കാടമുട്ടയാണോ കോഴിമുട്ടയാണോ നല്ലത്? വ്യത്യാസം ഇതാണ്

വലുപ്പത്തില്‍ ഇത്തിരിക്കുഞ്ഞനാണെങ്കിലും പോഷകഗുണങ്ങളുടെ കാര്യത്തില്‍ വമ്പനാണ് കാടമുട്ട. പ്രോട്ടീനിന്‍റെയും അവശ്യപോഷകങ്ങളുടെയും കലവറയായതിനാല്‍ ആരോഗ്യം സംരക്ഷിക്കാനും ശരീരഭാരം നിയന്ത്രിക്കാനുമെല്ലാം കാടമുട്ട ഉപയോഗിക്കാം. 

നൂറു ഗ്രാം കാടമുട്ടയില്‍ 13 ഗ്രാം പ്രോട്ടീൻ അടങ്ങിയിട്ടുണ്ട്, ഇത് കോഴിമുട്ടയേക്കാൾ (12.6 ഗ്രാം) അല്പം കൂടുതലാണ്. കൂടാതെ, നാഡികളുടെ പ്രവർത്തനത്തിനും ചുവന്ന രക്താണുക്കളുടെ ഉത്പാദനത്തിനും പ്രധാനപ്പെട്ട വിറ്റാമിൻ ബി 12, ആരോഗ്യകരമായ ചർമ്മം, കണ്ണുകൾ, രോഗപ്രതിരോധ പ്രവർത്തനം എന്നിവയ്ക്ക് ആവശ്യമായ വിറ്റാമിൻ എ എന്നിവ കാടമുട്ടയില്‍ ധാരാളമുണ്ട്. കൂടാതെ, ഇരുമ്പ്, ഫോസ്ഫറസ്, സിങ്ക്, സെലീനിയം മുതലായവയും കാടമുട്ടയില്‍ ആവശ്യത്തിനുണ്ട്. കോഴിമുട്ടയില്‍ അടങ്ങിയിട്ടുള്ളതിന്‍റെ ഇരട്ടിയോളം  വിറ്റാമിൻ ബി 12, ഇരുമ്പ് എന്നിവ കാടമുട്ടയില്‍ ഉണ്ട്. 

ആരോഗ്യകരമായ കൊഴുപ്പുകളാൽ സമ്പുഷ്ടമാണ് കാടമുട്ട. മോണോസാച്ചുറേറ്റഡ്, പോളിഅൺസാച്ചുറേറ്റഡ് കൊഴുപ്പുകൾ ഉൾപ്പെടെ ആരോഗ്യകരമായ കൊഴുപ്പുകളുടെ നല്ല ഉറവിടമാണ് ഇത്. ഈ കൊഴുപ്പുകൾ ഹൃദയാരോഗ്യത്തിനും തലച്ചോറിൻ്റെ പ്രവർത്തനത്തിനും ശരീരത്തിലെ വീക്കം കുറയ്ക്കുന്നതിനും സഹായിക്കുന്നു. 9 ഗ്രാം കൊഴുപ്പുള്ള കോഴിമുട്ടകളെ അപേക്ഷിച്ച്, 100 ഗ്രാമിൽ ഏകദേശം 11 ഗ്രാം കൊഴുപ്പ് ഇവയിൽ അടങ്ങിയിട്ടുണ്ട്. 

കാടമുട്ടയിലെ സെലിനിയം പോലുള്ള ആൻ്റിഓക്‌സിഡൻ്റുകൾ ശരീരത്തിലെ ഓക്‌സിഡേറ്റീവ് സ്‌ട്രെസിനെ ചെറുക്കാൻ സഹായിക്കുന്നു. ഈ ആൻ്റിഓക്‌സിഡൻ്റുകൾ കോശങ്ങളെ കേടുപാടുകളിൽ നിന്ന് സംരക്ഷിക്കാനും വീക്കം കുറയ്ക്കാനും ഹൃദ്രോഗവും ക്യാൻസറും ഉൾപ്പെടെയുള്ള വിട്ടുമാറാത്ത രോഗങ്ങളുടെ സാധ്യത കുറയ്ക്കാനും സഹായിക്കും. കൂടാതെ, ഇവ ചർമ്മത്തിൻ്റെ ഘടന മെച്ചപ്പെടുത്തുകയും ചുളിവുകൾ തടയുകയും സൂര്യാഘാതത്തിൽ നിന്ന് സംരക്ഷിക്കുകയും ചെയ്യും.

കാടമുട്ടയിൽ ഓവോമുകോയിഡ് പോലുള്ള അലർജി വിരുദ്ധ പ്രോട്ടീനുകൾ അടങ്ങിയിട്ടുണ്ട്, ഇത് പ്രകൃതിദത്തമായി അലര്‍ജികളെ പ്രതിരോധിക്കുന്നു. അതുകൊണ്ടുതന്നെ കോഴിമുട്ടയോട് അലര്‍ജിയുള്ള ആളുകള്‍ക്ക് വളരെ മികച്ച ഓപ്ഷനാണ് കാടമുട്ട എന്ന് പറയാറുണ്ട്.

കാടമുട്ടയും കോഴിമുട്ടയും തമ്മിലുള്ള പ്രധാന വ്യത്യാസം അവയുടെ കൊളസ്‌ട്രോളിൻ്റെ അളവാണ്. കോഴിമുട്ടയെ അപേക്ഷിച്ച് (100 ഗ്രാമിന് 372 മില്ലിഗ്രാം) കാടമുട്ടയിൽ കൊളസ്ട്രോൾ (100 ഗ്രാമിന് 844 മില്ലിഗ്രാം) കൂടുതലാണ്. അതിനാല്‍ ഉയർന്ന കൊളസ്‌ട്രോൾ ഉണ്ടാകാൻ സാധ്യതയുള്ളവരോ ഹൃദയ സംബന്ധമായ അസുഖങ്ങളുള്ളവരോ ആണെങ്കിൽ, കാടമുട്ട ഭക്ഷണത്തില്‍ ഉള്‍പ്പെടുത്തുന്നതിന് മുന്‍പ് ആരോഗ്യവിദഗ്ധന്‍റെ നിര്‍ദ്ദേശം തേടേണ്ടതാണ്. കൊളസ്‌ട്രോളുമായി ബന്ധപ്പെട്ട ആരോഗ്യപ്രശ്‌നങ്ങളൊന്നും ഇല്ലെങ്കിൽ, സുരക്ഷിതമായി ഒരു ദിവസം 6 മുതൽ 12 വരെ കാടമുട്ടകൾ കഴിക്കാം.

കാടമുട്ട കൊണ്ട് ഫ്രൈ ഉണ്ടാക്കാം

ആവശ്യമുള്ള ചേരുവകൾ

കാടമുട്ട - 10 (പുഴുങ്ങി തൊലികളഞ്ഞത്)

ചെറിയ ഉള്ളി ചെറുതായി അരിഞ്ഞത് - ½ കപ്പ്

കറിവേപ്പില - 1 മുതൽ 2 തണ്ട് വരെ

മഞ്ഞൾ പൊടി - ¼ ടീസ്പൂൺ.

കാശ്മീരി മുളകുപൊടി - ½ ടീസ്പൂൺ.

ഉപ്പ് പാകത്തിന്

വെളിച്ചെണ്ണ - 1 മുതൽ 2 ടീസ്പൂൺ വരെ.

ഉണ്ടാക്കുന്ന രീതി

- കാടമുട്ട തിളപ്പിച്ച് തൊലി കളഞ്ഞ് മാറ്റിവെക്കുക. ഒരു പാനിൽ വെളിച്ചെണ്ണ ചൂടാക്കി ചെറിയ ഉള്ളി ചേർക്കുക. ഇളം ബ്രൗൺ നിറമാകുന്നതുവരെ വഴറ്റുക, മസാലപ്പൊടികളും കറിവേപ്പിലയും ചേർക്കുക.

- ഇതു നന്നായി വഴറ്റിയ ശേഷം കാടമുട്ടയും ചേർത്ത് നന്നായി ഇളക്കുക. മുട്ടയുടെ എല്ലാ ഭാഗത്തും മസാല പിടിക്കണം. ശേഷം, ചോറ്, ചപ്പാത്തി എന്നിവയ്ക്കൊപ്പം വിളമ്പാവുന്നതാണ്.