുതി സംവിധാനം കൂടുതൽ ലളിതമാക്കാൻ സർക്കാർ കൊണ്ടുവന്ന പുതിയ വ്യവസ്ഥ പരാജയമാണെന്നു സമ്മതിക്കാതിരിക്കാനായി, അല്ലെങ്കിൽ കൂടുതൽ നികുതിദാതാക്കളെ ഇതിലേക്ക് ആകർഷിക്കാനായി കൂടുതൽ ഇളവുകൾ പുതിയ വ്യവസ്ഥയിൽ കൊണ്ടുവന്നേക്കാം. നിലവിൽ പുതിയ വ്യവസ്ഥ കൊണ്ടുവന്നതിനാൽ പഴയ വ്യവസ്ഥയിലെ ഇളവുകൾ കൂട്ടുമോ എന്നും സംശയമുണ്ട്. എങ്കിലും പുതിയ വ്യവസ്ഥയിലേക്ക് ഇളവുകൾ കൊണ്ടുവരുമോ, പഴയ വ്യവസ്ഥയിൽ കൂടുതൽ ഇളവുകൾ നൽകുമോ എന്നെല്ലാം കാത്തിരുന്നു കാണേണ്ടതാണ്. നിലവിൽ 2.5 ലക്ഷം രൂപയാണ് ആദായ നികുതി ഇളവിന്റെ പരിധി. ഒരു പക്ഷേ, ആദായനികുതി പരിധി ഉപാധികളില്ലാതെ 5 ലക്ഷത്തിലേക്ക് ഉയർത്താനുള്ള വലിയ തീരുമാനം കേന്ദ്ര സർക്കാർ കൈക്കൊണ്ടേക്കും. നിലവിൽ പുതിയ നികുതി രീതിയിൽ 5 ലക്ഷം രൂപ വരുന്നുണ്ടെങ്കിലും ഇതിൽ പലവിധ ഉപാധികളുമുണ്ട്. ഇത്തവണത്തെ ബജറ്റിൽ ഏകീകൃത രീതി കൊണ്ടുവന്നേക്കുമെന്നു കരുതുന്ന നികുതി വിദഗ്ധരുമുണ്ട്.

∙ സ്റ്റാൻഡേർഡ് ഡിഡക്ഷൻ പരിധി കൂട്ടുമോ?

മോദിസർക്കാരിന്റെ 2019 ലെ ഇടക്കാല ബജറ്റിലാണ് സ്റ്റാൻഡേഡ് ഡിഡക്ഷൻ പരിധി 50,000 രൂപയാക്കി ഉയർത്തിയത്. എന്നാൽ ഇപ്പോഴത്തെ വിലപ്പെരുപ്പത്തോത് അതനുസരിച്ച് ഈ തുക വളരെക്കുറവാണ്. 2019 ആയി താരതമ്യം ചെയ്യുമ്പോൾ അവശ്യസാധനങ്ങളുടെ വില അടക്കമുള്ള ചെലവുകൾ കുതിച്ചുയരുകയും ചെയ്തു. ഈ സാഹചര്യത്തിൽ സ്റ്റാൻഡേഡ് ഡിഡക്ഷനിൽ കാര്യമായ ഇളവ് രാജ്യത്തെ സാധാരണക്കാരായ നികുതിദായകർ പ്രതീക്ഷിക്കുന്നുണ്ട്. 25,000 രൂപയുടെയോ 50,000 രൂപയുടെയോ വർധനയാണു പ്രതീക്ഷിക്കുന്നത്.

∙ 80 സിയിൽ കൂടുതൽ ഇളവുകൾ

2014–15 ബജറ്റിലാണ് 80 സി പരിധി അവസാനമായി ഉയർത്തിയത്. 1 ലക്ഷം രൂപയിൽനിന്ന് 1.5 ലക്ഷം രൂപയാക്കിയാണ് അന്ന് ഉയർത്തിയത്. 9 വർഷത്തിനു ശേഷമെങ്കിലും നികുതി ഇളവു ലഭിക്കുന്ന നിക്ഷേപങ്ങൾ പ്രോത്സാഹിപ്പിക്കുന്ന 80 സി പരിധി ഉയർത്തുമെന്ന പ്രതീക്ഷയിലാണ് സാധാരണക്കാർ. വിലപ്പെരുപ്പം കുതിച്ചുയരുന്ന സാഹചര്യത്തിലും ഭവനവായ്പയുടെ മുതലിന്റെ തിരിച്ചടവും സ്കൂൾ, കോളജ് സർവകലാശാലകൾ തുടങ്ങിയ വിദ്യാഭ്യാസ സ്ഥാപനങ്ങളിലെ ഫീസുകൾ എല്ലാംകൂടി ഈ ഒന്നര ലക്ഷം രൂപയുടെ പരിധിയിൽ ഒതുങ്ങുകയാണ്. ഇത് 2 ലക്ഷമോ 2.5 ലക്ഷമോ ആക്കി ഉയർത്തണമെന്ന ആവശ്യം ശക്തമാണ്. മധ്യവർഗ കുടുംബങ്ങൾക്ക് കൂടുതൽ നികുതിയിളവുകളുള്ള സമ്പാദ്യപദ്ധതികൾ തുടങ്ങാനും ഇതു സഹായകമാകും.