ബേക്കിങ് സോഡയോ ബേക്കിങ് പൗഡറോ, ഏതാണ് ഉപയോഗിക്കേണ്ടത്? കണ്‍ഫ്യൂഷന്‍ വേണ്ട!

കേക്കും മറ്റു പലഹാരങ്ങളുമെല്ലാം ഉണ്ടാക്കുമ്പോള്‍ ബേക്കിങ് സോഡയാണോ അതോ ബേക്കിങ് പൗഡറാണോ ഉപയോഗിക്കേണ്ടത് എന്ന ആശയക്കുഴപ്പം പലര്‍ക്കും ഉണ്ടായിക്കാണും. കാണാന്‍ ഒരുപോലെയാണെങ്കിലും ഇവ ഉപയോഗിക്കുന്നത് ഒരുപോലെയല്ല. എന്താണ് ഇവ തമ്മിലുള്ള വ്യത്യാസം എന്നും ഇവ എങ്ങനെയൊക്കെയാണ് ഉപയോഗിക്കേണ്ടത് എന്നും മനസ്സിലാക്കാം.

എന്താണ് ഇവ തമ്മിലുള്ള വ്യത്യാസം?

ബേക്കിങ് സോഡയും ബേക്കിങ് പൗഡറും സോഡിയം ബൈകാർബണേറ്റ് എന്ന രാസവസ്തുവിൽ നിന്നാണ് ഉണ്ടാക്കുന്നത്. സോഡിയം ബൈകാർബണേറ്റ് ഒരു ആസിഡുമായി സംയോജിപ്പിക്കുമ്പോൾ, അത് കാർബൺ ഡൈ ഓക്സൈഡ് ഉത്പാദിപ്പിക്കുന്നു.ഇത് കേക്കുകൾ, കുക്കികൾ എന്നിവയെല്ലാം പൊങ്ങിവരാന്‍ സഹായിക്കും. 

ബേക്കിങ് സോഡ എന്നാല്‍ ശുദ്ധമായ സോഡിയം ബൈകാർബണേറ്റ് ആണ്, ഇതില്‍ മറ്റൊരു ചേരുവയുമില്ല. കാർബൺ ഡൈ ഓക്സൈഡ് ഉല്‍പ്പാദിപ്പിക്കുന്നതിനായി ഇത് ഒരു ആസിഡുമായി ചേരണം. ബട്ടർ മിൽക്ക്, തൈര്, നാരങ്ങ നീര്, മൊളാസസ് തുടങ്ങിയ അസിഡിക് ചേരുവകള്‍ക്കൊപ്പം ബേക്കിംഗ് സോഡ ഉപയോഗിക്കുന്നു.

ബേക്കിങ് പൗഡറില്‍ സോഡിയം ബൈകാർബണേറ്റിനൊപ്പം അസിഡിക് ലവണങ്ങളും ടാർടാറിക് ആസിഡ് പോലെയുള്ള ഡ്രൈ ആസിഡുകളും അന്നജത്തിന്‍റെ അംശവും ഉണ്ടാകും. അതില്‍ ആദ്യമേ തന്നെ ആസിഡ് ഉള്ളതിനാല്‍ ഈർപ്പവും ചൂടും മാത്രം ഉണ്ടായാല്‍ മതിയാകും. അസിഡിറ്റി ഉള്ള ചേരുവകൾ ചേർക്കാത്ത വിഭവങ്ങളില്‍ ഇത് സാധാരണയായി ഉപയോഗിക്കുന്നു.

രണ്ടും പരസ്പരം മാറ്റി ഉപയോഗിക്കാമോ?

ബേക്കിങ് സോഡയ്ക്ക് പകരം ബേക്കിങ് പൗഡര്‍ ഉപയോഗിക്കാമോ എന്നാണു സ്ഥിരം കേള്‍ക്കാറുള്ള മറ്റൊരു ചോദ്യം. തീര്‍ച്ചയായും ഉപയോഗിക്കാവുന്നതാണ്.  എന്നാല്‍ അളവില്‍ അല്‍പം വ്യത്യാസം വരുത്തണം. ഉദാഹരണത്തിന് , ബേക്കിങ് സോഡയ്ക്ക് പകരം ബേക്കിങ് പൗഡറാണ് ഉപയോഗിക്കുന്നതെങ്കില്‍ ഒരു ടീസ്പൂണ്‍ ബേക്കിങ് സോഡ ചേര്‍ക്കാന്‍ ആവശ്യപ്പെടുന്നിടത്ത് മൂന്ന് ടീസ്പൂണ്‍ ബേക്കിങ് പൗഡര്‍ ചേര്‍ക്കണം. ബേക്കിങ് പൗഡറിന് പകരം ബേക്കിങ് സോഡയാണ് ഉപയോഗിക്കുന്നതെങ്കില്‍ ബേക്കിങ് സോഡയുടെ അളവ് കുറയ്ക്കണം.

സ്ഥിരമായി കഴിച്ചാല്‍ പണികിട്ടും

ഭക്ഷണത്തിന്‌ രുചിയും മൃദുത്വവുമെല്ലാം നല്‍കുമെങ്കിലും സ്ഥിരമായി ഇവ രണ്ടും കഴിക്കുന്നത് നല്ലതല്ല. ബേക്കിങ് സോഡയും ബേക്കിങ് പൗഡറും പതിവായി കഴിക്കുന്നതിന്‍റെ പാർശ്വഫലങ്ങളിൽ ഒന്നാണ് ദഹനസംബന്ധമായ ബുദ്ധിമുട്ട്. ബേക്കിങ് സോഡ വളരെ ആൽക്കലൈൻ ആണ്, ഇത് ആമാശയത്തിലെ സ്വാഭാവിക പിഎച്ച് ബാലൻസ് തെറ്റാന്‍ ഇടയാക്കുകയും ആസിഡ് റിഫ്ലക്സ്, നെഞ്ചെരിച്ചിൽ, വയറുവേദന തുടങ്ങിയ പ്രശ്നങ്ങൾക്ക് കാരണമാകുകയും ചെയ്യും. ഇത്തരം ആൽക്കലൈൻ പദാർത്ഥങ്ങളുടെ പതിവ് ഉപഭോഗം ദഹനനാളത്തിന്‍റെ അസ്വസ്ഥതകൾക്കും കൂടുതൽ ഗുരുതരമായ അവസ്ഥകൾക്കും കാരണമായേക്കാം.

ബേക്കിങ് സോഡ അമിതമായി കഴിക്കുന്നത് ശരീരത്തിലെ ഇലക്ട്രോലൈറ്റ് അസന്തുലിതാവസ്ഥയ്ക്ക് കാരണമാകും. ബേക്കിങ് സോഡയിൽ സോഡിയം സമ്പുഷ്ടമാണ്, കാലക്രമേണ, ഉയർന്ന അളവിൽ സോഡിയം പതിവായി കഴിക്കുന്നത് ഉയർന്ന രക്തസമ്മർദ്ദത്തിനും ഹൃദയരോഗങ്ങള്‍ക്കും ഇടയാക്കും. രക്തപ്രവാഹത്തിൽ നിന്ന് അധിക സോഡിയം ഫിൽട്ടർ ചെയ്യാൻ പ്രവർത്തിക്കുന്നതിനാൽ അമിതമായ സോഡിയം കഴിക്കുന്നത് വൃക്കകൾക്കും ആയാസമുണ്ടാക്കും.

കൂടാതെ, പേശികളുടെയും നാഡികളുടെയും പ്രവർത്തനത്തിന് നിർണായകമായ പൊട്ടാസ്യം പോലുള്ള മറ്റ് പ്രധാന ഇലക്ട്രോലൈറ്റുകളുടെ സന്തുലിതാവസ്ഥയെ ഇത് തടസ്സപ്പെടുത്തും.കൂടാതെ കാൽസ്യം ആഗിരണം കുറയ്ക്കുന്നതിനും എല്ലുകളെ ദുർബലപ്പെടുത്തുന്നതിനും ഓസ്റ്റിയോപൊറോസിസ് പോലുള്ള അവസ്ഥകളുടെ അപകടസാധ്യത വർദ്ധിപ്പിക്കുന്നതിനും ഇടയാക്കും. ചില ബേക്കിങ് പൗഡറുകളിൽ അസിഡിഫൈയിംഗ് ഏജന്റായി അലുമിനിയം അടിസ്ഥാനമാക്കിയുള്ള സംയുക്തങ്ങൾ അടങ്ങിയിട്ടുണ്ട്. അലൂമിനിയം ഉള്ളില്‍ ചെല്ലുന്നത് അൽഷിമേഴ്സ് പോലുള്ള അവസ്ഥകളിലേക്ക് നയിക്കുമെന്ന് പഠനങ്ങളില്‍ തെളിഞ്ഞിട്ടുണ്ട്.

English Summary: Baking Soda vs. Baking Powder: What's the Difference