വ്യത്യസ്‌തമായ ഒരു കുക്കർ സാമ്പാർ, വെറുതെ കോരി കുടിക്കാൻ തോന്നും

വെറുതെ കോരി കുടിക്കാൻ തോന്നും ഈ സാമ്പാർ ഒരു തവണ ഇതുപോലെ ഉണ്ടാക്കിനോക്കൂ. വറുത്തു അരച്ച സാമ്പാർ, സാമ്പാർ പൊടി ചേർക്കാതെ തേങ്ങ വറുത്ത് അരച്ച് പ്രഷർ കുക്കറിൽ തയാറാക്കാം. പാലക്കാട് സ്റ്റൈലിൽ കഷ്ണങ്ങൾ ഒട്ടും ഉടയാതെ ഉണ്ടാക്കാം.

പാലക്കാടൻ മത്തൻ സാമ്പാർ

വേണ്ട ചേരുവകൾ  :

• പരിപ്പ് – അര കപ്പ് (ചെറുത്)
• മത്തങ്ങ – ചെറിയ കഷണം 
• സവാള – 1
• തക്കാളി – 1
• ഉരുളക്കിഴങ്ങ് - 1
• മല്ലിയില 
• ഉപ്പ് 

  വറുത്തരയ്ക്കാൻ 

• ഉലുവ- ഒന്നേ കാൽ സ്പൂൺ 
• കായപ്പൊടി- മുക്കാൽ സ്പൂൺ  
• തേങ്ങ - 2 കൈപ്പിടി 
• മല്ലിപൊടി- 3 സ്പൂൺ (ചെറുത്)
• മുളകുപൊടി- 1സ്പൂൺ എരിവിന് അനുസരിച്ചു 
• മഞ്ഞൾപ്പൊടി - കാൽ സ്പൂൺ  
• കറിവേപ്പില 

വറുത്തിടാൻ 

• ഉലുവ - കാൽ സ്പൂണിൽ താഴെ 
  
• വെളിച്ചെണ്ണ- 1-2സ്പൂൺ 
• കടുക് -  1 സ്പൂൺ
• മുളക് - 2-3
• കറിവേപ്പില 
• പുളി- നാരങ്ങാ വലുപ്പം

തയാറാക്കുന്ന വിധം 

• പരിപ്പ്  കുക്കറിൽ ഇട്ടു ഒന്നര കപ്പ് വെള്ളം ഒഴിച്ച് 3 വിസിൽ വരെ വേവിക്കുക.
• ശേഷം കഷ്ണങ്ങൾ കഴുകി മുറിച്ച് ചേർത്ത് വേവിക്കുക. ഒരു വിസിൽ കഴിയുമ്പോൾ ഓഫാക്കി പ്രഷർ എടുത്തു മാറ്റുക(കഷ്ണം ഉടയാതെ കിട്ടും )
• വെന്തുകഴിയുമ്പോൾ പുളി പിഴിഞ്ഞ് ഒഴിച്ച് തിളപ്പിക്കുക, മല്ലിയില കൂടെ ചേർത്ത് തിളപ്പിക്കുക  
• ഒരു പാനിൽ എണ്ണ ഒഴിച്ച് ഉലുവ ചേർത്ത് ബ്രൗൺ നിറമാവുമ്പോൾ കായപ്പൊടി ചേർത്ത്  തേങ്ങ കറിവേപ്പില 8-10 കൊത്തു ചേർത്ത് നന്നായി വറക്കുക. പിന്നെ മല്ലിപ്പൊടി മുളകുപൊടി മഞ്ഞൾപ്പൊടി  എന്നിവ ചേർത്ത് നന്നായി വറക്കുക.
• ചൂട് കുറഞ്ഞശേഷം  അരച്ച് ഒഴിച്ച് നന്നായി തിളപ്പിക്കുക. 
• ഒരു ഫ്രൈയിങ് പാനിൽ വീണ്ടും എണ്ണ ഒഴിച്ച് കടുക് പൊട്ടിച്ച്  മുളകും ഉലുവയും ചേർത്ത് ബ്രൗൺ നിറമാവുമ്പോൾ കറിവേപ്പില ചേർക്കുക. തിളപ്പിച്ച സാമ്പാറിലേക്ക് ഒഴിക്കുക. സാമ്പാർ റെഡി.

English Summary : Pressure Cooker Sambar