ഏത് മീനും ഈ മസാലക്കൂട്ടില്‍ പൊരിച്ചെടുത്താല്‍ സൂപ്പര്‍

ആരേയും കൊതിപ്പിക്കുന്ന എരിപൊരി രുചിയിൽ ചെമ്മീൻ പൊരിച്ചെടുക്കാന്‍ ഈ ഒരു മസാലക്കൂട്ട് പരീക്ഷിച്ചുനോക്കൂ. ഏതു മീനും പൊരിക്കാൻ ഈ രുചിക്കൂട്ട് ഉപയോഗിക്കാം.

ചേരുവകൾ :

•  ചെമ്മീന്‍ - 1/2 കിലോഗ്രാം
•  ചുവന്നുള്ളി - 5-6 എണ്ണം
•  ഇഞ്ചി - 2 ഇഞ്ച് വലിപ്പത്തില്‍
•  വെളുത്തുള്ളി - 2 (വലുത്)
•  തക്കാളി - 1 (ചെറുത്)
•  കറിവേപ്പില - 2 തണ്ട്
•  കാശ്മീരി മുളകുപൊടി - 3 ടീസ്പൂൺ
•  മഞ്ഞൾപ്പൊടി - 1/4 ടീസ്പൂൺ
•  ഉപ്പ് - ആവശ്യത്തിന്
•  വെളിച്ചെണ്ണ - 3-4 ടേബിള്‍സ്പൂണ്‍

തയാറാക്കുന്ന വിധം

•  ചെമ്മീന്‍ വൃത്തിയാക്കി നന്നായി കഴുകിയെടുക്കുക.

•  ചുവന്നുള്ളിയും ഇഞ്ചിയും വെളുത്തുള്ളിയും തക്കാളിയും കറിവേപ്പിലയും മിക്സിയുടെ ജാറിൽ ഒട്ടും വെള്ളം ചേര്‍ക്കാതെ അരച്ചെടുക്കുക. ഇതിലേക്ക് കാശ്മീരി മുളകുപൊടിയും മഞ്ഞൾപ്പൊടിയും ആവശ്യത്തിന്‌ ഉപ്പും ചേർത്തു നന്നായി ഇളക്കി ചേര്‍ക്കുക.

•  ഇനി കഴുകിയെടുത്ത ചെമ്മീന്‍ ഒട്ടും വെള്ളമില്ലാതെ ഈ മസാലക്കൂട്ടിലേക്ക് ചേര്‍ത്ത് നന്നായി ഇളക്കി യോജിപ്പിക്കുക.

•  1/2 മണിക്കൂറെങ്കിലും മസാല പിടിക്കാനായി മാറ്റിവയ്ക്കുക. (ഒരു രാത്രി മുഴുവന്‍ ഫ്രിജിൽ വച്ചാല്‍ വളരെ നല്ലതാണ്‌).

• ശേഷം വെളിച്ചെണ്ണയില്‍ പൊരിച്ചെടുക്കാം. പൊരിക്കുമ്പോള്‍ കുറച്ച് കറിവേപ്പില കൂടി ചേര്‍ക്കുക മണവും രുചിയും കൂടും.

English Summary : Chemmeen fry Malayalam recipe.