കല്ലുമ്മക്കായ കൊണ്ട് തയാറാക്കുന്ന സവിശേഷമായെരു വിഭവമാണ് അരിക്കടുക്ക.
അരിക്കടുക്ക
1 കല്ലുമ്മക്കായ – 20
2 പൊന്നി അരി – ഒരു കപ്പ്
3 തേങ്ങ ചുരണ്ടിയത് – ഒരു മുറി
ചുവന്നുള്ളി – രണ്ട്, അരിഞ്ഞത്
പെരുംജീരകപ്പൊടി – അര ചെറിയ സ്പൂൺ
നല്ല ജീരകപ്പൊടി – അര ചെറിയ സ്പൂൺ
കറുവാപ്പട്ടയും ഗ്രാമ്പുവും പൊടിച്ചത്– ഓരോ നുള്ളു വീതം
ഏലയ്ക്കാപ്പൊടി – ഒരു നുള്ള്
ഉപ്പ് – പാകത്തിന്
4 മൈദ – ഒരു വലിയ സ്പൂൺ
മുളകു പൊടി – ഒരു വലിയ സ്പൂൺ
ഉപ്പ് – പാകത്തിന്
5 എണ്ണ– വറുക്കാൻ ആവശ്യത്തിന്
പാകം ചെയ്യുന്നവിധം
∙കല്ലുമ്മക്കായ പുറംതോടു വൃത്തിയാക്കി, കത്തി കൊണ്ടു പിളർക്കുക. അധികം മലർന്നു പോകരുത്. അഴുക്കു കളഞ്ഞു വൃത്തിയാക്കുക.
∙പൊന്നി അരി മൂന്നു നാലു മണിക്കൂർ ചൂടുവെള്ളത്തിൽ കുതിർത്തു വയ്ക്കണം.
∙അരി കഴുകി ഊറ്റിയശേഷം മൂന്നാമത്തെ ചേരുവ ചേർത്ത് യോജിപ്പിച്ചു കട്ടിയായി അരച്ചെടുക്കുക.
∙ഈ മാവ് കുറേശ്ശെയായി എടുത്ത് കല്ലുമ്മക്കായുടെ ഉള്ളിലാക്കി ഭംഗിയായി നിറയ്ക്കുക.
∙ഇങ്ങനെ എല്ലാം നിറച്ച ശേഷം ആവി വരുന്ന അപ്പച്ചെമ്പിന്റെ തട്ടിൽ വച്ച് ആവിയിൽ വേവിക്കുക. കല്ലുമ്മക്കായുടെ തോടു ചുവന്നാൽ വെന്തെന്നു മനസ്സിലാക്കാം.
∙അടുപ്പിൽ നിന്നു വാങ്ങി ചൂടാറിയശേഷം തോട് അടർത്തി യെടുക്കുക.
∙നാലാമത്തെ ചേരുവ യോജിപ്പിച്ചു കട്ടിയായി കലക്കുക. വേവിച്ച കല്ലുമ്മക്കായ ഇതിൽ മുക്കി ചൂടായ എണ്ണയിൽ വറുത്തു കോരുക.
പാചക കുറിപ്പുകൾക്കു കടപ്പാട്:
ബുഷി ശംസു, ദാരി മുസ്തഫ, സുഹാന യൂനസ്
