ബിജെപിയുടെ രണ്ടാംഘട്ട സ്ഥാനാർഥി പട്ടിക ഈ ആഴ്ച; മഹാരാഷ്ട്രയിൽ പത്തോളം പുതുമുഖങ്ങൾ

ബിജെപിയുടെ മഹാരാഷ്ട്ര കോർ കമ്മിറ്റി കേന്ദ്രനേതൃത്വത്തിനു മുന്നിൽ സമർപ്പിച്ച ഫോർമുല പ്രകാരം ആകെയുള്ള 48 സീറ്റുകളിൽ 32ലും ബിജെപി മത്സരിക്കും. 12 സീറ്റുകൾ ഏകനാഥ് ഷിൻഡെ നേതൃത്വം നൽകുന്ന ശിവസേനയ്ക്കും 4 സീറ്റുകൾ അജിത് പവാറിന്റെ എൻസിപിക്കും നൽകും. മൂന്നാംതവണയും കേന്ദ്രമന്ത്രി നിതിൻ ഗഡ്കരി മഹാരാഷ്ട്രയിലെ നാഗ്പൂരിൽനിന്നു ജനവിധി തേടും. ബിജെപി ദേശീയ സെക്രട്ടറിയും പാർട്ടിയുടെ മുതിർന്ന നേതാവുമായിരുന്ന അന്തരിച്ച ഗോപിനാഥ് മുണ്ടെയുടെ മകൾ പങ്കജ മുണ്ടെയ്ക്ക് സ്ഥാനാർഥിത്വം ലഭിച്ചേക്കും. സംസ്ഥാന ബിജെപി അധ്യക്ഷൻ ചന്ദ്രശേഖർ ബവൻകുലെയെ വാർധ മണ്ഡലത്തിൽനിന്നും മത്സരിപ്പിച്ചേക്കും. മഹാരാഷ്ട്രയിൽ പത്തോളം പുതുമുഖങ്ങളെ അണിനിരത്താനാണ് ബിജെപി നേതൃത്വം നടത്തുന്ന ശ്രമം. 

പൊതുതിരഞ്ഞെടുപ്പിൽ ബിജെപിക്ക് മികച്ച പിന്തുണ നൽകിയാൽ നിയമസഭാ തിരഞ്ഞെടുപ്പിൽ തിരിച്ചും ഗുണമുണ്ടാകുമെന്ന് അമിത് ഷാ ഏകനാഥ് ഷിൻ‌ഡെക്കും അജിത് പവാറിനും സന്ദേശം നൽകിയതായാണു രാഷ്ട്രീയ വൃത്തങ്ങൾ പറയുന്നത്. രണ്ടാംഘട്ട സ്ഥാനാർഥി പട്ടിക പുറത്തിറങ്ങുന്നതോടെ 345 സീറ്റുകളിൽ ബിജെപിക്കു സ്ഥാനാർഥികളാകും. മുഖ്യപ്രതിപക്ഷമായ കോൺഗ്രസ് ഇതുവരെ തങ്ങളുടെ സ്ഥാനാർഥികളെ ഔദ്യോഗികമായി പ്രഖ്യാപിച്ചിട്ടില്ല. ആദ്യഘട്ട സ്ഥാനാർഥി പട്ടിക പുറത്തിറക്കാൻ കോൺഗ്രസിന്റെ തിരഞ്ഞെടുപ്പ് സമിതിയോഗം ഡൽഹിയിൽ ചേരുന്നുണ്ട്.