പപ്പടം പോലെ പൊടിയുന്ന അടിപൊളി അച്ചപ്പം ഉണ്ടാക്കാം

നാലുമണി ചായയ്ക്കൊപ്പം നല്ല കറുമുറാ കടിച്ചു തിന്നാന്‍ രസികന്‍ സ്നാക്കാണ് അച്ചപ്പം. ഇത് വീട്ടില്‍ തന്നെ ഉണ്ടാക്കിയെടുക്കാം. 

അച്ചപ്പം ഉണ്ടാക്കുന്ന വിധം

*ഒരു മിക്സിയുടെ ജാറിലേക്ക് രണ്ടു മുട്ട പൊട്ടിച്ച് ഒഴിക്കുക ഇതിലേക്ക് അര കപ്പ്‌ പൊടിച്ച പഞ്ചസാര ചേര്‍ക്കുക. എന്നിട്ട് നന്നായി അടിച്ചെടുക്കുക.

*ഒരു പാത്രം എടുത്ത് രണ്ടു കപ്പ്‌ അരിപ്പൊടി അളന്ന് ഇടുക. ഇടിയപ്പമൊക്കെ ഉണ്ടാക്കാന്‍ ഉപയോഗിക്കുന്ന നൈസ് അരിപ്പൊടി വേണം ഉപയോഗിക്കാന്‍.

*ഇതിലേക്ക് കാല്‍ സ്പൂണ്‍ ഉപ്പിട്ട് നന്നായി മിക്സ് ചെയ്തെടുക്കുക. ശേഷം നേരത്തെ അടിച്ചുവെച്ച മുട്ട-പഞ്ചസാര മിക്സ് ഇതിലേക്ക് ഇട്ടു നന്നായി കുഴച്ചെടുക്കുക.

*ഒരു മുഴുവന്‍ തേങ്ങയുടെ പാല്‍ പിഴിഞ്ഞെടുക്കുക. ഇതില്‍ നിന്നും കുറേശ്ശെ കുറേശ്ശേയായി മാവിലേക്ക് ചേര്‍ത്ത് മിക്സ് ചെയ്തെടുക്കുക. ഈ മാവ് ദോശമാവിനേക്കാള്‍ കുറച്ചു കൂടി ലൂസായിരിക്കണം.

*ഇനി ഇതിലേക്ക് ഒരു സ്പൂണ്‍ എള്ള് ചേര്‍ക്കുക. 

*ഇനി അച്ചപ്പത്തിന്‍റെ അച്ച് എടുത്ത് നേരിട്ട് അച്ചപ്പം ഉണ്ടാക്കാന്‍ തുടങ്ങാവുന്നതാണ്. ഈ അച്ച് ആദ്യം തന്നെ അല്‍പ്പനേരം ചെറുചൂടുള്ള പുളിവെള്ളത്തില്‍ ഇട്ടുവെച്ച ശേഷം തുടച്ച് എണ്ണ പുരട്ടി മയപ്പെടുത്തിയെടുത്താല്‍ അച്ചപ്പം ഒട്ടിപ്പിടിക്കാതെയിരിക്കും 

*ഇനി ഒരു പാത്രത്തില്‍ എണ്ണ ചൂടാക്കി അതില്‍ അച്ച് മുക്കിയെടുക്കുക. ഇനി ഈ അച്ച് മാവില്‍ മുക്കിയെടുക്കുക. ഇത് തിളച്ച എണ്ണയില്‍ കുറച്ചു നേരം വെച്ച് മെല്ലെ തട്ടിക്കൊടുത്താല്‍ മതി. ഇങ്ങനെ ചെയ്യുമ്പോള്‍ അച്ചിന്‍റെ താഴ്ഭാഗം പാത്രത്തിന്‍റെ അടിവശത്ത് മുട്ടാതിരിക്കാന്‍ പ്രത്യേകം ശ്രദ്ധിക്കുക. 

*ഇടയ്ക്ക് ഈ അച്ചപ്പം മറിച്ചിട്ട്‌ കൊടുക്കണം. മീഡിയം തീയില്‍ വേണം ഇത് വേവിക്കാന്‍. അധികം നിറം മാറുന്നതിന് മുന്‍പേ കോരിയെടുക്കാം.

English Summary: Easy Achappam Recipe