സവാള വഴറ്റാതെ കുറുകിയ ഗ്രേവിയിൽ കിടിലൻ മുട്ടറോസ്റ്റ്

ക്രിസ്മസിന് വിരുന്നുകാർക്ക് ഒരുക്കാം സവാള വഴറ്റാതെ നല്ല കുറുകിയ ഗ്രേവിയിൽകിടിലൻ  മുട്ടറോസ്റ്റ്. അപ്പം, പുട്ട്, പത്തിരി, ഇടിയപ്പം എന്നിവയുടെ കൂടെ ചൂടോടെ വിളമ്പാം.  

ചേരുവകൾ

• മുട്ട -3 എണ്ണം 
• വെള്ളം - മുട്ട വേവിയ്ക്കാൻ 
• സവാള തീരെ കനം കുറച്ചു നീളത്തിൽ അരിഞ്ഞത് – 2 
• പച്ചമുളക് നെടുകെ കീറിയത് - 2  എണ്ണം 
• തക്കാളി – പകുതി ചെറുതായി അരിഞ്ഞത് 
• ഇഞ്ചി വെളുത്തുള്ളി ചതച്ചത്  -ഒരു ടേബിൾസ്പൂൺ 
• കടുക് -കാൽ ടീസ്പൂൺ 
• പെരുംജീരകം -കാൽ ടീസ്പൂൺ 
• മുളകുപൊടി -2 ടീസ്പൂൺ 
• മഞ്ഞൾപ്പൊടി -അര ടീസ്പൂൺ 
• ചിക്കൻ മസാല -2 ടീസ്പൂൺ 
• കുരുമുളകുപൊടി -അര ടീസ്പൂൺ 
• പെരുംജീരകപൊടി -കാൽ ടീസ്പൂൺ 
• ഗരം മസാല പൊടിച്ചെടുത്തത്‌ -അര ടീസ്പൂൺ 
• ഏലയ്ക്കാപ്പൊടി -2 നുള്ള് 
• മല്ലിയില -ഒരു ടേബിൾസ്പൂൺ 
• കറിവേപ്പില -ആവശ്യത്തിന് 
• വെള്ളം 
• ഉപ്പ്‌ 
• വെളിച്ചെണ്ണ 

തയാറാക്കുന്ന വിധം 

• മുട്ട വേവിയ്ക്കുക.
  
• മുട്ട വേവിയ്ക്കാൻ വെള്ളം ചെറിയ തിള വരുമ്പോൾ തന്നെ തീ ഓഫ് ചെയ്ത് അടച്ചുവയ്ക്കുക, പതിനാലു മിനിറ്റിനു ശേഷം മുട്ട തണുത്ത വെള്ളത്തിൽ ഇടുക, ചെറിയചൂടോടെ തന്നെ തോട് അടർത്തി മാറ്റുക. 
• സവാള, പച്ചമുളക്, തക്കാളി ആവശ്യത്തിന് ഉപ്പും നാല് ടേബിൾസ്പൂൺ   വെള്ളവും ഒഴിച്ച് പ്രഷർ കുക്കറിൽ തീ കൂട്ടിവെച്ച് അഞ്ചു വിസിൽ വരുന്നത് വരെ വേവിയ്ക്കുക ,മീഡിയം തീയിൽ മൂന്ന് വിസിൽ വരെ വേവിക്കാം. ആവി പോയതിനു ശേഷം തുറന്നു നോക്കുക. 
• ഒരു പാനിൽ 4 ടേബിൾസ്പൂൺ വെളിച്ചെണ്ണ ഒഴിയ്ക്കുക. 
• എണ്ണ ചൂടാകുമ്പോൾ കടുകും പെരുംജീരകവും ഇട്ടു കൊടുക്കുക. 
• പൊട്ടിവരുമ്പോൾ ഇഞ്ചി വെളുത്തുള്ളി ചതച്ചത് ചേർത്തുകൊടുക്കുക. 
• പച്ചമണം മാറിവരുമ്പോൾ തീ നല്ലപോലെ കുറച്ചുവച്ച്  മുളകുപൊടി, മഞ്ഞൾപ്പൊടി, ചിക്കൻ മസാല എന്നിവ ചേർത്തു കൊടുത്തിളക്കുക. 
• മസാല കരിയാതെ ശ്രദ്ധിക്കണം 
• ഉടൻ തന്നെ വേവിച്ചുവെച്ച സവാള മിശ്രിതം ചേർത്തുകൊടുക്കുക. 
• ഗരംമസാല മല്ലിയില കുരുമുളകുപൊടി പെരുംജീരകപ്പൊടി എന്നിവ ചേർത്തു കൊടുക്കുക. 
• അര കപ്പ് വെള്ളം കൂടെ ഒഴിച്ചു മൂന്ന് മിനിറ്റ് അടച്ചു വച്ച് വേവിയ്ക്കുക. 
• എണ്ണ തെളിഞ്ഞുവരുമ്പോൾ വേവിച്ചുവെച്ച മുട്ട നെടുകെ  കീറി ചേർത്തുകൊടുക്കാം. 
• രണ്ട് നുള്ള് ഏലയ്ക്കാപ്പൊടിയും വെളിച്ചെണ്ണയും കറിവേപ്പിലയും ചേർത്ത് അടച്ചുവച്ച് രണ്ടു മിനിറ്റ് വേവിക്കുക.

ശ്രദ്ധിക്കേണ്ട കാര്യങ്ങൾ 

• വെളിച്ചെണ്ണയിൽ തന്നെ ചെയ്തെടുത്തൽ രുചി കൂടും .
  
• വെളിച്ചെണ്ണ ലഭ്യത കുറവാണെങ്കിൽ അവസാനം കുറച്ച വെളിച്ചെണ്ണ ചേർത്താലും മതി 
  
• മല്ലിയില ഒരുപാടു ഇടാൻ പാടില്ല രുചി മാറും 
  
• മസാലകൾ ചേർക്കുമ്പോൾ തീ കുറച്ചുവയ്ക്കണം, അല്ലെങ്കിൽ മസാല കരിഞ്ഞുപോകും. കറിക്കു ചവർപ്പ് അനുഭവപ്പെടാം. 
  
• ചിക്കൻ മസാലയോ മീറ്റ് മസാലയോ ചേർക്കാം.
  
• വീട്ടിൽ പൊടിച്ച ഗരം മസാല തന്നെ ഉപയോഗിയ്ക്കുക 
  
• മുട്ട ചെറിയ ചൂടോടെ തന്നെ തോട് അടർത്തിമാറ്റാൻ ശ്രദ്ധിക്കുക.