വെള്ളക്കെട്ട്, കടലാക്രമണം, ഗതാഗത തടസ്സം; മഴക്കെടുതിയിൽ കേരളം- ചിത്രങ്ങൾ

കോട്ടയം ∙ സംസ്ഥാനത്തു 3 ദിവസം കൂടി ശക്തമായ മഴ തുടരുമെന്ന മുന്നിറിയിപ്പിനിടെ ദുരിതത്തിൽ വലഞ്ഞ് ജനം. കോട്ടയം ജില്ലയുടെ പടിഞ്ഞാറൻ മേഖലയിൽ വെള്ളം ഉയരുകയാണ്. ക്രമാതീതമായി വെള്ളം ഉയർന്നതിനാൽ ആലപ്പുഴ ജില്ലയിലെ എടത്വ ഡിപ്പോയിൽനിന്നു മുട്ടാർ കളങ്ങര, തായങ്കരി, മിത്രക്കരി വഴിയുള്ള കെഎസ്ആർടിസി ബസ് സർവീസുകൾ നിർത്തിവച്ചു. പത്തനംതിട്ടയിൽ പമ്പാ നദി കരകവിഞ്ഞു. താഴ്ന്ന പ്രദേശങ്ങൾ വെള്ളത്തിലായി. ഒറ്റപ്പാലം വാണിയംകുളത്ത് കാറ്റിലും മഴയിലും രണ്ടിടങ്ങളിൽ മരങ്ങൾ വീണു ഗതാഗതം തടസ്സപ്പെട്ടു. ‌കോഴിക്കോട് കരുവഞ്ചാൽ മുണ്ടച്ചാലിൽ മൂന്നു വീടുകളിൽ വെള്ളം കയറി. കടവത്തൂർ ടൗൺ വെള്ളത്തിലാണ്.

കോട്ടയം അയർക്കുന്നം പഞ്ചായത്തിലെ പുന്നത്തുറയിൽ വെള്ളപ്പൊക്കത്തെ തുടർന്ന് ഒറ്റപ്പെട്ടു പോയ കുടുംബത്തെ അഗ്നിരക്ഷാസേന റബർഡിങ്കി ഉപയോഗിച്ച് സുരക്ഷിത സ്ഥാനത്തേക്ക് മാറ്റുന്നു.

കണ്ണൂർ ഉളിക്കൽ വയത്തൂർ മണിപ്പാറ പാലം വെള്ളത്തിനടിയിലായപ്പോൾ. ചിത്രം: മനോരമ

കനത്ത മഴയെ തുടർന്ന് കാസർകോട് മധൂർ മദനന്തേശ്വര സിദ്ധിവിനായക ക്ഷേത്രത്തിൽ വെള്ളം കയറിയപ്പോൾ. ചിത്രം: ജിബിൻ ചെമ്പോല ∙ മനോരമ

പ്ലാപ്പള്ളി കമ്പകത്തും വളവിൽ ശബരിമല പാതയിൽ മരം വീണുണ്ടായ ഗതാഗത തടസ്സം ഫയർഫോഴ്സ് നീക്കുന്നു. ചിത്രം: മനോരമ

കനത്ത മഴയിൽ കോഴിക്കോട് രാമനാട്ടുകര നഗരസഭ കാട്ടാമ്പലം കരുവങ്ങാട്ടുകുഴി അക്ഷര അങ്കണവാടിയുടെ ചുറ്റുമതിൽ തകർന്നപ്പോൾ. കെട്ടിടം സുരക്ഷാ ഭീഷണിയിലാണ്. കൂടുതൽ മണ്ണിടിഞ്ഞാൽ കെട്ടിടം നിലംപൊത്തും എന്ന സ്ഥിതിയാണ്. ചിത്രം: മനോരമ

pazhassi-dam — പഴശ്ശി ഡാം ഷട്ടറുകൾ തുറന്നപ്പോൾ. ചിത്രം: മനോരമ

കോഴിക്കോട് വടകര അരക്കിലാട് റോഡ് വെള്ളത്തിൽ മുങ്ങിയപ്പോൾ. ചിത്രം: മനോരമ

കോഴിക്കോട് കാരശേരി ചെറുപുഴ കരകവിഞ്ഞു, വല്ലത്തായിപ്പാറ പാലം മുങ്ങി. ജില്ലയിൽ നൂറോളം വീടുകളിൽ വെള്ളം കയറി. വടകര നഗരസഭ മുതൽ ചോറോട് പഞ്ചായത്ത് അതിർത്തി വരെയാണ് മഴദുരിതം. തളീക്കരയിൽ റോഡുകൾ വെള്ളത്തിൽ മുങ്ങി, ഗതാഗതം മുടങ്ങി. കണ്ണൂരിൽ പഴശ്ശി ഡാമിന്റെ ഷട്ടറുകൾ 35 സെന്റിമീറ്റർ ഉയർത്തി. വയനാട് നൂൽപ്പുഴ പഞ്ചായത്തിൽ കല്ലൂർ പുഴ കരകവിഞ്ഞു. സമീപത്തെ പുഴങ്കുനി ആദിവാസി കോളനി ഒറ്റപ്പെട്ടു. കാസര്‍കോട് വീരമലക്കുന്നില്‍ വീണ്ടും മണ്ണിടിച്ചിലുണ്ടായി. പാലക്കാട് മരം വീണ് അട്ടപ്പാടിയില്‍ വൈദ്യുതി ബന്ധം താറുമാറായി.

മഴയെത്തുടർന്നു മരം വീണ് കൊയിലാണ്ടി ദേശീയപാതയിൽ മൂടാ ടിവി മംഗലം സ്കൂളിനു സമീപം ഗതാഗതം സ്തംഭിച്ചു. രാവിലെ എട്ടിനായിരുന്നു സംഭവം. അഗ്നിശമനസേനയെത്തി മരം മുറിച്ചു മാറ്റി ഗതാഗതം പുനഃസ്ഥാപിച്ചു. ചിത്രം: മനോരമ

കനത്ത മഴയിൽ കക്കാട് പുഴ കരകവിഞ്ഞൊഴുകിയപ്പോൾ പള്ളിപ്രം റോഡിൽ നാട്ടുകാർ സുരക്ഷാ മുന്നറിയിപ്പിനായി വടം കെട്ടുന്നു. ചിത്രം: മനോരമ

കണ്ണൂർ മുണ്ടേരി പഞ്ചായത്ത് ഒന്നാം വാർഡിൽ കുടുംബാരോഗ്യ കേന്ദ്രത്തിനു സമീപത്തെ ടി.അബൂബക്കറിന്റെ വീട്ടിലേക്ക് അയൽവാസിയുടെ പറമ്പിന്റെ മതിൽ ഇടിഞ്ഞു വീണപ്പോൾ. ചിത്രം: മനോരമ

കൊല്ലം, എറണാകുളം ജില്ലകളിൽ കടലാക്രമണം രൂക്ഷമാണ്. എറണാകുളം കണ്ണമാലിയിൽ മുന്നൂറിലധികം വീടുകളിൽ വെള്ളം കയറിയതോടെ നാട്ടുകാർ ദുരിതത്തിലായി. കനത്ത മഴയെ അവഗണിച്ച് ജനം പ്രതിഷേധത്തിനിറങ്ങി. കൊല്ലം ബീച്ചിന്റെ കൂടുതൽ ഭാഗങ്ങൾ കടലെടുത്തു, സംരക്ഷണ ഭിത്തികൾ തകർന്നു. തൃശൂർ രാമവർമപുരത്ത് വന്മരം കടപുഴകി വീണ് നാല് വൈദ്യുതി പോസ്റ്റുകൾ തകർന്നു. കുതിരാനു സമീപം മണ്ണുത്തി വടക്കഞ്ചേരി ദേശീയപാതയിലെ വഴുക്കുംപാറ മേൽപ്പാതയിൽ കഴിഞ്ഞയാഴ്ച വിള്ളൽ രൂപപ്പെട്ടിടത്ത് വലിയ കുഴിയായി. ഈ ഭാഗത്തു ഗതാഗത നിയന്ത്രണം തുടരുകയാണ്.

കണ്ണൂർ എടക്കാട് പൊലീസ് സ്റ്റേഷനു സമീപം ദേശീയപാത നിർമാണം നടക്കുന്നതിനു സമീപത്തെ വീട്ടുമുറ്റത്തേക്ക് കനത്ത മഴയിൽ വെള്ളം കയറിയപ്പോൾ. ദേശീയപാത വികസനത്തിന്റെ ഭാഗമായി ഇവിടെ മണ്ണിട്ട് ഉയർത്തിയാണ് റോഡ് നിർമിച്ചത്. മഴവെള്ളം ഒഴുകി പോകാനുള്ള ക്രമീകരണങ്ങൾ നടത്തിയിട്ടില്ല. ചിത്രം: ഹരിലാൽ • മനോരമ

കോഴിക്കോട് കുറ്റ്യാടി സ്നേഹതീരം അങ്കണവാടി വെള്ളത്തിൽ മുങ്ങിയപ്പോൾ നാട്ടുകാർ സാധനങ്ങൾ മാറ്റുന്നു. ചിത്രം: മനോരമ

കേളമംഗലം നിരപ്പേൽ കരുണന്റെ ഭാഗികമായി തകർന്ന വീട് ഐ.സി. ബാലകൃഷ്ണൻ എംഎൽഎ സന്ദർശിക്കുന്നു.

കുഴിച്ചോലയില്‍ റോഡില്‍ വീണ മരം മുറിച്ചു മാറ്റുന്നു.

കിഴക്കൻ വെള്ളത്തിന്റെ വരവ് ശക്മായതോടെ തലയോലപ്പറമ്പ് പഞ്ചായത്തിൽ
മുട്ടുങ്കൽ ഭാഗത്ത് വെള്ളം കയറിയ നെടുങ്ങേലിൽ ഗോപിയുടെ വീട്. — കിഴക്കൻ വെള്ളത്തിന്റെ വരവ് ശക്മായതോടെ തലയോലപ്പറമ്പ് പഞ്ചായത്തിൽ മുട്ടുങ്കൽ ഭാഗത്ത് വെള്ളം കയറിയ നെടുങ്ങേലിൽ ഗോപിയുടെ വീട്.

ആലപ്പുഴ വീയപുരം അച്ചനാരി പാടശേഖരത്തിൽ വെള്ളം കയറി 285 ഏക്കറിലെ കൃഷി നശിച്ചു. കർഷകർ മണൽ ചാക്ക് നിരത്തി വെള്ളം കയറുന്നത് തടയാൻ ശ്രമിച്ചിരുന്നു. ഹരിപ്പാട് മേഖലയിൽ രണ്ടാം കൃഷിയിറക്കിയ ഏക പാടശേഖരമാണിത്. ചിത്രം: മനോരമ

കടൽക്ഷോഭത്തെ തുടർന്ന് കൊല്ലം ബീച്ചിലെ തീരം തകർന്നപ്പോൾ. ചിത്രം: അരവിന്ദ് ബാല ∙ മനോരമ

വ്യാഴാഴ്ച ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ട് (അതിശക്തമായ മഴ) പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, പാലക്കാട് ജില്ലകളിൽ യെലോ അലർട്ടാണ് (ശക്തമായ മഴ). കോട്ടയം, ഇടുക്കി, ആലപ്പുഴ, പത്തനംതിട്ട, എറണാകുളം, തൃശൂർ, പാലക്കാട്, കോഴിക്കോട്, കണ്ണൂർ, കാസർകോട്, കൊല്ലം ജില്ലകളിൽ പ്രഫഷനൽ കോളജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും അവധിയാണ്. മാഹിയിലെ വിദ്യാഭ്യാസ സ്ഥാപനങ്ങൾക്കും അവധിയുണ്ട്.