കന്യാകുമാരി മുതൽ കശ്മീർ വരെയും പിന്നെ കടലുകൾ കടന്നും അലയടിക്കുന്ന കാവാലയാ.. കാവാലയാ.. എന്ന ഹിറ്റ് ഗാനത്തിന്റെ മ്യൂസിക് മാസ്റ്റർ. മ്യൂസിക് പ്രൊഡ്യൂസർ, ഗായകൻ, ദക്ഷിണേന്ത്യൻ താരസുന്ദരിമാരുടെ ബോയ്ഫ്രണ്ട് ലിസ്റ്റിലെ ഹോട്ട് ആൻഡ് കൂൾ ചുള്ളൻ... ഇതിനൊപ്പം ചേർത്തുവയ്ക്കാൻ അനിരുദ്ധിന് ഇനി ‘ഇന്ത്യാസ് മോസ്റ്റ് വാണ്ടഡ് മ്യുസിഷൻ’ എന്ന വിശേഷണവും കാത്തിരിക്കുന്ന നാളുകളാണ് മുന്നിൽ. അതുക്കും മേലെ അനിരുദ്ധ് നെഞ്ചോടു ചേർക്കുന്നൊരു മേൽവിലാസമുണ്ട്; അതു മറ്റൊന്നുമല്ല, സൂപ്പർ സ്റ്റാർ രജനീകാന്തിന്റെ ബന്ധു എന്നതായിരിക്കും. രജനീകാന്തിന്റെ ഭാര്യ ലതയുടെ സഹോദര പുത്രനാണ് അനിരുദ്ധ്.

‘കാവാലയാ...’ എന്ന ഗാനത്തിനൊപ്പം താരസുന്ദരി തമന്ന ഭാട്ടിയ ചെയ്ത ഹോട്ട് നമ്പർ ഡാൻസ് ലോകമെമ്പാടുമുള്ള സംഗീതാരാധകരുടെ സിരകളെ ചൂടുപിടിപ്പിച്ചതിനു പിന്നിൽ അനിരുദ്ധിന്റെ മ്യൂസിക് മാജിക് തന്നെ. സൂപ്പർ സ്റ്റാർ രജനീകാന്തിന്റെ സ്റ്റൈലൻ തിരിച്ചുവരവായി ദക്ഷിണേന്ത്യ കൊണ്ടാടിയ ‘ജയിലർ’ സിനിമയുടെ റെക്കോർഡ് വിജയത്തിന്റെ ക്രെഡിറ്റ് ചിത്രത്തിനു ‘ടൈഗർ കാ ഹുക്കും’ സംഗീതമൊരുക്കിയ അനിരുദ്ധിന്റേതുകൂടിയാണ്. അക്ഷരാർഥത്തിൽ തിയറ്ററുകൾ ഇളക്കിമറിക്കുകയായിരുന്നു അനിരുദ്ധിന്റെ ആ അഡാർ ബിജിഎം.

വെറുതെയല്ല ഇന്ത്യയിലെ തന്നെ ഏറ്റവും ഉയർന്ന പ്രതിഫലം പറ്റുന്ന സംഗീത സംവിധായകനായി അനിരുദ്ധ് മാറിയതും. അനിരുദ്ധിന്റെ പയ്യൻസ് എൻട്രി വിറളിപിടിപ്പിക്കുന്നത് എ.ആർ.റഹ്മാൻ ആരാധകരെയാണ്. സാക്ഷാൽ ഇളയരാജയെപ്പോലും വെല്ലുവിളിക്കാൻ പാകത്തിൽ ഒന്നിനുപിറകേ ഒന്നൊന്നായി ഹിറ്റ് നമ്പറുകളുടെ പെരുമ്പറ മുഴക്കിയ എ. ആർ. റഹ്മാന് അല്ലെങ്കിലും അടുത്തിടെയായി സിനിമാലോകത്ത് അത്ര നല്ല സമയമല്ല.

തന്റെ എക്കാലത്തെയും ഹിറ്റുകളിലൊന്നായ ‘ഇന്ത്യൻ’ സിനിമയുടെ രണ്ടാം ഭാഗത്തിൽ നിന്നുപോലും ഒഴിവാക്കപ്പെട്ട നിലയിലാണു റഹ്മാൻ. ‘ടെലിഫോൺ മണി പോൽ സിരിപ്പവളും’ ‘പച്ചൈ കിളികൾ തോളോടും’ എല്ലാം ഒരുക്കിയ റഹ്മാൻ രണ്ടാം ‘ഇന്ത്യനി’ൽ നിന്നു വഴിമാറുമ്പോൾ തെളിയുന്നതും അനിരുദ്ധിന്റെ പേരും സമയവുമാണ്. ഇന്ത്യൻ–2 സംബന്ധിച്ച ആലോചനകൾ വന്നപ്പോൾ കമൽഹാസന്റെ ചോയ്സ് ആയി വന്നതു റഹ്മാന്റെ പേരായിരുന്നുവെന്നും പക്ഷേ, സംവിധായകൻ ഷങ്കർ താൽപര്യപ്പെട്ടതു അനിരുദ്ധിനെയാണെന്നുമാണു ടോളിവുഡിൽ നിന്നുള്ള പിന്നാമ്പുറ കഥകൾ.

എന്തായാലും പയ്യൻസ് 10 കോടി വാങ്ങാൻ തുടങ്ങിയതോടെ റഹ്മാനും പ്രതിഫലം 8 കോടിയിൽനിന്ന് 10 കോടിയായി ഉയർത്തിയെന്നാണ് കേൾക്കുന്നത്.

∙ തലവര മാറ്റിയത് കൊലവെറി; നമ്പർ വൺ വൈറൽ ഹിറ്റ് 

രജനീകാന്തിന്റെ ഭാര്യ ലതാ രജനീകാന്തിന്റെ സഹോദര പുത്രനായ അനിരുദ്ധിന് സിനിമാസംഗീതലോകത്തേക്ക് കിട്ടിയത് അത്ര ഗ്രാൻഡ് എൻട്രിയൊന്നുമായിരുന്നില്ല. വളരെ അടുത്ത ബന്ധുവായിരുന്നിട്ടും അനിരുദ്ധിനു വേണ്ടി രജനികാന്ത് വക്കാലത്തു പറഞ്ഞിട്ടുമില്ല. പ്രതിഭയുണ്ടെങ്കിൽ ആരും തള്ളിമറിക്കേണ്ട കാര്യമില്ലെന്ന ലൈനായിരുന്നു രജനീകാന്തിന്, സ്വന്തം ജീവിതത്തിലും മറ്റുള്ളവരുടെ കാര്യത്തിലും.

രജനികാന്തിന്റെ ‌മകൾ ഐശ്വര്യ സംവിധാനം ചെയ്ത ‘3’ എന്ന തമിഴ് സിനിമയ്‌ക്കുവേണ്ടി നടൻ ധനുഷ് തന്നെ എഴുതി, പാടിയ ‘വൈ ദിസ് കൊലവെറി കൊലവെറി ഡീ...’ എന്ന പാട്ടിലൂടെയാണ് അനിരുദ്ധിന്റെ സംഗീതം നാം ആദ്യം കേൾക്കുന്നത്. ‘‘ഒരു പാട്ടു വേണം. പ്രണയം തകർന്നു തരിപ്പണമായ യുവാവ് സങ്കടം സഹിക്കാതെ പാടുന്നതാണു കഥാസന്ദർഭം. നായകന് അല്ലറ ചില്ലറ ഇംഗ്ലിഷേ അറിയൂ. അതുവച്ച് അഡ്‌ജസ്‌റ്റ് ചെയ്‌തു വേണം പാടാൻ’’, അനിരുദ്ധിനോട് ഇത്രയുമേ സംവിധായിക ഐശ്വര്യ പറഞ്ഞുള്ളൂ. 

പക്ഷേ, മിനിറ്റുകൾക്കുള്ളിൽ ട്യൂൺ റെഡി. നായിക ശ്രുതി ഹാസനും ധനുഷിനും ഐശ്വര്യയ്‌ക്കും ട്രാക്ക് കേൾപ്പിച്ചു. ട്രാക്ക് കേട്ടതും ധനുഷ് ഒകെ പറഞ്ഞു. സംഗതി കൊള്ളാമല്ലോ എന്ന് ഐശ്വര്യയ്ക്കും തോന്നി. അതോടെ ധനുഷ് ആ ഈണത്തിനൊത്തു വരികളെഴുതിയുണ്ടാക്കി. പാട്ടു കഴിഞ്ഞതും സ്‌റ്റുഡിയോയിലിരുന്നവരെല്ലാം കയ്യടിച്ചു. താന്‍‌ പറഞ്ഞ സന്ദർഭത്തിന് ഇതുപോലെ ചേർന്ന മറ്റൊരു പാട്ടില്ലെന്ന് ഐശ്വര്യയും. ആദ്യ കേൾവിയിൽ ‘അയ്യേ ഇത് എന്തോന്നു പാട്ട്’ എന്നു ചില പരമ്പരാഗത ചിന്താഗതിക്കാർക്കു തോന്നിയെങ്കിലും യൂത്തന്മാർ പാട്ട് ഏറ്റെടുത്തു. സോണി ഔദ്യോഗികമായിത്തന്നെ കൊലവെറി യൂട്യൂബിൽ അപ്‌ലോഡ് ചെയ്‌തു.

ട്യൂണിനനുസരിച്ചു വരികളെഴുതി തയാറാക്കിയ ആ പാട്ട് 24 മണിക്കൂറിനുള്ളിൽ യൂട്യൂബിൽ നേടിയത് ഒരു ലക്ഷത്തിനടുത്തു ഹിറ്റ്. 12 വർഷമാകുമ്പോൾ യുട്യൂബിലെ ഔദ്യോഗിക ചാനലിൽ മാത്രം പാട്ട് കേട്ടത് 42 കോടി പേർ. 2011 ൽ ലോകമാകെ ഏറ്റവും വൈറൽ ഹിറ്റായ ഗാനമായി കൊലവെറി മാറി. ‘കൊലവെറി’ക്കു പിന്നാലെ തുടർച്ചയായി ‌ഹിറ്റോടു ഹിറ്റുകൾ! ഹിറ്റുകളുടെ പെരുമഴ! പയ്യൻസിന്റെ പാട്ടുഗ്രാഫ് പിന്നെ പിടിച്ചാൽ കിട്ടാത്തത്ര ഉയരത്തിലെത്തി. അനിരുദ്ധ് സംഗീതത്തിന്റെ പുതിയ ബ്രാൻഡായി! 

∙ ബിഎംഡബ്ല്യു വേണോ പോർഷെ വേണോ? 

കൊലവെറി ഭാഗ്യത്തിനു ക്ലിക്കായതാണെന്നും കസിനായതുെകാണ്ട് ഐശ്വര്യ പാട്ടുകൊടുത്തതാണെന്നും കുന്നായ്മ പറഞ്ഞവരുടെ മുന്നിലേക്കു തുടർന്നും പിറന്നു വീണത് ഹിറ്റ് ഗാനങ്ങൾ. 2012 ൽ ഡേവിഡ്, എതിർനീച്ചൽ, 2013 ൽ വണക്കം ചെന്നൈ, ഇരണ്ടം ഉലകം, 2014 ൽ കത്തി, കാക്കി സട്ടൈ, മാരി തുടങ്ങിയ ചിത്രങ്ങൾക്കു സംഗീതമൊരുക്കി. തുടർന്ന് നാനും റൗഡിതാൻ, വിവേകം, റെമോ, വേതാളം എന്നീ ചിത്രങ്ങളിലെ സംഗീതവും ശ്രദ്ധിക്കപ്പെട്ടു. അറബിക്, തമിഴ് മിക്സ് മ്യൂസിക്കിൽ ഒരുക്കിയ ബീസ്റ്റിലെ ‘അറബിക് കുത്ത്’ ഗാനം റിലീസ് ചെയ്ത് മണിക്കൂറുകൾക്കകം ഒന്നരക്കോടിയിലേറെപ്പേരാണ് കണ്ടത്.

തെന്നിന്ത്യയിൽ ഏറ്റവും വേഗത്തിൽ 100 ദശലക്ഷം കാഴ്ചക്കാരെ നേടിയ ഗാനം എന്ന റെക്കോർഡും ഇതിനായിരുന്നു. അതിനു മുൻപ് ആ റെക്കോർഡ് സായ് പല്ലവിയും ധനുഷും ചുവടുവച്ച ‘റൗഡി ബേബി’ എന്ന ഗാനത്തിനായിരുന്നു. മാസ്റ്ററിലെ ‘വാത്തി’ ഗാനവും അനിരുദ്ധിന്റെ ഹിറ്റുകളിലൊന്നായി. കമൽഹാസൻ നായകനായ വിക്രമിന്റെ ബിജിഎം ആണ് അനിരുദ്ധിന്റെ തലവര വീണ്ടും മാറ്റിയത്. ഇതിൽ ഓരോ കഥാപാത്രത്തിനുമനുസരിച്ച് വ്യത്യസ്തമായ സംഗീതമാണ് അനിരുദ്ധ് ഒരുക്കിയത്. 

ജയിലറിലെ ‘കാവാലയാ’ എന്ന ഗാനം അനിരുദ്ധിനെ വേറെ ലെവലിലെത്തിച്ചു എന്നു പറയാം. രജനീകാന്തിന്റെ തന്നെ പേട്ട, ദർബാർ എന്നീ ചിത്രങ്ങൾക്കും അനിരുദ്ധ് നേരത്തേ സംഗീതം നൽകിയിട്ടുണ്ട്. ജവാനിലൂടെ  ബോളിവുഡിലേക്കു ഗ്രാൻഡ് എൻട്രി നടത്തിയ അനിരുദ്ധിന് ഇതിനകം ഒട്ടേറെ ഓഫറുകൾ ലഭിച്ചെന്ന വാർത്തകളും പുറത്തുവരുന്നുണ്ട്.

ജയിലർ സിനിമയുടെ റെക്കോർഡ് വിജയത്തിൽ സന്തോഷം പങ്കുവയ്ക്കാൻ നിർമാതാവ് കലാനിധി മാരൻ കഴിഞ്ഞദിവസം അനിരുദ്ധിന് ഒരു ബ്രാൻഡ് ന്യൂ പോർഷെ എസ്‌യുവി കാർ സമ്മാനിച്ചിരുന്നു. ബിഎംഡബ്ല്യു വേണോ പോർഷെ വേണോ എന്ന് അനിരുദ്ധിനോട് അഭിപ്രായം ചോദിച്ചിട്ടാണത്രേ കലാനിധി മാരൻ സമ്മാനം തിരഞ്ഞെടുത്തത്. അല്ലെങ്കിലും അനിരുദ്ധ് പണ്ടേ ഒരു വാഹനപ്രേമിയാണ്. വിദേശയാത്രകളിൽ ലംബോർഗിനി, ഫെറാറി കാറുകളോടാണ് കൂടുതൽ പ്രിയം. 

∙ മരണമാസ് ബിജിഎം; ഫാൻസിന് ‘രോമാഞ്ചിഫിക്കേഷൻ’ 

സ്‌കൂളിൽ പഠിക്കുമ്പോൾ എ.ആർ.റഹ്‌മാനിൽനിന്ന് ‘ബെസ്‌റ്റ് ഇൻസ്‌ട്രുമെന്റലിസ്‌റ്റി’നുള്ള സമ്മാനം വാങ്ങിയിട്ടുണ്ട് അനിരുദ്ധ്. ലയോള കോളജിൽ ബികോം പഠിച്ചിരുന്ന കാലത്ത് ഐശ്വര്യയുടെ പത്തിലേറെ ഷോർട്ട് ഫിലിമുകൾക്ക് സംഗീതം ചെയ്‌തുകൊണ്ടായിരുന്നു അനിരുദ്ധിന്റെ തുടക്കം. സംഗീതജീവിതം രക്ഷപെട്ടില്ലെങ്കിൽ ഒരു ‘ബായ്ക്ക്അപ്’ എന്നാണ് ഇതിനെക്കുറിച്ച് അനിരുദ്ധ് പിന്നീട് പറഞ്ഞിട്ടുള്ളത്. പക്ഷേ, തന്റെ ആദ്യത്തെ സിനിമ വന്നപ്പോൾ അനിരുദ്ധിന് ഐശ്വര്യയുടെ വിളി എത്തി. ലണ്ടൻ ട്രിനിറ്റി മ്യൂസിക് കോളജിൽനിന്നു വെസ്‌റ്റേൺ ക്ലാസിക്കൽ പിയാനോ പഠിച്ചിട്ടുണ്ട് അനിരുദ്ധ്. കർണാടക സംഗീതം പഠിച്ചു, ചെന്നൈയിൽനിന്നു സൗണ്ട് എൻജിനീയറിങ്ങും പൂർത്തിയാക്കി; ഒരു കർണാടിക് ഫ്യൂഷൻ ടീമിൽ അംഗവുമായി.

റഹ്‌മാൻ ‘കൊലവെറി’ കേട്ട് ഇഷ്‌ടപ്പെട്ടതായി പറഞ്ഞപ്പോഴും സാക്ഷാൽ അമിതാഭ് ബച്ചൻ വരെ ‘കൊള്ളാം കൊലവെറി’യെന്ന് ട്വീറ്റ് ചെയ്തപ്പോഴും സ്വർഗം കിട്ടിയ സന്തോഷമായിരുന്നു അന്നു പയ്യൻസിന്. ആ കക്ഷിയാണ് ഇപ്പോൾ അതുക്കും മേലെ റഹ്മാനെയും കടത്തിവെട്ടി ‘ജവാൻ’ എന്ന പുതിയ ഷാറുഖ് ചിത്രത്തിലൂടെ ബോളിവുഡിൽ വരെ കാലുറപ്പിക്കുന്നത്. ലക്ഷക്കണക്കിന് ആരാധകരുള്ള അനിരുദ്ധ് ആരുടെ ആരാധകനാണെന്നു ചോദിച്ചാൽ നല്ല ഒന്നാന്തരം എ.ആർ.റഹ്മാൻ ഫാനാണെന്നു മറുപടി കിട്ടും. കുട്ടിക്കാലം മുതൽ സംഗീതമെന്നാൽ അനിരുദ്ധിന് റഹ്മാനാണ്.