പാലക്കാട്ട് വി.ടി.ബൽറാം മത്സരിക്കുമോ? ‘രണ്ടിടത്തും വിജയസാധ്യത; ഊഹാപോഹം വേണ്ട, സമയമുണ്ട്’

കോട്ടയം ∙ ലോക്സഭയിലേക്കു ഷാഫി പറമ്പിൽ മത്സരിച്ചു ജയിച്ച ഒഴിവിൽ പാലക്കാട് നിയമസഭാ മണ്ഡലത്തിൽ വരാനിരിക്കുന്ന ഉപതിരഞ്ഞെടുപ്പിൽ കോൺഗ്രസ് നേതാവ് വി.ടി.ബൽറാം മത്സരിക്കുമോ? സ്ഥാനാർഥിയെക്കുറിച്ചുള്ള ചോദ്യങ്ങൾ ഈ ഘട്ടത്തിൽ സാങ്കൽപികം മാത്രമാണെന്നു പറയുന്നു ബൽറാം. ‘‘മത്സരിക്കുമോയെന്ന ചോദ്യം ഉയരുന്നതു മറ്റെല്ലാ ഒരുക്കങ്ങളും പൂർത്തീകരിച്ച്, തിരഞ്ഞെടുപ്പ് പ്രഖ്യാപിക്കുമ്പോഴാണ്. ആ ഘട്ടത്തിൽ കെപിസിസി നേതൃയോഗം ചേരുമ്പോഴേ സ്ഥാനാർഥികളാകുന്ന വ്യക്തികളെക്കുറിച്ചുള്ള ചർച്ചയ്ക്ക് പ്രസക്തിയുള്ളൂ. അതിനു മുൻപ് ചെയ്യേണ്ടതു സംഘടനാപരമായ മുന്നൊരുക്കങ്ങളാണ്’’– വി.ടി.ബൽറാം മനോരമ ഓൺലൈനിനോട് പറഞ്ഞു. 

‘‘കേരളത്തിൽ 3 സ്ഥലങ്ങളിൽ ഉപതിരഞ്ഞെടുപ്പ് നടക്കാനുണ്ട്. വയനാട്ടിലെ സ്ഥാനാർഥിയെക്കുറിച്ച് മാത്രമാണ് പാർട്ടി തീരുമാനമെടുത്തത്. പാലക്കാട്, ചേലക്കര നിയമസഭാ മണ്ഡലങ്ങളെക്കുറിച്ച് തീരുമാനം എടുക്കാനിരിക്കുന്നതേയുള്ളൂ. ഔപചാരിക ചർച്ചകളൊന്നും നടന്നിട്ടില്ല. തിരഞ്ഞെടുപ്പ് ഫലം വന്നശേഷം കെപിസിസിയുടെ ആദ്യയോഗം വ്യാഴാഴ്ച ചേരും. അതിനുശേഷമേ ഏതെങ്കിലും തരത്തിലുള്ള ആലോചനകളിലേക്ക് കടക്കൂ. ഈ രണ്ടു നിയമസഭാ മണ്ഡലങ്ങളിലും കോൺഗ്രസിനു വിജയ സാധ്യതയുണ്ട്.

പാലക്കാട് 5 തിരഞ്ഞെടുപ്പുകളിൽ യുഡിഎഫ് ലീഡ് ചെയ്യുകയാണ്. നിയമസഭയിലേക്ക് ഷാഫി പറമ്പിൽ 3 തവണയും ലോക്സഭയിലേക്ക് വി.കെ. ശ്രീകണ്ഠൻ രണ്ടു തവണയും വിജയിച്ചു. കഴിഞ്ഞ ലോക്സഭാ തിരഞ്ഞെടുപ്പിൽ പാലക്കാട് യുഡിഎഫ് ഒന്നാം സ്ഥാനത്തും ബിജെപി രണ്ടാം സ്ഥാനത്തുമാണ്. ഈ ലോക്സഭാ തിരഞ്ഞെടുപ്പിൽ എണ്ണായിരത്തോളം വോട്ടിന്റെ ലീഡ് പാലക്കാട് നിയമസഭാ മണ്ഡലത്തിൽ യുഡിഎഫിനുണ്ട്. നല്ല ഭൂരിപക്ഷത്തിൽ പാലക്കാട് മണ്ഡലം നിലനിർത്താൻ കഴിയുമെന്നാണ് വിശ്വാസം.

സംഘടനാപരമായ ഒരുക്കങ്ങളാണ് ഈ ഘട്ടത്തിൽ ആലോചിക്കുന്നത്. വോട്ടർ പട്ടികയിൽ ആളെ ചേർത്ത്, ബൂത്ത് കമ്മിറ്റികൾ കൂടുതൽ ശക്തിപ്പെടുത്തണം. തിര‍ഞ്ഞെടുപ്പ് എന്നു വരുമെന്ന് ഇപ്പോൾ പറയാൻ കഴിയില്ല. ഇനിയും 6 മാസത്തെ സമയമുണ്ട്. ചേലക്കര നിയമസഭാ മണ്ഡലത്തിലെ പ്രതിനിധി കെ.രാധാകൃഷ്ണൻ ഇന്നലെയാണ് മന്ത്രിസ്ഥാനം രാജിവച്ചത്. ഈ ഘട്ടത്തിൽ സ്ഥാനാർഥിത്വത്തെക്കുറിച്ചുള്ള  ഊഹാപോഹങ്ങൾ, അഭിപ്രായ പ്രകടനങ്ങൾ എന്നിവ വേണ്ട എന്നാണ് പാർട്ടി കാണുന്നത്’’–വി.ടി.ബൽറാം പറഞ്ഞു.