മിസ് യൂണിവേഴ്സ് പട്ടം നേടുമോ എറിക റോബിൻ? ‘നാടിന്റെ സൗന്ദര്യം ലോകം കാണട്ടെ, ആര്‍ക്കാണ് പേടി?’; വെല്ലുവിളിക്കുന്ന കറാച്ചിക്കാരി

∙ വ്യാപക വിമർശനം, അന്വേഷണത്തിന് പ്രധാനമന്ത്രി

മിസ് യൂണിവേഴ്സ് മത്സരത്തിൽ പാക്കിസ്ഥാനിൽ നിന്നൊരാൾ മത്സരിക്കുന്നതിനെ രാജ്യാന്തര സമൂഹം അഭിനന്ദിക്കുമ്പോൾ സ്വന്തം രാജ്യത്ത് വ്യാപക വിമർശനവും എറിക്ക നേരിടുന്നുണ്ട്. എറിക ചെയ്തത് ലജ്ജാകരമെന്നാണ് പലരും സമൂഹമാധ്യമങ്ങളിൽ വിശേഷിപ്പിച്ചത്. പരിപാടി സംഘടിപ്പിച്ചവർക്കെതിരെ നടപടിയെടുക്കണമെന്നും എറികയെ പാക്കിസ്ഥാൻ പ്രതിനിധിയായി മത്സരത്തിൽ പങ്കെടുപ്പിക്കാൻ അനുവദിക്കരുതെന്നും നിരവധി പേർ ആവശ്യപ്പെടുന്നുണ്ട്. ‘മിസ് യൂണിവേഴ്സ് പാക്കിസ്ഥാൻ’ മത്സരം സംഘടിപ്പിച്ചത് ആരാണെന്നും അതിൽ പാക്കിസ്ഥാന്റെ പേര് ഉപയോഗിച്ചത് എന്തിനാണെന്നും അന്വേഷിക്കാൻ പാക്കിസ്ഥാൻ കാവൽ പ്രധാനമന്ത്രി അൻവർ ഉൽ ഹഖ് കാക്കർ ഇന്റലിജൻസ് ബ്യൂറോയ്ക്കു നിർദേശം നൽകിയതായാണു പാക്ക് മാധ്യമങ്ങൾ റിപ്പോർട്ട് ചെയ്യുന്നത്. ഇത്തരത്തിലുള്ള സൗന്ദര്യമത്സങ്ങൾ സംഘടിപ്പിക്കുന്നത് പാക്കിസ്ഥാനു നാണക്കേടുണ്ടാക്കുന്നതും പാക്ക് വനിതകളെ ചൂഷണം ചെയ്യുന്നതുമാണെന്നാണു കാക്കറിന്റെ നിലപാട്.

∙ മത്സരത്തിൽ പങ്കെടുക്കാൻ ആരാണ് അനുവദിച്ചത്? അവകാശമുണ്ടെന്ന് കമ്പനി

മിസ് യൂണിവേഴ്സ് പാക്കിസ്ഥാന്‍ മത്സരത്തിൽ പങ്കെടുത്ത 5 പെൺകുട്ടികളെ ആരാണ് അതിന് അനുവദിച്ചതെന്നും സർക്കാരിന്റെ അനുമതിയില്ലാതെ പങ്കെടുക്കാൻ ആർക്കും പറ്റില്ലെന്നുമാണ് പാക്കിസ്ഥാനിലെ വലതുപക്ഷ കോളമിസ്റ്റായ അൻ‌‌‌‌‌‌‌സാർ അബാസി സാമൂഹിക മാധ്യമത്തിൽ കുറിച്ചത്. മിസ് യൂണിവേഴ്സ് മത്സരത്തിൽ പങ്കെടുക്കാൻ പാക്കിസ്ഥാൻ ആരെയും നിർദേശിച്ചിട്ടില്ലെന്നും അനുമതി ഇല്ലാതെ ആർക്കും രാജ്യത്തെ പ്രതിനിധീകരിക്കാൻ സാധിക്കില്ലെന്നും പാക്കിസ്ഥാൻ വാർത്താ വിതരണ മന്ത്രി മുർതാസ സൊളാംഗി സമൂഹമാധ്യമമായ എക്സിൽ (മുൻപു ട്വിറ്റർ) കുറിച്ചു.

എന്നാൽ മിസ് യൂണിവേഴ്സ് പാക്കിസ്ഥാൻ മത്സരം സംഘടിപ്പിച്ച ദുബായ് ആസ്ഥാനമായുള്ള കമ്പനി യൂജെൻ ഗ്രൂപ്പ് പറയുന്നത് ഇത് നടത്താനുള്ള അവകാശം കഴിഞ്ഞ മാർച്ചിൽ തന്നെ തങ്ങൾക്ക് ലഭിച്ചിരുന്നു എന്നാണ്. നൂറുകണക്കിന് അപേക്ഷകളാണ് തുടർന്ന് പാക്കിസ്ഥാനിൽ നിന്ന് ലഭിച്ചത്. ഇതിൽ നിന്ന് അഞ്ചു പേരായിരുന്നു അവസാന റൗണ്ടിൽ‌ കടന്നത്. പാക്കിസ്ഥാനി മോഡലും സൈബർ സെക്യൂരിറ്റി എൻജിനീയറുമായ ജെസിക്ക വിൽസൺ, 19കാരിയായ മാലിക ആൽവി, 26കാരിയായ സബ്രിന വാസിം, പ്രോപ്പർട്ടി കൺസൾട്ടന്റ് ഹിരാ ഇനാം തുടങ്ങിയവരെ പരാജയപ്പെടുത്തിയാണ് എറിക റോബിന്‍ മിസ് യൂണിവേഴ്സ് പാക്കിസ്ഥാൻ പട്ടം അണിഞ്ഞത്. 

പാക്കിസ്ഥാനു പുറമെ മിസ് യൂണിവേഴ്സ് ബഹ്‌റൈൻ, മിസ് യൂണിവേഴ്സ് ഈജിപ്ത് നടത്തിപ്പും യൂജെൻ ഗ്രൂപ്പിനാണ്. പാക്ക് വനിതകൾ സൗന്ദര്യമത്സരത്തിൽ പങ്കെടുക്കാറുണ്ടെങ്കിലും ഇവരിൽ ഭൂരിഭാഗം പേരും പുറംരാജ്യങ്ങളിലാണ് ജീവിക്കുന്നത്. 

∙ ചരിത്രം സൃഷ്ടിച്ച വനിതാ നേതാക്കൾ, പിന്തുണയുമായി ഒട്ടേറെ പേർ

 ‘മിസ്റ്റർ പാക്കിസ്ഥാൻ’ പോലുള്ള മത്സരങ്ങളെ ആളുകൾ അംഗീകരിക്കുമ്പോൾ തന്നെ സ്ത്രീകളുടെ നേട്ടങ്ങളോട് കാണിക്കുന്ന എതിർപ്പ് കടുത്ത അസമത്വമാണെന്നാണ് പാക്കിസ്ഥാനി മോഡലും എറിക റോബിന് മോഡലിങ് രംഗത്ത് തുടരാൻ പ്രേരണയുമായ പാക്കിസ്ഥാനി മോഡൽ വനീസ അഹമ്മദ് പ്രതികരിച്ചത്.  കറാച്ചി സ്വദേശിയായ ഒരാൾ വിഷയത്തിൽ ബിബിസിയോട് നടത്തിയ പ്രതികരണം ‘പാക്കിസ്ഥാൻ ആഴത്തിൽ വേരൂന്നിയ പുരുഷാധിപത്യ മൂല്യങ്ങളുള്ള ഒരു സ്വേച്ഛാധിപത്യ രാഷ്ട്രമായി തുടരുന്നു’ എന്നാണ്. 1952 മുതൽ മിസ് യൂണിവേഴ്സ് മത്സരം നടക്കുന്നു. എന്നാൽ ഇതുവരെ പാക്കിസ്ഥാനിൽ നിന്നു ഒരാൾ പോലും അതിൽ പങ്കെടുത്തിട്ടില്ല. പാക്കിസ്ഥാനിൽ, സൗന്ദര്യമത്സരങ്ങളിൽ പങ്കെടുക്കുന്നതിനു നിയമപരമായ നിയന്ത്രണമില്ലെങ്കിലും മത്സരത്തിലെ വസ്ത്രധാരണരീതി മതവിശ്വാസങ്ങൾക്ക് വിരുദ്ധമാണെന്നാണ് ഒരു വിഭാഗം കരുതുന്നത്.