തനി നാടൻ കള്ളപ്പം, ഈസ്റ്റർ ദിനത്തിലെ പ്രഭാത ഭക്ഷണം

ഈസ്റ്റർ ദിനത്തിൽ പ്രഭാതഭക്ഷണമായി തയാറാക്കുന്ന ഒരു  തനി നാടൻ പലഹാരമാണ് കള്ളപ്പം. പേരുപോലെ തന്നെ കള്ള് ചർത്താണ് ഇത് തയാറാക്കുന്നത്. കള്ള് ഇല്ലെങ്കിലും അതേ രുചിയിൽ കള്ളപ്പം തയാറാക്കി എടുക്കാം.

ചേരുവകൾ

• പച്ചരി - രണ്ട് കപ്പ്
• ചോറ് - അര കപ്പ്
• തേങ്ങ ചിരകിയത് - ഒരു കപ്പ്
• കരിക്കിൻ വെള്ളം / വെള്ളം - ആവശ്യത്തിന്
• പഞ്ചസാര - 3 ടേബിൾ സ്പൂൺ
• ചുവന്നുള്ളി - 4 അല്ലി
• ജീരകം - അര ടീസ്പൂൺ
• ഏലയ്ക്ക - 2
• ഉപ്പ് - മുക്കാൽ ടീസ്പൂൺ
• യീസ്റ്റ് - കാൽ ടീസ്പൂൺ

തയാറാക്കുന്ന വിധം

• പച്ചരി നന്നായി കഴുകി മൂന്ന് മണിക്കൂർ കുതിർത്തു വയ്ക്കുക.
• നന്നായി കുതിർന്ന അരിയിലേക്ക് ആവശ്യത്തിനു വെള്ളം ഒഴിച്ച് നല്ല മയത്തിൽ അരച്ചെടുക്കുക. (വെള്ളത്തിന് പകരം തേങ്ങാ വെള്ളം ചേർത്താൽ രുചി കൂടും).
• ഇത് ഒരു വലിയ പാത്രത്തിലേക്ക് മാറ്റുക.
• തേങ്ങ ചിരകിയത്,  ചോറ്, ഏലയ്ക്ക, ജീരകം, ഉപ്പ്, പഞ്ചസാര, യീസ്റ്റ് ഇവ ഒന്നിച്ചാക്കി ആവശ്യത്തിന് വെള്ളം ചേർത്ത് അരച്ചെടുക്കുക.
• അരി മാവും തേങ്ങ അരച്ചതും കൂടി നന്നായി യോജിപ്പിക്കുക.
• ഈ മാവ് എട്ടു മുതൽ പത്തു മണിക്കൂർ വരെ പുളിച്ചു പൊങ്ങാൻ വയ്ക്കുക.
• ഒരു ദോശക്കല്ല് ചൂടാക്കി ചെറിയ അപ്പം ചുട്ടെടുക്കാം.
• ഈ അപ്പം അടച്ചുവച്ച് വേവിക്കരുത്. ചൂടായ കല്ലിലേക്ക് ചെറിയ ഒരു തവി മാവ് ഒഴിച്ച് കുമിളകൾ വന്ന് തുടങ്ങുമ്പോൾ മറിച്ചിടാം. ഇളം ബ്രൗൺ നിറമാകുമ്പോൾ മാറ്റാം.

English Summary : Kallappam which can be prepared with or without adding local toddy.