വളരെ എളുപ്പത്തിൽ തയാറാക്കാവുന്നൊരു ക്ലാസിക് പീറ്റ്സയാണിത്. ഇറ്റാലിയൻ പീറ്റ്സ ചരിത്രത്തിൽ ഏറെ പ്രസിദ്ധമാണ് മാർഗരിറ്റ പീറ്റ്സ. റെഡ് ടുമാറ്റോ, വൈറ്റ് മൊസെറല്ല ചീസ്, ഗ്രീൻ ബേസിൽ ലീവ്സ് നിറങ്ങൾ നിറഞ്ഞ പീറ്റ്സ. കറുമുറെ കൊറിയ്ക്കാവുന്നതും എളുപ്പത്തിൽ തയാറാക്കുകയും ചെയ്യാം.
ചേരുവകൾ
മൈദ – 2 1/2 കപ്പ്
യീസ്റ്റ് – 1 ടേബിൾ സ്പൂൺ
ചെറു ചൂടുവെള്ളം – 1 കപ്പ്
ഉപ്പ് – 1 ടീസ്പൂൺ
പഞ്ചസാര – 1 ടീസ്പൂൺ
ഒലിവ് ഓയിൽ – 2 ടേബിൾസ്പൂൺ
പിസാ ടോപിങ്
പിസാ സോസ് – 2 കപ്പ്
പർമീസൻ ചീസ് – 1 കപ്പ്
മൊസെറല്ല ചീസ് – 1 കപ്പ്
Click here to read this in English
പാകം ചെയ്യുന്ന വിധം
∙ഒരു പാത്രത്തിൽ അരിച്ചെടുത്ത മൈദയും ഉപ്പും പഞ്ചസാരയും യീസ്റ്റും ചെറുചൂടുവെള്ളത്തിൽ നന്നായി യോജിപ്പിച്ചെടുക്കുക. ഒലിവ് ഓയിലും ഇതിലേക്ക് ചേർത്തു കൊടുക്കാം. ചപ്പാത്തി മാവ് തയാറാക്കുന്നതിനെക്കാൾ എളുപ്പത്തിൽ ഇത് തയാറാക്കാം. ഈ മാവിനു മുകളിൽ അൽപം ഒലിവ് ഓയിൽ പുരട്ടി നന്നായി മൂടി 25 മിനിറ്റ് വയ്ക്കണം. മാവ് പുളിച്ചു പൊങ്ങി വരും.
∙കൈയിൽ അൽപം ഒലിവ് ഓയിൽ പുരട്ടി തയാറാക്കി വച്ചിരിക്കുന്ന മാവ് പതിയെ ബേക്കിങ് ഷീറ്റിൽ കൈ കൊണ്ട് പരത്തി എടുക്കാം.
∙മുകളിലായി പാർമീസൻ ചീസും മൊസറല്ല ചീസും അതിനു മുകളിലായി പിസാ സോസും വിതറി, പ്രീ ഹീറ്റ് ചെയ്തിരിക്കുന്ന അവ്നിൽ 200 ഡിഗ്രിയിൽ 20–25 മിനിറ്റ് ബേക്ക് ചെയ്യാം. ബേസിൽ ലീവ്സ് ഉപയോഗിച്ച് അലങ്കരിക്കാം.