നൂഡിൽസ് മസാല, തക്കാളിയും മുട്ടയും ഈ രീതിയിൽ ചേർക്കാം

എരിവ് പ്രിയർക്ക് കിടിലൻ രുചിയിൽ ഈ നൂഡിൽസ് തയാറാക്കാം, വെജിറ്റേറിയൻസിനു മുട്ട ചേർക്കാതെയും തയാറാക്കാം.

ചേരുവകൾ 

• നൂഡിൽസ് - 250 ഗ്രാം
• തക്കാളിക്ക - ഒന്ന് 
• ചെറിയ സവാള നീളത്തിൽ കനം കുറച്ച് അരിഞ്ഞത് 
• കാബേജ് നീളത്തിൽ അരിഞ്ഞത് - 100 ഗ്രാം 
• കാരറ്റ് നീളത്തിൽ അരിഞ്ഞത് - 40 ഗ്രാം 
• കാപ്‌സിക്കം ഉണ്ടെങ്കിൽ ചെറിയ കഷ്ണം നിർബന്ധമില്ല 
• പച്ചമുളക് - 3
• മുട്ട - രണ്ടു തൊട്ടു നാലെണ്ണം വരെ എടുക്കാം 
• എരിവില്ലാത്ത മുളകുപൊടി - ഒരു ടീസ്പൂൺ 
• ചാട്ട് മസാല - അര ടീസ്പൂൺ
• ഗരം മസാല - ഒരു ടീസ്പൂൺ  
• കുരുമുളകുപൊടി - അര ടീസ്പൂൺ 
• സോയ സോസ് - അര ടേബിൾസ്പൂൺ 
• ഗ്രീൻ ചില്ലി സോസ് - ഒരു ടേബിൾസ്പൂൺ 
• ടൊമാറ്റോ കെച്ചപ്പ് - ഒരു ടീസ്പൂൺ 
• വിനാഗിരി - ഒരു ടേബിൾസ്പൂൺ 
• മല്ലിയില 
• ഉപ്പ് – ആവശ്യത്തിന് 
• സൺഫ്ലവർ ഓയിൽ - 4 ടേബിൾസ്പൂൺ 
• ഓയിൽ – ആവശ്യത്തിന് (ഒലിവ് ഓയിൽ/ വെജിറ്റബിൾ ഓയിൽ / ക്യാനോല)

തയാറാക്കുന്ന വിധം 

• ഒരു പാത്രത്തിൽ തിളയ്ക്കുന്ന വെള്ളത്തിൽ ഒരു വലിയ തക്കാളി ചേർത്ത്  രണ്ടു മിനിറ്റ് തിളപ്പിക്കുക. 
• തക്കാളി പകുതി വേവ് ആകുമ്പോൾ എടുത്തു മാറ്റി ഫോർക് കൊണ്ടോ സ്പൂൺ കൊണ്ടോ ഉടച്ചു എടുക്കണം, അരയ്ക്കരുത്. 
• വീതി കൂടിയ ഒരു പാനിൽ നൂഡിൽസ് വേവിക്കാൻ ആവശ്യമായ  വെള്ളവും ഉപ്പും  തിളപ്പിക്കുക.
• വെള്ളം തിളച്ചു വരുമ്പോൾ ഉടച്ചു വച്ച തക്കാളിയും  നൂഡിൽസും ചേർത്ത് 8  മിനിറ്റ് വരെ വേവിക്കാം. 
• ഇടയ്ക്കു ഇളക്കികൊടുത്താൽ നൂഡിൽസ് ഒട്ടിപ്പിടിക്കാത്ത കിട്ടും. ശേഷം നൂഡിൽസിന്റെ വെള്ളം ഊറ്റിക്കളയുക.
• ഒരു പാനിൽ ഒരു ടീസ്പൂൺ എണ്ണ ചേർത്ത് കൊടുത്ത്‌ വേവിച്ച  നൂഡിൽസ് എണ്ണയിൽ ഒരു മിനിറ്റ് ഇളക്കിക്കൊടുക്കുക. ഇങ്ങനെ വഴറ്റുമ്പോൾ എണ്ണ നൂഡിൽസിൽ ഒരേപോലെ നിൽക്കുകയും തന്മൂലം നൂഡിൽസ് മണിക്കൂറുകളോളം  ഒട്ടിപ്പിടിക്കാത്ത ഇരിയ്ക്കുകയും ചെയ്യുന്നു.
  
• ഒരു  ചീനചട്ടി  അടുപ്പിൽ വച്ച് ചൂടായി വരുമ്പോൾ മൂന്ന് ടേബിൾസ്പൂൺ എണ്ണ ചേർത്ത് കൊടുക്കുക. 
  
• രണ്ടോ മൂന്നോ മുട്ടയും ഉപ്പും ചേർത്ത് ഇളക്കി ചൂടായ എണ്ണയിൽ ഒഴിച്ച് കൊടുക്കുക. 
• തീ കൂട്ടി വച്ച് മുട്ടയുടെ മറുവശം ബ്രൗൺ ആകുന്നതു ‌ വരെ ഫ്രൈ ചെയ്യുക.
• കളർ മാറി വരുമ്പോൾ മുട്ട ചിക്കിയെടുക്കണം. അരിഞ്ഞെടുത്ത  കാബേജ്  മുട്ടയുമായി ചേർത്തിളക്കുക. 
• തീ കൂട്ടിവച്ചു രണ്ടു മിനിറ്റ്   കാബേജ് പാകം ചെയ്യാം. 
• സവാള, കാപ്‌സിക്കം,  കാരറ്റ്, പച്ചമുളക് എന്നിവ ചേർത്ത് തീ കൂട്ടി ഇളക്കുക.
• വെജിറ്റബിൾസ് ഒരുപാടു സോഫ്റ്റ് ആയിപ്പോകരുത്.
• നൂഡിൽസ് ചേർത്ത് കൊടുക്കുക, മുകളിൽ പറഞ്ഞ മസാലകളും സോസുകളും വിനാഗിരിയും ചേർത്ത് തീ കൂട്ടി യോജിപ്പിക്കുക. 
• യോജിച്ചു വന്നതിനു ശേഷം മല്ലിയില, ഒരു ടേബിൾസ്പൂൺ നാരങ്ങാ നീര്, കുറച്ചു സവാള എന്നിവ ചേർത്ത് ഇളക്കിയെടുക്കാം. 
• ചൂടോടെ കഴിക്കുക, നാരങ്ങാ നീരും സവാളയും ചേർത്ത് കഴിക്കണം.