ഇസ്രയേല്‍ യാത്രയ്ക്ക് പണം വാങ്ങി ഏജന്റ്?; കൃഷിയിൽ മെച്ചമില്ല, ബിജു എന്തിനാണ് ഇരിട്ടി വിട്ടത്?

അടുത്ത കുറച്ചു നാളുകളായി ബിജു ഇസ്രയേലിലേക്കു പോകാൻ ആഗ്രഹിച്ചിരുന്നതായി സൂഹൃത്തുക്കൾ ഓർക്കുന്നു. നാട്ടിൽ വിവിധ കൃഷികൾ നടത്തിയിട്ടും ഏറെ ശ്രമങ്ങൾ നടത്തിയിട്ടും കാര്യമായ മെച്ചം ഉണ്ടാകാത്തതായിരിക്കാം കാരണം. ഒരു ഏജന്റിന് ഇസ്രയേലിൽ പോകാൻ പണം നൽകിയിട്ടു സമയത്ത് കാര്യങ്ങൾ നടത്താത്തതിനാൽ തിരികെ വാങ്ങിയ കഥയും നാട്ടിൽ പരക്കുന്നുണ്ട്. ഈ ശ്രമങ്ങൾക്കിടെ, നൂതന കൃഷി രീതി പഠിക്കാൻ ഇസ്രയേലിലേക്ക് പോകാൻ കർഷകരെ ക്ഷണിച്ചുകൊണ്ടുള്ള പരസ്യം ശ്രദ്ധയിൽ പെട്ട് ബിജു മുൻധാരണയോടെ അപേക്ഷ നൽകിയാതാകാം എന്നാണ് പ്രദേശവാസികൾ കരുതുന്നത്. ടൂറിസ്റ്റ് വീസയിൽ പോയി ഇസ്രയേലിൽ ‘അപ്രത്യക്ഷരായി’ ജോലി ചെയ്യുന്ന ചിലരെ അറിയാവുന്ന ബിജു ഇക്കാര്യവും മുൻകൂറായി ക്രമീകരിച്ചിട്ടുണ്ടാകും എന്നും സംശയിക്കുന്നു.

2022 ഡിസംബർ 20 നാണ് പായം കൃഷി ഭവനിൽ ഓൺലൈനായി ബിജുവിന്റെ അപേക്ഷ എത്തുന്നത്. ഇതനുസരിച്ച് കൃഷി ഓഫിസർ കെ.ജെ.രേഖയുടെ നേതൃത്വത്തിൽ സ്ഥല പരിശോധന നടത്തി. കൃഷി വിളകൾ ഉള്ളതായി കണ്ടെത്തിയതിനാൽ അപേക്ഷ അംഗീകരിക്കുകയും ചെയ്തു. പായം കൃഷിഭവനിലെ ഏക അപേക്ഷകനും ആയതിനാൽ മുൻഗണനാക്രമമെന്ന പ്രശ്നവും ഉണ്ടായില്ല. പ്രശ്നം വിവാദമായപ്പോൾ പക്ഷേ സർക്കാരിലും വകുപ്പ് മേധാവികൾക്കും ഉൾപ്പെടെ എല്ലാവർക്കും മറുപടി നൽകേണ്ട അവസ്ഥയിലാണ് കൃഷി ഓഫിസർ. താൻ നിയമാനുസൃതം മാത്രമേ പ്രവർത്തിച്ചിട്ടുള്ളൂ എന്നും നടപടിക്രമങ്ങൾ എല്ലാം പാലിച്ചിട്ടുണ്ടെന്നുമാണ് കൃഷി ഓഫിസർ വകുപ്പ് മേധാവികൾ മുഖേന സർക്കാരിലേക്ക് കൈമാറിയ പ്രാഥമിക റിപ്പോർട്ടിൽ പറയുന്നത്.

∙ എവിടെയാണ് ബിജു?

കാണാതായതിനു പിന്നാലെ, ഫെബ്രുവരി 17നു തന്നെ ബിജുവിന്റെ സന്ദേശം വീട്ടുകാർക്കു ലഭിച്ചിരുന്നു. ‘അന്വേഷിക്കേണ്ട, സുരക്ഷിതനാണ്’ എന്നായിരുന്നു വാട്‌സാപ് സന്ദേശം. അതിനു ശേഷം കുടുംബക്കാർക്കു മറ്റൊരു വിവരവും ലഭിച്ചിട്ടില്ല. ബിജു എങ്ങനെയെങ്കിലും നാട്ടിൽ എത്തിയാൽ മതി എന്ന ചിന്തയിലാണിപ്പോൾ കുടുംബം. വിവാദങ്ങളും ചർച്ചകളും അന്വേഷണങ്ങളും കുടുംബത്തെയും ഉലച്ചിട്ടുണ്ട്. കൃഷി വകുപ്പ് ശക്തമായ എതിർപ്പറിയിച്ചു നിലകൊള്ളുന്നതിനാൽ ബിജുവിന്റെ ഭാവി എന്താകും എന്നതിലും കുടുംബത്തിനും സുഹൃത്തുക്കൾക്കും ആശങ്ക ഉണ്ട്. വീസ റദ്ദ് ചെയ്ത് ഇന്ത്യയിലേക്ക് മടക്കണമെന്നാണു സർക്കാർ ആവശ്യപ്പെട്ടിട്ടുള്ളത്. സമ്മർദമുണ്ടായാൽ ഇസ്രയേൽ തന്നെ ഇടപെട്ട് അന്വേഷിച്ചു കണ്ടെത്തും. 

ഇന്ത്യയിലേക്ക് മടക്കിയാൽ കേരള സർക്കാരിൽനിന്ന് നിയമ നടപടി നേരിടേണ്ടി വരില്ലേ എന്ന ചോദ്യവും ആശങ്ക ഉയർത്തുന്നുണ്ട്. നിയമപരമായി തെറ്റാണെങ്കിലും, നാട്ടിൽ കൃഷിയിൽ ഉൾപ്പെടെ നടത്തിയ ശ്രമങ്ങൾ കാര്യമായി വിജയിക്കാത്ത സാഹചര്യത്തിൽ ഇസ്രയേലിലേക്ക് കടന്ന് അവിടെ ജോലി ചെയ്യാൻ നടത്തിയ ‘അവിവേകം’ ആയി മാത്രം ആണ് പ്രദേശവാസികൾ ബിജുവിന്റെ തിരോധാനത്തെ കാണുന്നത്. ആദ്യഘട്ടത്തിൽ 20 കർഷകരെയാണ് കൃഷിവകുപ്പ് തിരഞ്ഞെടുത്തത്. അതിൽ ബിജു ഉൾപ്പെട്ടിരുന്നില്ല. വെയ്റ്റിങ് ലിസ്റ്റിൽ ആയിരുന്നു. മന്ത്രിമാരും ഉന്നത ഉദ്യോഗസ്ഥരും ഉൾപ്പെടെയുള്ള സംഘം ആയിരുന്നു ആദ്യം പോകാൻ നിശ്ചയിച്ചത്. എന്നാൽ സംസ്ഥാനതലത്തിൽ വിവാദം ഉയരുകയും മന്ത്രിമാർ ഉൾപ്പെടെ പിൻവലിയുകയും ചെയ്തതോടെ 7 കർഷകർക്ക് കൂടി അവസരം ലഭിക്കുകയായിരുന്നു. അതോടെ ബിജുവിനും നറുക്കു വീണു. അദ്ദേഹം വിവാദത്തിൽപ്പെടുകയും ചെയ്തു.

∙ മന്ത്രി പറഞ്ഞത്...

ഇസ്രയേലിൽ കാണാതായ കർഷകൻ ബിജു കുര്യനെക്കുറിച്ച് ഇതുവരെ ഒരു വിവരവുമില്ലെന്നാണ് കൃഷിമന്ത്രി പി.പ്രസാദ് വാർത്താ സമ്മേളനത്തിൽ പറഞ്ഞത്. ഇസ്രയേലുമായുള്ള ബന്ധത്തിനു തടസ്സം ഉണ്ടാകാത്ത രീതിയിലുള്ള നടപടികളായിരിക്കും സർക്കാർ സ്വീകരിക്കുക. ഇസ്രയേലിലും ഇന്ത്യൻ എംബസിയിലും പരാതി നൽകിയിട്ടുണ്ട്. ബിജു വീട്ടിലേക്കു വിളിച്ചതായി അദ്ദേഹത്തിന്റെ സഹോദരൻ വിളിച്ചു പറഞ്ഞിരുന്നു. സഹോദരൻ തന്നോട് ക്ഷമാപണവും നടത്തി. ബിജു മനഃപൂർവം മുങ്ങിയതാണെന്നാണു കരുതുന്നത്. അല്ലെങ്കിൽ, സംഘത്തിലുള്ളവർ ഇസ്രയേലിൽനിന്നു വിമാനം കയറിയതിനുശേഷം ബിജു നാട്ടിലേക്കു സന്ദേശം അയയ്ക്കില്ലായിരുന്നു. ഒരിക്കലും ചെയ്യാന്‍ പാടില്ലാത്ത കാര്യമാണ് ചെയ്തത്. സര്‍ക്കാരിനെ പ്രതിസന്ധിയിലാക്കി– മന്ത്രി പറഞ്ഞു.

English Summary: Life of Farmer Biju Kurian, Who Went Missing in Israel