അന്നൊരു സിനിമ കിട്ടാൻ അലഞ്ഞു, ഇന്ന് പ്രതിഫലം കോടികൾ; കിയാര, ഇന്ത്യയുടെ ‘ഗൂഗിൾ നമ്പർ 1’

2014 ജൂണ്‍ 13ന് ഒരു വെള്ളിയാഴ്ചയാണ് ഫഗ്‌ളി റിലീസ് ചെയ്തത്. അതൊരു ഭയപ്പെടുത്തുന്ന വെള്ളിയാഴ്ചയായി മാറുന്ന കാഴ്ചയാണ് പിന്നീടു കണ്ടതെന്ന് കിയാര പറയുന്നു. ആരും ആ സിനിമയിലെ നായികയെ തേടി പിന്നീട് വന്നില്ല. അതോടെ വീട്ടിൽ അടച്ചുപൂട്ടി ഇരിപ്പായി. ഇങ്ങനെയിരുന്നാൽ ആരും സിനിമ കൊണ്ടു വരില്ലെന്ന അമ്മയുടെ ഉപദേശത്തിനു മുന്നിൽ തിരിച്ചറിവുണ്ടായി വീണ്ടും ഓഡിഷനുകൾക്കു പോയിത്തുടങ്ങി.

∙ ഒടുവിൽ വിജയം ‘സാക്ഷി’

2016 സെപ്റ്റംബർ 30. അതും ഒരു വെള്ളിയാഴ്ചയായിരുന്നു. ക്രിക്കറ്റ് താരം മഹേന്ദ്ര സിങ് ധോണിയുടെ ജീവിത കഥ പറഞ്ഞെത്തിയ ‘എം.എസ്.ധോണി: ദി അൺടോൾഡ് സ്റ്റോറി’യിൽ ധോണിയുടെ ഭാര്യയുടെ വേഷത്തിലെത്തിയ സാക്ഷി എന്ന പെൺകുട്ടിയെ എല്ലാവരും ശ്രദ്ധിച്ചു. ഇവരെ എവിടെയോ കണ്ടിട്ടുണ്ടല്ലോ! അത് കിയാരയായിരുന്നു. സാക്ഷി റാവത്ത് എന്ന ആ കഥാപാത്രം കിയാരയ്ക്ക് ബോളിവുഡിൽ നൽകിയ സ്വീകാര്യത ചെറുതൊന്നുമായിരുന്നില്ല. ധോണിയുടെ യഥാർഥ ഭാര്യയായ സാക്ഷി പോലും ഗംഭീരമെന്നു പറഞ്ഞ പ്രകടനമായിരുന്നു ചിത്രത്തിൽ കിയാരയുടേത്. ഇന്നും പലരും കരുതുന്നത് കിയാരയുടെ ആദ്യ ചിത്രം ധോണിയാണെന്നാണ്.

എന്നാൽ ധോണിയുടെ വിജയം 2017ലിറങ്ങിയ ‘മെഷീൻ’ എന്ന ത്രില്ലർ ബോളിവുഡ് ചിത്രത്തിൽ ആവർത്തിക്കാൻ കിയാരയ്ക്കു സാധിച്ചില്ല. പിന്നീട് 2018ൽ തെലുങ്കിലൊരു കൈനോക്കി. മഹേഷ് ബാബുവിനൊപ്പം അഭിനയിച്ച ‘ഭരത് അനേ നേനു’ സൂപ്പർ ഹിറ്റ്. അതിനു പിന്നാലെയാണ് നെറ്റ്ഫ്ലിക്സിൽ നാലു ഹ്രസ്വചിത്രങ്ങൾ കോർത്തിണക്കിയ ആന്തോളജി ചിത്രം ‘ലസ്റ്റ് സ്റ്റോറീസി’ൽ കരൺ ജോഹർ സംവിധാനം ചെയ്ത ചിത്രത്തിൽ കിയാരയെത്തുന്നത്. ബോളിവുഡിന്റെ ‘ബോൾഡ് ആൻഡ് ബ്യൂട്ടിഫുൾ ഗേൾ’ പദവിയിലേക്ക് കിയാര എത്തുന്നത് ആ ചിത്രത്തിലൂടെയാണെന്നു പറയാം. 

ദാമ്പത്യജീവിതത്തിൽ തൃപ്തയല്ലാത്ത ഒരു പെൺകുട്ടിയുടെ ജീവിതം ഒട്ടും സങ്കോചമില്ലാതെ സ്ക്രീനിലെത്തിച്ച മേഘ എന്ന കഥാപാത്രം കയ്യടികളേറെ നേടി. പിന്നീട് സിനിമകൾക്കു വേണ്ടി കാത്തിരിക്കേണ്ടി വന്നിട്ടില്ല കിയാരയ്ക്ക്. 2019ൽ തെലുങ്കിൽ വിനയ വിധേയ രാമ, ഹിന്ദിയിൽ കളങ്ക്, കബീർ സിങ്, ഗുഡ് ന്യൂസ് എന്നീ ചിത്രങ്ങൾ. തെലുങ്കു ചിത്രമായ അർജുൻ റെഡ്ഡിയുടെ റീമേക്കായ ‘കബീർ സിങ്ങി’ലെ പ്രീതി എന്ന കഥാപാത്രം വീണ്ടും കിയാരയെ പ്രേക്ഷകരുടെ പ്രിയപ്പെട്ട താരമാക്കി. 2020ൽ ഗിൽറ്റി, ലക്ഷ്മി, ഇന്ദു കി ജവാനി എന്നീ ചിത്രങ്ങൾ. 

∙ ഷേർഷായുടെ ഡിംപിൾ

2021ലാണ് കിയാരയുടെ ജീവിതംതന്നെ മാറ്റി മറിച്ച ‘ഷേർഷാ’ എന്ന ചിത്രത്തിന്റെ വരവ്. കാർഗിൽ യുദ്ധ വീരൻ വിക്രം ബത്രയുടെ കഥ പറഞ്ഞ ചിത്രത്തിൽ നായകൻ സിദ്ധാർഥ് മൽഹോത്രയായിരുന്നു; ബോളിവുഡിലെ സ്വപ്ന സുന്ദരൻ. നായിക ഡിംപിളായി കിയാരയും. ആ സിനിമയിറങ്ങുന്നതിനും മുൻപേതന്നെ സിദ്ധാർഥ്– കിയാര പ്രണയത്തെപ്പറ്റിയുള്ള കഥകൾ ബോളിവുഡിലെ ഗോസിപ്പ് കോളങ്ങളിൽ നിറഞ്ഞിരുന്നു. 2018ൽ ലസ്റ്റ് സ്റ്റോറീസ് സിനിമയുമായി ബന്ധപ്പെട്ടു നടന്ന ഒരു പാർട്ടിയിലായിരുന്നു ആദ്യമായി സിദ്ധാർഥും കിയാരയും കണ്ടുമുട്ടുന്നത്. ആദ്യകാഴ്ചയിൽത്തന്നെ പ്രണയത്തിലാകുന്ന അദ്ഭുതമാണ് അന്നു സംഭവിച്ചതെന്നാണ് പിന്നീട് സിദ്ധാർഥും കിയാരയും ഇതിനെപ്പറ്റി പറഞ്ഞത്. ആ ബന്ധം ശക്തമായതാകട്ടെ ‘ഷേർഷാ’യിൽ വച്ചും. 

അപ്പോഴും ഇരുവരും ബന്ധത്തിൽ രഹസ്യാത്മകത സൂക്ഷിച്ചു പോന്നു. പക്ഷേ ഒരിക്കൽ, കരൺ ജോഹറിന്റെ അഭിമുഖ പരിപാടിക്കിടെ സിദ്ധാർഥിനു നേരെ വന്ന ഒരു ചോദ്യം ഇങ്ങനെ: ‘ബോളിവുഡിൽ ഒരു നടി വിവാഹം കഴിക്കല്ലേ എന്ന് ആഗ്രഹിച്ചിട്ടുണ്ടെങ്കിൽ അത് ആരായിരിക്കും’ എന്നായിരുന്നു ചോദ്യം. ആലിയ ഭട്ട്, കത്രീന കൈഫ് എന്നിങ്ങനെ ചില ഓപ്ഷനുകളും നൽകി. എന്നാൽ ആ ഓപ്ഷനുകളിലൊന്നുമില്ലാത്ത ഒരു പേരാണ് സിദ്ധാർഥ് നൽകിയത്. ‘‘കിയാര ഇപ്പോഴും വിവാഹിതയാകാതെയിരിക്കുന്നതിൽ എനിക്ക് സന്തോഷമുണ്ട്’ എന്നായിരുന്നു അത്. ബോളിവുഡിലെ അടുത്ത താര വിവാഹത്തിന്റെ കൃത്യമായ സൂചനയായിരുന്നു അതോടെ ലഭിച്ചത്. 

പക്ഷേ കിയാര പിന്നെയും തിരക്കുകളിലേക്കു പോയി. 2022ൽ ഭൂൽ ഭുലയ്യ 2, ജഗ്ജഗ് ജീയോ, ഗോവിന്ദ നാം മേര എന്നീ ചിത്രങ്ങൾ. 2023ൽ ഇതുവരെയിറങ്ങിയത് ഒരൊറ്റച്ചിത്രം മാത്രം– സത്യപ്രേം കി കഥ. എന്നിട്ടും എങ്ങനെ കിയാരയുടെ പേര് സേർച്ചുകളിൽ ഒന്നാമതായി? അതിന്റെ ഉത്തരം 2023 ഫെബ്രുവരി ഏഴിന് നടന്ന ഒരു വിവാഹമായിരുന്നു. സിദ്ധാർഥ് മൽഹോത്രയും കിയാരയും തമ്മിലുള്ള വിവാഹം രാജസ്ഥാനിലെ ജയ്സാൽമീറിലെ സൂര്യഗഢ് പാലസിൽ ആർഭാടമായി നടന്നത് അന്നായിരുന്നു. ആ വിവാഹത്തിന്റെ ഫോട്ടോ പോലും റെക്കോർഡിട്ടു. അതുതന്നെയായിരുന്നു കിയാരയുടെയും സിദ്ധാർഥിന്റെയും ജനപ്രീതിക്കുള്ള തെളിവ്. ഇന്ത്യയിൽ ഏറ്റവുമധികം പേർ ലൈക്ക് ചെയ്ത ഇൻസ്റ്റഗ്രാം പോസ്റ്റായിരുന്നു അത്. 2023 ഡിസംബർ വരെയുള്ള കണക്കെടുത്താൽ 1.64 കോടി പേർ! കത്രീന കൈഫിന്റെയും ആലിയ ഭട്ടിന്റെയും വരെ ഇൻസ്റ്റഗ്രാം റെക്കോർഡ് ഭേദിക്കുന്നതായിരുന്നു അത്.