RIP MT

മടങ്ങി മഹാബലൻ; അക്ഷരസ്മൃതികൾ ബാക്കി, കണ്ണീർപ്രണാമം അർപ്പിച്ച് മലയാളം

കോഴിക്കോട് ∙ വാക്കിന്റെ ചക്രവർത്തിയെ കാലം അതിന്റെ തിരശ്ശീലയാൽ മറച്ചു. എംടിയുടെ ഭൗതികശരീരം ഏറ്റുവാങ്ങിയ അഗ്നി, ആ പ്രതിഭയുടെ സ്പർശമേറ്റെന്നപോലെ തിളങ്ങിയാളി. പല തലമുറകൾക്ക് വായനയെ സമ്മോഹനമായ അനുഭവമാക്കിയ എഴുത്തുകാരന് മലയാളം ആദരവോടെ, വേദനയോടെ യാത്രാമൊഴിയോതി. മാവൂർ റോഡിലെ ശ്മശാനമായ സ്മൃതിപഥത്തിൽ എംടിയുടെ സഹോദരപുത്രൻ ടി. സതീശനാണ് അന്ത്യകർമങ്ങൾ നിർവഹിച്ചത്.

ഡിസംബർ 16ന് പുലർച്ചെയാണ് എംടിയെ ആരോഗ്യസ്ഥിതി മോശമായതിനെത്തുടർന്ന് ആശുപത്രിയിൽ പ്രവേശിപ്പിച്ചത്. അടുത്തിടെയായി എംടിക്ക് ആശുപത്രിവാസം പതിവായിരുന്നു. ഇത്തവണയും കുറച്ചനാൾ കഴിഞ്ഞശേഷം വീണ്ടും വീട്ടിലേക്ക് തിരിച്ചുവരുമെന്ന് എല്ലാവരും കരുതി. വീട്ടിലേക്ക് തിരിച്ചെത്തിയെങ്കിലും 24 മണിക്കൂർ തികയും മുൻപേ വീണ്ടും ഇറങ്ങി. എംടിയുടെ പ്രിയപ്പെട്ട വീടായ സിതാരയിലേക്ക് ഇനിയൊരിക്കലും തിരിച്ചുവരാൻ സാധിക്കാത്തവിധം ആ യാത്ര ചെന്നെത്തി നിന്നത് മാവൂർ റോഡിനു സമീപത്തെ സ്മൃതിപഥം ശ്മശാനത്തിലായിരുന്നു.

കഴിഞ്ഞ വെള്ളിയാഴ്ചയാണ് എംടിയുടെ ആരോഗ്യസ്ഥിതി തീർത്തും വഷളായത്. മരണത്തിന്റെ വക്കോളമെത്തിയ എംടിയെ കാണാൻ സുഹൃത്തുക്കളും രാഷ്ട്രീയ നേതാക്കളും ആശുപത്രിയിലേക്ക് ഓടിയെത്തി. എംടി ഇനി അധികസമയമുണ്ടാകില്ലെന്ന് അവരുടെ വാക്കുകളിൽ വ്യക്തമായിരുന്നു. അസാമാന്യ മനശ്ശക്തിയോടെ പിന്നെയും നാലഞ്ച് ദിവസം കൂടി അദ്ദേഹം ഈ ഭൂമിയിൽ കഴിഞ്ഞു. യന്ത്രസഹായത്തോടെ ജീവൻ പിടിച്ചുവയ്ക്കരുതെന്നും മരണം അനിവാര്യമായ സമയത്ത് സംഭവിക്കട്ടെയെന്നുമായിരുന്നു എംടിയുെട നിലപാട്. ആ സമയം 2024 ഡിസംബർ 25 രാത്രി പത്ത് മണിയായിരുന്നു. ക്രിസ്മസ് ആഘോഷം കഴിഞ്ഞ് മയങ്ങാൻ തുടങ്ങിയവരിലേക്കാണ് എംടിയുെട മരണവാർത്ത എത്തിയത്.

മലയാളമുള്ളിടത്തോളം കാലം ജീവിക്കുന്ന കഥാപാത്രങ്ങളുടെ സ്രഷ്ടാവിന്റെ മരണം സകലരേയും ഞെട്ടിച്ചു. അനിവാര്യമെങ്കിലും ചിലരുടെ മരണം തീർക്കുന്ന ആഘാതം വലുതായിരിക്കും. മലയാള ഭാഷയിൽ ചിന്തിക്കുന്ന എല്ലാവർക്കും വേദനയായി എംടിയുടെ വിയോഗം. രാത്രി പതിനൊന്ന് മണിയോടെ മൃതദേഹം നടക്കാവ് കൊട്ടാരം റോഡിലെ ‘സിതാര’ വീട്ടിലെത്തിച്ചു. രാത്രിയിൽ തന്നെ മന്ത്രിമാരും സുഹൃത്തുക്കളായ എഴുത്തുകാരും വീട്ടിലേക്കെത്തി. മന്ത്രിമാരായ മുഹമ്മദ് റിയാസ്, എ.െക.ശശീന്ദ്രൻ, ഷാഫി പറമ്പിൽ എംപി എന്നിവർ രാത്രി ഏറെ വൈകിയും വീട്ടിൽ തങ്ങി ആവശ്യമായി ക്രമീകരണങ്ങൾ ചെയ്തു. സന്ദർശകരെയും വാഹനങ്ങളെയും നിയന്ത്രിക്കുന്നതിനു രാത്രി തന്നെ പൊലീസ് നടപടികൾ സ്വീകരിച്ചു. 

പുലർച്ചെ 5ന് നടൻ മോഹൻലാൽ എത്തി. ഗുരുതുല്യനായ എംടിയുടെ മൃതദേഹത്തിനു മുന്നിൽ അദ്ദേഹം ശൂന്യമായ മനസ്സുമായി നിന്നു. ‍തുടർന്ന് ഹരിഹരൻ, സിബി മലയിൽ, കമൽ തുടങ്ങിയ സംവിധായകരും സിനിമാ പ്രവർത്തകരും വീട്ടിലേക്കൊഴുകി. മുഖ്യമന്ത്രി പിണറായി വിജയൻ ഉൾപ്പെടെയുള്ള മന്ത്രിമാരും സിപിഎം സംസ്ഥാന സെക്രട്ടറി എം.വി.ഗോവിന്ദൻ ഉൾപ്പെടെ സിപിഎമ്മിലെ മുതിർന്ന നേതാക്കളും പത്തരയോടെ എത്തി. എൽഡിഎഫ് കൺവീനർ ടി.പി.രാമൃകൃഷ്ണൻ ഉൾപ്പെടെയുള്ളവർ സംസ്കാരം പൂർത്തിയായ ശേഷമാണു മടങ്ങിയത്. 

10 മണിയോടെ ആളുകൾ കൂടുതൽ എത്താൽ തുടങ്ങിയപ്പോൾ നീണ്ട വരി രൂപപ്പെട്ടു. കുട്ടികളും യുവാക്കളും പ്രായമായവരും ഉൾപ്പെടെ സമൂഹത്തിലെ നാനാതുറകളിൽ നിന്നുള്ളവരും മഹാനായ എഴുത്തുകാരനെ ഒരുനോക്കു കാണാനെത്തി. മൂന്നേകാലോടെ സന്ദർശകരെ പ്രവേശിപ്പിക്കുന്നതു തടഞ്ഞു. തുടർന്ന് ചടങ്ങുകൾ ആരംഭിച്ചു. മൂന്നേമുക്കാലോടെ വീട്ടിലെ ചടങ്ങുകൾ പൂർത്തിയാക്കി. നാല് മണിയോടെ വയനാട് റോഡ് വഴി മാവൂർ റോഡിലെ ശ്മശാനത്തിലേക്ക്. സ്മൃതിപഥത്തിന്റെ മുറ്റത്തും നൂറുകണക്കിനാളുകൾ തടിച്ചുകൂടി. ഔദ്യോഗിക ബഹുമതികൾ പൂർത്തിയാക്കി സ്മൃതിപഥത്തിൽ അവസാന ചടങ്ങുകൾ.

ഇളയ മകൾ അശ്വതി, മരുമക്കളായ എം.ടി.രാമകൃഷ്ണൻ, എം.ടി.രാജീവ്, ബന്ധുക്കളായ മോഹൻ നായർ, ദീപു മോഹൻ, ടി.സതീശൻ എന്നിവർ അന്ത്യകർമം നിർവഹിച്ചു. ടി.സതീശനാണ് അഗ്നി പകർന്നത്. സി.കെ.സുധാകരൻ കാർമികത്വം വഹിച്ചു. നവീകരിച്ച സ്മൃതിപഥത്തിലെ ഗ്യാസ് ചേംബറിൽ ആദ്യത്തെയാളായി എംടിയുടെ ശരീരത്തെ അഗ്നിയേറ്റു വാങ്ങി. നിളാനദിയെയും കണ്ണാന്തളിപ്പൂക്കളെയും നെഞ്ചേറ്റിയ എംടി എന്ന മലയാള ഭാഷയിലെ യുഗത്തിനു വൈകിട്ട് അഞ്ചരയോടെ നിത്യനിദ്ര.