ക്രിസ്മസ് ആഘോഷത്തിന്റെ ഭാഗമായൊരു ചേന വറുത്ത സാലഡ് പരിചയപ്പെട്ടാലോ? ചേനവൃത്തിയാക്കി കഴുകി കനം കുറച്ച് അരിഞ്ഞ് കഴുകി വാരിയെടുത്ത് വറുത്തെടുക്കണം. ചേന കഴിക്കാൻ മടിയുള്ള വരും ഇഷ്ടപ്പെടുന്നൊരു രുചിയാണിത്. തേങ്ങാപ്പീരയും നാരങ്ങാനീരും മല്ലിയിലയും ചേരുമ്പോൾ വ്യത്യസ്തമായ രുചിക്കൂട്ടാണ്... മറ്റുള്ള ഭക്ഷണത്തിനൊപ്പം ഈ സലാഡും ചേരുമ്പോൾ ഏറെ രുചികരമാണ്.
ചേരുവകൾ
1. ചേന – 1 കഷണം (250ഗ്രാം)
2. തേങ്ങാ പീര – 1 കപ്പ്
3. ഉള്ളി വട്ടത്തിൽ അരിഞ്ഞത് – 3 ടേബിൾ സ്പൂൺ
4. മല്ലിയില – 1/2 കപ്പ്
5. നാരങ്ങ നീര് – 1/2 ടീസ്പൂൺ
6. ഉപ്പ് – ആവശ്യത്തിന്
7. എണ്ണ – 500 മില്ലി
തയാറാക്കുന്ന വിധം
ചേന നല്ലതു പോലെ കനം കുറച്ച് നീളത്തിൽ അരിഞ്ഞ് വറുത്ത് കോരുക. തേങ്ങ പീരയും മല്ലിയില അരിഞ്ഞതും ഉള്ളിയും ഉപ്പും നാരങ്ങ നീരും ചേർത്ത് യോജിപ്പിച്ച് ചേനയുടെ മുകളിൽ നിരത്തി വിളമ്പാം.
