ആ സിനിമ എനിക്ക് ചെയ്യാൻ വയ്യെന്ന് പറഞ്ഞതാണ്: ഓഡിഷനു പോലും എന്നെ വിളിക്കാത്തത് എന്താണെന്ന് തോന്നിയിട്ടുണ്ട്: കനി

വാർപ്പുമാതൃകകൾക്ക് പുറത്തുള്ള അഭിനേത്രിയാണ് കനി കുസൃതി. പുരസ്കാരനേട്ടങ്ങളേക്കാൾ കനിയെ വാർത്താതാരമാക്കിയത് നിലപാടുകളും തുറന്നു പറച്ചിലുകളുമാണ്. ചെറുപ്പം മുതൽ സാധാരണ കുട്ടിയാകാൻ മാത്രം ആഗ്രഹിച്ച കനി കുസൃതി വളർന്നപ്പോൾ അതേ സാധാരണത്വം, തൊഴിലായി തിരഞ്ഞെടുത്ത അഭിനയത്തിലും തുടർന്നു. മലയാളികൾ കണ്ടു പരിചയിച്ച ചലച്ചിത്രതാരങ്ങളുടെ വർത്തമാനങ്ങളും തിരഞ്ഞെടുപ്പുകളുമായിരുന്നില്ല കനിയുടേത്. അഭിനേത്രി എന്ന നിലയിൽ ലഭിച്ച പരിമിതമായ അവസരങ്ങളിൽനിന്ന് സംസ്ഥാന പുരസ്കാരം മുതൽ ചലച്ചിത്രപ്രവർത്തകരുടെ സ്വപ്നവേദിയായ കാൻ ചലച്ചിത്രമേളയുടെ റെഡ് കാർപ്പറ്റ് വരെ എത്തി നിൽക്കുകയാണ് കനി. 

പായൽ കപാഡിയ സംവിധാനം ചെയ്ത ‘ഓൾ വി ഇമാജിൻ ആസ് ലൈറ്റ്’ കാൻ ചലച്ചിത്രമേളയിലെ ഗ്രാൻ പ്രി പുരസ്കാരം നേടിയപ്പോൾ, ആ അഭിമാനനേട്ടത്തിന്റെ മലയാളി മുഖങ്ങളിലൊന്നായി കനി കുസൃതിയും സുഹൃത്തും സഹപ്രവർത്തകയുമായ ദിവ്യപ്രഭയും. ‘ബിരിയാണി’ എന്ന ചിത്രത്തിലെ അഭിനയത്തിന് മികച്ച നടിക്കുള്ള സംസ്ഥാന പുരസ്കാരം ഏറ്റുവാങ്ങിയ ശേഷം സദസ്സിനെ അഭിസംബോധന ചെയ്തു സംസാരിച്ച കനി ആ പുരസ്കാരം സമർപ്പിച്ചത് മലയാളത്തിന്റെ ആദ്യ നായിക പി.കെ. റോസിക്കായിരുന്നു. കാൻ ചലച്ചിത്രമേളയിലെ റെഡ് കാർപ്പറ്റ് എന്ന അഭിമാനവേദിയിലും സ്റ്റൈലായി നിലപാടു പ്രഖ്യാപിച്ച് കനി കയ്യടി നേടി. പുരസ്കാരനേട്ടത്തിന്റെ സന്തോഷവും കാൻ ചലച്ചിത്രമേളയിലെ അനുഭവങ്ങളും പങ്കുവച്ച് കനി കുസൃതി മനോരമ ഓൺലൈൻ പ്രീമിയത്തിൽ. 

∙ എങ്ങനെയാണ് പായൽ കപാഡിയയുടെ സിനിമയിലേക്ക് എത്തിയത്?

കുറേ വർഷങ്ങൾക്കു മുൻപുതന്നെ എനിക്ക് പായലിനെ അറിയാം. ഞാൻ അഭിനയിച്ച ചില ഹ്രസ്വചിത്രങ്ങൾ കണ്ട് ഇഷ്ടം തോന്നി എന്റെ ഒരു സുഹൃത്തിന്റെ കയ്യിൽനിന്നു നമ്പർ സംഘടിപ്പിച്ച് എന്നെ വിളിക്കുകയായിരുന്നു. എന്റെ കൂടെ വർക്ക് ചെയ്യാൻ ഇഷ്ടം തോന്നിയിട്ടാണ് അവർ എന്നെ വിളിച്ചത്. അന്നേ ഈ കഥ പായൽ എഴുതിയിട്ടുണ്ട്. എന്നാൽ ഇപ്പോഴത്തെ രൂപത്തിൽ ആയിട്ടില്ല. രണ്ടു മലയാളി നഴ്സുമാരുടെ കഥയായിരുന്നു. പായലിന്  മലയാളം അറിയില്ല എന്നു പറഞ്ഞു. ഇപ്പോൾ ദിവ്യപ്രഭ ചെയ്ത കഥാപാത്രത്തിനു വേണ്ടിയാണ് അന്ന് എന്നെ വിളിച്ചത്. അനു എന്നാണ് ആ കഥാപാത്രത്തിന്റെ പേര്. അന്നെനിക്ക് 30 വയസ്സേ ഉള്ളൂ. 24–25 വയസ്സുള്ള ക്യാരക്ടർ അഭിനയിക്കാം എന്ന രീതിയിലാണ് എന്നെ വിളിക്കുന്നത്. ഉടനെ തന്നെ ഷൂട്ട് തുടങ്ങാമെന്നും പറഞ്ഞു. 

ആ സമയത്ത് പായൽ പുണെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയിൽ പഠിക്കുകയാണ്. ആ സമയത്താണ് അവർക്ക് അവിടെ കുറേ പ്രശ്നങ്ങൾ നേരിടേണ്ടി വന്നത്. പിന്നീട് ഡോക്യുമെന്ററി നിർമാണത്തിന്റെയും ഗ്രാൻഡ് കിട്ടി പോകുന്നതിന്റെയും ഒക്കെ തിരക്കിലായപ്പോൾ സിനിമ നടന്നില്ല. എപ്പോഴെങ്കിലും നമുക്ക് ഒരുമിച്ച് വർക്ക് ചെയ്യാമെന്ന് പായൽ ഇടയ്ക്ക് മെസജ് അയയ്ക്കും. അങ്ങനെ അതു നീണ്ടു പോയി. ഒന്നര വർഷം മുൻപ് വീണ്ടും പായൽ എന്നെ വിളിച്ചു. പ്രോജക്റ്റ് ‘ഓൺ’ ആയിട്ടുണ്ടെന്നു പറഞ്ഞു. അപ്പോഴേക്കും എന്റെ പ്രായം 24 വയസ്സുള്ള കഥാപാത്രത്തെ ചെയ്യാൻ പാകത്തിലുള്ളതായിരുന്നില്ല. മറ്റൊരു കഥാപാത്രത്തെ ചെയ്താലോ എന്ന് പായൽ ചോദിച്ചു. പുതിയ കഥാപാത്രത്തിനു വേണ്ടി ഓഡിഷൻ ചെയ്യണമെന്ന് പറഞ്ഞതിനുസരിച്ച് ഞാൻ പോയി.  

ആദ്യത്തെ ഓഡിഷൻ കഴിഞ്ഞപ്പോൾ പായലിന് അത്ര തൃപ്തി വന്നിട്ടില്ലെന്ന് എനിക്കു തോന്നി. വേറെ ആളുകളെ കൂടി ഓഡിഷൻ ചെയ്തു നോക്കിയിട്ടു പറഞ്ഞാൽ മതിയെന്ന് ഞാൻ പായലിനോടു പറഞ്ഞു. ഞാനിപ്പോൾ ചെയ്ത കഥാപാത്രത്തിനു വേണ്ടി ദിവ്യ പ്രഭയും ഓഡിഷൻ കൊടുത്തിരുന്നു. എനിക്കറിയാവുന്ന നിരവധി അഭിനേതാക്കൾ ആ കഥാപാത്രത്തിനു വേണ്ടിയുള്ള ഓഡിഷനിൽ പങ്കെടുത്തിട്ടുണ്ട്. അഭിനേതാക്കൾ അല്ലാത്തവരും ഓഡിഷൻ നൽകിയിരുന്നു. ഒരു മാസം കഴിഞ്ഞപ്പോൾ പായൽ എന്നെ വിളിച്ചു. ‘‘കനി ഒന്നു കൂടി വരാമോ? ഒരു ഓഡിഷൻ കൂടി ചെയ്യാം’’ എന്നു പറഞ്ഞു. ആ ഓഡിഷൻ കഴിഞ്ഞപ്പോഴാണ് പായൽ എന്നെ ആ കഥാപാത്രത്തിനായി ഉറപ്പിക്കുന്നത്. 

∙ ദിവ്യപ്രഭയുമായി ദീർഘകാലത്തെ സൗഹൃദമുണ്ടല്ലോ. യാദൃച്ഛികമായാണോ രണ്ടു പേരും ഈ സിനിമയിൽ ഒരുമിച്ചു വന്നത്?

ഞാനും ദിവ്യപ്രഭയും വളരെ അടുത്ത സുഹൃത്തുക്കളാണ്. പക്ഷേ, ഈ സിനിമയിൽ ഞങ്ങളൊരുമിച്ചു വന്നത് യാദൃച്ഛികമായിട്ടാണ്. പായൽ കപാഡിയ എന്ന ഒരു സംവിധായികയുടെ ഓഡിഷനു പോയെന്നും നല്ല വർക്കാണെന്നുമൊക്കെ ദിവ്യ എന്നോടു പറഞ്ഞിരുന്നു. പിന്നീടാണ് ദിവ്യയെ മുൻപ് ഞാൻ ചെയ്യാനിരുന്ന കഥാപാത്രത്തിലേക്ക് തിരഞ്ഞെടുക്കുന്നത്. ഞങ്ങൾക്കു രണ്ടു പേർക്കും പായലിന്റെ സിനിമയിൽ അവസരം ലഭിച്ചപ്പോൾ വലിയ സന്തോഷം തോന്നി. കാരണം, ദിവ്യയും ഞാനും പരിചയപ്പെടുന്നത് ഒരു സീരിയലിൽ കൂടിയാണ്. കെ.കെ രാജീവ് സംവിധാനം ചെയ്ത ഈശ്വരൻ സാക്ഷിയായി എന്ന സീരിയലിൽ ഞങ്ങൾ ഒരുമിച്ച് അഭിനയിച്ചിരുന്നു. ‌